ރައްޔިތުންގެ މަޖިލީހުން ހުސްވި ހިތަދޫ އުތުރު ދާއިރާގެ ބައި-އިލެކްޝަންގައި އިދިކޮޅު އެމްޑީޕީގެ ފަރާތުން ވާދަ ކުރަން ހުޅުވާލި ފުރުސަތުގައި އިތުރު ކެންޑިޑޭޓަކު ކުރިމަތިނުލުމުން ކުރީގެ މޭޔަރު އަބްދުﷲ ސޯދިގު _(ސޯބެ) އަށް ޕާޓީގެ ޓިކެޓު ލިބިއްޖެ އެވެ.
އައްޑޫގެ މޭޔަރުގެ މަގާމުގައި ޖެހިޖެހިގެން ތިން ދައުރު ހުންނެވި ސޯބެ ޕްރައިމަރީގައި ވާދަ ކުރައްވަން ނިންމެވި ހިސާބުން ވެސް ވަރަށް ގިނަ ބައެއްގެ ތާއީދު ލިބެމުންދިޔަ އެވެ.
ހިތަދޫ އުތުރު ދާއިރާގެ ގޮނޑި ހުސްވީ އެ ގޮނޑި ފުރުއްވަމުން ގެންދެވި މުހައްމަދު ސިނާނުގެ މެންބަރުކަމުގެ ޝަރުތުހަމަނުވެގެން މަގާމު ގެއްލުމުންނެވެ. ސާބިތު ދަރަންޏެއް އޮވެ އެ ދަރަންޏާ އެއްގޮތަށް ފައިސާ ދައްކަމުންނުދިޔުމުން އޭނާގެ މަގާމު ގެއްލިފައިވާ ކަމަށް ސުޕްރީމް ކޯޓުން ކަނޑައެޅީ މިދިޔަ އާދީއްތަ ދުވަހެވެ.
އެކަމަކު، ހިތަދޫ އުތުރު ދާއިރާގެ ޕީއެންސީގެ ޓިކެޓު ހޯދަން ސިނާން ވަނީ އަނެއްކާ މަސައްކަތް ފަށައިފަ އެވެ. ޕީއެންސީގެ ޕްރައިމަރީގައި ސިނާނުގެ އިތުރުން އަހުމަދު ސައީދު (ސޮޑާ) ވެސް ވާދަ ކުރައްވަ އެވެ. ސޮޑާއަކީ ހިތަދޫ މޫލެކެޑެ ދާއިރާގެ ކައުންސިލް މެންބަރެވެ.
2024 ވަނަ އަހަރު ބޭއްވި މަޖިލިސް އިންތިހާބުގައި ހިތަދޫ އުތުރު ދާއިރާގެ ގޮނޑި ސިނާނު ކާމިޔާބު ކުރެއްވީ 1079 ވޯޓާއެކު 39 ޕަސެންޓު ވޯޓާއެކު އެވެ. އެންމެ ކައިