އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ރިޔާސީ ޕްރައިމަރީގައި އެ ޕާޓީގެ ކުރީގެ ޗެއާޕާސަން ފައްޔާޒް އިސްމާއިލް އަށް ތާއީދު ކުރައްވައި، ޕާޓީގެ ޗެއާޕާސަންގެ މަގާމަށް ވާދަ ކުރައްވަން ކުރީގެ ރައީސް މުހައްމަދު ނަޝީދު ނިންމަވައިފި ކަމަށް އިއްޔެ އިއުލާނު ކުރެއްވި އެވެ. މިއީ ނަޝީދު އެމްޑީޕީން ވަކިވެވަޑައިގެން އަލުން އެމްޑީޕީ ނެންގެވުމަށް ކުރައްވާ މަސައްކަތުގެ އެންމެ ބޮޑު ފެށުމެވެ.
އެމްޑީޕީގެ ޗެއާޕާސަންގެ މަގާމަށް، ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވާދަ ކުރައްވާނެ ކަމަށް ވަނީ އިއުލާނު ކުރައްވައިފަ އެވެ. މި ހަބަރުގެ އިތުރުން އިއްޔެގެ ޝާއިއުކުރި ހަބަރުތަކުގެ ތެރެއިން ފާހަގަކޮށްލެވޭ ހަބަރުތައް ތިރީގައި އެވަނީ އެވެ.
ރިޔާސީ ޕްރައިމަރީގައި ފައްޔާޒަށް ތާއީދު ކުރައްވައި، ނަޝީދު ޗެއާޕާސަންގެ މަގާމަށް ވާދަ ކުރައްވަނީ
އެމްޑީޕީގެ ކުރިއަށް އޮތް ރިޔާސީ ޕްރައިމަރީގައި ފައްޔާޒް އިސްމާއިލަށް ތާއީދުކުރައްވައި، ޕާޓީގެ ޗެއާޕާސަންގެ މަގާމަށް ވާދަކުރެއްވުމަށް ކުރީގެ ރައީސް މުހައްމަދު ނަޝީދު ނިންމަވައިފިއެވެ. މީގެ ކުރިން ވެސް ޕާޓީގެ އިސް މަގާމުތަކެއް ފުރުއްވާފައިވާ ނަޝީދު މި ނިންމެވުން އިއުލާނު ކުރައްވާނީ މިއަދު ބާއްވާ ނޫސްވެރިންގެ ބައްދަލުވުމެއްގައެވެ.
ސަރުކާރުން މަޝްވަރާގެ މޭޒަށް އައުމަށް ނަޝީދު ގޮވާލައްވައިފި
ގާނޫނުއަސާސީއާއި ވެރިކަމުގެ ނިޒާމަށް ބޮޑެތި ބަދަލުތަކެއް ގެނައުމަށް މަޝްވަރާކުރުމަށް ކުރީގެ ރައީސް މުހައްމަދު ނަޝީދު ސަރުކާރަށް ގޮވާލައްވައިފިއެވެ. މި ބަދަލުތަކުގެ ތެރޭގައި ދައުލަތުގެ ބާރުތައް ވަކިކުރުމާއި އަސާސީ ހައްގުތައް ކަށަވަރުކުރުން ހިމެނޭއިރު، މިކަން ހާސިލުކުރުމަށް ސުލްހަވެރި ހަރަކާތްތައް ހިންގާނެ ކަމަށްވެސް އެމަނިކުފާނު ވިދާޅުވިއެވެ.
ޕީއެންއެފްގެ މުޒާހަރާގައި ބޭންދި ސޯފާއެއް ކުޑަ ވަގުތުކޮޅަކަށް ފުލުހުން ގެންގޮސްފި
ޕީއެންއެފް އިން މާލޭގައި ކުރި މުޒާހަރާގެ ތެރެއިން މަގުމަތީގައި ބެހެއްޓި ސޯފާއެއް ފުލުހުންގެ ބެލުމުގެ ދަށަށް ގެންދިއުމަށްފަހު، ކުޑަ ވަގުތުކޮޅެއްގެ ތެރޭގައި ވަނީ އަނބުރާ ހަވާލުކޮށްފައެވެ. އިދިކޮޅު ޕާޓީތަކުން ސިލްސިލާކޮށް މުޒާހަރާ ކުރަމުންދަނީ ރައީސް މުއިއްޒު އިސްތިއުފާ ދެއްވުމަށް ގޮވާލައި، އިންތިގާލީ ވެރިކަމެއް ގާއިމުކުރުމަށެވެ.
ސަރުކާރު ކުންފުނިތަކުގައި 42،000 މުވައްޒަފުން، 13،000 މީހެއްގެ ވަޒީފާ ގެއްލިދާނެ
ހަރަދުތައް ކުޑަކުރުމުގެ ގޮތުން، ސަރުކާރު ކުންފުނިތަކުގެ މުވައްޒަފުންގެ އަދަދު 33 ޕަސެންޓު މަދުކުރަން، ފިނޭންސުން އެންގުމާ ގުޅިގެން 13،000 މުވައްޒަފުންގެ ވަޒީފާ ގެއްލުމުގެ ފުރުސަތު އޮތް ނަމަވެސް، ވަޒީފާއިން ވަކިކުރާނީ ކުންފުނިތަކުގެ ހިންގުމަށް ބުރޫނާރާނެހެން ގާނޫނީ އުސޫލުތަކުގެ ތެރެއިން ކަމަށް މިނިސްޓަރު ޒަމީރު ވިދާޅުވި.
ސަރުކާރު ޕްރޮޖެކްޓުތަކަށް ބީއެމްއެލްއިން ހަތަރު ބިލިއަން ރުފިޔާ ހަރަދުކުރަނީ
ސަރުކާރުން ހިންގާ ތަރައްގީގެ މަޝްރޫއުތަކަށް ބޭނުންވާ ހަތަރު ބިލިއަން ރުފިޔާ ބީއެމްއެލް މެދުވެރިކޮށް ހަމަޖައްސާފައިވާއިރު، ކޮންޓްރެކްޓާ ފައިނޭންސް އުސޫލުން ކުރިއަށްގެންދާ މި މަޝްރޫއުތަކުގެ ސަބަބުން ބޭންކަށް މާލީ ނުރައްކަލެއް ނެތް ކަމުގެ ޔަގީންކަން ސަރުކާރުން ދޭ.
ވިލާ ކޮލެޖުގެ މެއި އިންޓޭކަށް ކުރިމަތިލުމުގެ މުއްދަތު އިތުރުކޮށްފި
ވިލާ ކޮލެޖުގެ މެއި އިންޓޭކުގައި 100 އަށްވުރެ ގިނަ ކޯސްތަކަށް ކުރިމަތިލުމުގެ މުއްދަތު މެއި 16، ގެ ނިޔަލަށް މިހާރު ވަނީ އިތުރުކޮށްފައި. މި އިންޓޭކުގައި ސެޓްފިކެޓް ލެވެލްއިން ފެށިގެން މާސްޓާސްއާ ހަމައަށް ރާއްޖޭގެ އަދި ބޭރުގެ މަޝްހޫރު ޔުނިވާސިޓީތަކުގެ ޕްރޮގްރާމްތަކުގައި ބައިވެރިވުމުގެ ފުރުސަތު ވަނީ ހުޅުވާލާފައި.
ނަޝީދާއި ފައްޔާޒްގެ ހުށަަހެޅުމަކީ ސަރުކާރާއި ދައުލަތުގެ ވެރިޔަކު އިންތިހާބު ކުރާ މަސްހުނި ނިޒާމެއް
ރާއްޖޭގެ ވެރިކަމުގެ ނިޒާމަށް ބަދަލުތަކެއް ގެނައުމަށް "ބޮޑު ބަދަލު" ގެ ނަމުގައި ކުރީގެ ރައީސް ނަޝީދާއި ފައްޔާޒް އިސްމާއިލް ވަނީ އާ ހުށަހެޅުންތަކެއް ހުށަހަޅުއްވާފައެވެ. މި ހުށަހެޅުމުގެ މައިގަނޑު ބަދަލަކީ ސަރުކާރު ހިންގާ ވެރިޔާ ރައްޔިތުންގެ ސީދާ ވޯޓުން އިންތިޚާބުކޮށް، ދައުލަތުގެ ވެރިޔާ މަޖިލީހާއި ކައުންސިލަރުންގެ ވޯޓުން އިންތިޚާބުކުރާ ގޮތަށް ނިޒާމު މަސްހުނި ކުރުމެވެ.
ކޮމިޝަނުގެ ހިސާބުން ވެސް ކައުންސިލް އިންތިހާބު ކާމިޔާބު ކުރީ އެމްޑީޕީ
މިދިޔަ އޭޕްރީލް 4 ގައި ބޭއްވި ލޯކަލް ކައުންސިލް އިންތިޚާބުގައި އެންމެ ގިނަ ގޮނޑި އިދިކޮޅު އެމްޑީޕީން ކާމިޔާބުކުރިއިރު، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ގިނަ ގޮނޑިތައް ކާމިޔާބުކުރީ ސަރުކާރު ހިންގާ ޕީއެންސީންނެވެ. އިލެކްޝަންސް ކޮމިޝަނުގެ ތަފާސްހިސާބުތަކުން މިހެން ދެއްކި ނަމަވެސް، ދެ އިންތިޚާބުގެ ޖުމްލަ ގޮނޑިތަކަށް ބަލައި އިންތިޚާބު ކާމިޔާބުވީ ޕީއެންސީއަށް ކަމަށް އެ ޕާޓީން ދަނީ ބުނަމުންނެވެ.
އިތުރު ކެންޑިޑޭޓަކު ކުރިމަތިނުލުމުން އެމްޑީޕީގެ ޓިކެޓު ކުރީގެ މޭޔަރު ސޯބެއަށް
ހިތަދޫ އުތުރު ދާއިރާގެ ބައި-އިލެކްޝަންގައި އެމްޑީޕީގެ ފަރާތުން ވާދަކުރުމަށް އިތުރު މީހަކު ކުރިމަތިނުލުމުން، އެ ޕާޓީގެ ޓިކެޓު ކުރީގެ މޭޔަރު އަބްދުﷲ ސޯދިގު (ސޯބެ) އަށް ކަށަވަރުވެއްޖެއެވެ. މި ގޮނޑި ހުސްވީ ކުރިން އެ ދާއިރާގެ މެންބަރުކަމުގައި ހުންނެވި މުހައްމަދު ސިނާނުގެ މެންބަރުކަމުގެ ޝަރުތު ހަމަނުވާކަމަށް ސުޕްރީމް ކޯޓުން ނިންމުމާ ގުޅިގެންނެވެ.
ނަލަހިޔާ ރެޒިޑެންސްއިން ވައްކަންކުރި މައްސަލައިގައި އިތުރު މީހަކު ހައްޔަރުކޮށްފި
ނަލަހިޔާ ރެޒިޑެންސްއިން ހަތަރު މިލިއަން ރުފިޔާ ވަގަށް ނެގި މައްސަލައިގައި އިތުރު މީހަކު ހައްޔަރުކޮށް، މި މައްސަލައިގައި ބަންދުކުރި މީހުންގެ އަދަދު ފަހަކަށް އަރައިފި. މި ވައްކަމުގެ ތަހުގީގުގެ ބޮޑު ބައެއް ނިމިފައިވާއިރު، ވަގަށް ނެގި ފައިސާގެ ތެރެއިން މިހާތަނަށް ފުލުހުންނަށް ހޯދިފައިވަނީ 50،000ރ.
އެތެރޭގެ ސުކޫކުތަކަކަށް ސަރުކާރުގެ އިތުރު އިމާރާތްތަކެއް ރަހުނުކޮށްފައި ހުރި ކަމަށް މުއިއްޒު ވިދާޅުވެއްޖެ
އެތެރޭގެ ބާޒާރަށް ވިއްކާފައިވާ ސުކޫކުތަކެއްގެ ވާހަކަ މުއިއްޒު ދެއްކެވި ނަމަވެސް އެތެރޭގެ ދަރަނީގެ ތަފާސްހިސާބުތަކުން މި ސުކޫކުގެ މައުލޫމާތު ފެންނަން ނެތް. މުއިއްޒު ވަނީ ރަހުނުކޮށްފައިވާ އިތުރު ބިންތަކުގެ ތަފްސީލު ކުރިއަށް އޮތް ތަނުގައި ހާމަކުރައްވާނެ ކަމަށް ވިދާޅުވެފަ.
އެފްއެސްއެމް މެދުވެރިކޮށް އައްޑޫއަށް އަގުހެޔޮކޮށް ތެޔޮ ފޯރުކޮށްދޭން ކައުންސިލުން ގޮވާލައިފި
އައްޑޫ ސިޓީގައި އަމިއްލަ ކުންފުނިތަކުން ބޮޑު އަގުގައި ތެޔޮ ވިއްކަމުންދާތީ، އެފްއެސްއެމް މެދުވެރިކޮށް ހެޔޮ އަގުގައި ތެޔޮ ފޯރުކޮށްދިނުމަށް އައްޑޫ ސިޓީ ކައުންސިލުން ސަރުކާރަށް ގޮވާލައިފި. ކައުންސިލުން ބުނީ އެ ސިޓީގައި މިހާރު ތެޔޮ ލިބެން ހުރި އަގުތަކަކީ ރައްޔިތުން އުފުލަން ޖެހިފައިވާ ބޮޑު ބުރައެއް ކަމަށް.
މެންބަރެއްގެ ގޮނޑި ގެއްލުވާލުމުގެ އިޖުރާއަތްތައް ނުހިންގޭނެ ކަމަށް ކަނޑައަޅައިދޭން އެދުނު އަމުރު ނެރެނުދިން
ފުލް ބެންޗުގެ އިއްތިފާގުން މިގޮތަށް ނިންމީ، އެފަދަ އަމުރެއް ނެރުމަކީ މައްސަލައިގެ އަސްލު މައުލޫއަށް އަސަރުކޮށްފާނެ ކަމެއް ކަމަށް ފެންނާތީއެވެ. މި ނިންމުން އައިސްފައިވަނީ ސުޕްރީމް ކޯޓުގެ ބެންޗަށް ބޮޑެތި ބަދަލުތަކެއް އައިސް، ބައެއް ފަނޑިޔާރުން ވަކިކޮށްފައިވާ ދަނޑިވަޅެއްގައެވެ.
ކުޑަކުއްޖަކަށް ޖިންސީ ގޯނާކުރި މީހަކު 16 އަހަރަށް ޖަލަށް
11 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައެއްގައި މ. މުނިޔާގެ، މުހައްމަދު އަނިލް 16 އަހަރަށް ޖަލަށްލުމަށް ކޯޓުން ވަނީ ހުކުމްކޮށްފައި. ބަންދުގައި ހޭދަކުރި މުއްދަތު އުނިކުރުމަށްފަހު އޭނާ ތަންފީޒުކުރަން ޖެހެނީ 15 އަހަރާއި ހަތް މަސް ދުވަހުގެ ޖަލު ހުކުމެއް.
ޕީއެންސީއަށް ވޯޓު ނުދިނީ ދީން އިސްނުކުރާ މީހުން ކަމަށް ސިފަވާ ގޮތަށް ރައީސް ވާހަކަ ދައްކަވައިފި
ޕީއެންސީއަށް އިންތިޚާބުތަކުގައި މެޖޯރިޓީ ލިބުނީ ރައްޔިތުން ދީނާއި ގައުމު އިސްކުރާތީ ކަމަށް ވިދާޅުވެ، ރައީސް މުއިއްޒު އިދިކޮޅު ފަރާތްތަކަށް ފާޑުވިދާޅުވެއްޖެއެވެ. އެމަނިކުފާނު ސިފަކުރެއްވި ގޮތުގައި އިދިކޮޅު ކެންޑިޑޭޓުންނާއި އެމީހުންނަށް ވޯޓުދޭ ފަރާތްތަކުގެ އަމަލުތައް ހުރީ ދީނީ އަދި އަޚްލާގީ މިންގަނޑުތަކާ ޚިލާފަށެވެ. މި ވާހަކަފުޅުތައް އަމާޒުކުރެއްވީ ކައުންސިލް އިންތިޚާބުތަކުގައި އެމްޑީޕީން ބޮޑު ކާމިޔާބީއެއް ހޯދާފައިވާ ދަނޑިވަޅެއްގައެވެ.
އިންތިހާބުން ބަލިވި ޕީއެންސީއަށް ތޮއްޑޫ އާއި ރަސްދޫ ކައުންސިލް ލިބުން ފާހަގަ ކުރަން ހަވާ އަރުވައިފި
ލޯކަލް ކައުންސިލް އިންތިޚާބުގެ މުޅި ނަތީޖާއިން ޕީއެންސީ ބަލިވި ނަމަވެސް، ތޮއްޑޫ ދާއިރާގެ ރަށްތަކުން އެ ޕާޓީއަށް ލިބުނު ކާމިޔާބީ ފާހަގަކުރުމަށް ރަސްދޫގައި ހަވާއަރުވައިފިއެވެ. މި ޖަލްސާގައި މުހައްމަދު މުއިއްޒު ވަނީ އެ ދާއިރާއިން ލިބުނު ނަތީޖާއަކީ ތާރީހީ ކާމިޔާބީއެއްގެ ގޮތުގައި ސިފަކުރައްވާފައި.
މުޒާހަރާ ކުރާތީ ނުރުހި، އިދިކޮޅުގައި ތިބީ ދީނާ ދުރު ބަޔެއް ކަމަށް މުއިއްޒު ސިފަކޮށްފި
އިދިކޮޅު ފަރާތްތަކުން ކުރަމުންދާ މުޒާހަރާތަކަކީ އަހުލާގީ ފެންވަރު ދަށް ކަމެއްގެ ގޮތުގައި ރައީސް މުއިއްޒު ސިފަކުރައްވައި، އެ ފަރާތްތަކުން ދީނާއި ގައުމަށްވުރެ އެހެން ކަންކަން އިސްކުރާ ކަމަށް ވިދާޅުވެއްޖެއެވެ.
ދެ ހަފުތާގެ ހިލޭ ދަތުރުތަކަށް ފަހު އެމްޓީސީސީ ޓެކްސީއަށް އަގު ނަގަނީ
އެމްޓީސީސީގެ ޓެކްސީ އެޕްލިކޭޝަނަށް ދިމާވި ސެކިއުރިޓީ މައްސަލަތަކަކާ ގުޅިގެން ދެ ހަފުތާ ވަންދެން ހިލޭ ދަތުރުތައް ކުރުމަށްފަހު، އިއްޔެއިން ފެށިގެން ވަނީ އެމްޓީސީސީގެ ހޮޓްލައިން ނަންބަރަށް ގުޅައިގެން ނުވަތަ އަލަށް ތައާރަފުކުރި ވެބް ޕޯޓަލް މެދުވެރިކޮށް ބުކިން ހައްދައި، ފައިސާ ދައްކައިގެން ދަތުރުކުރަން ފަށާފަ.
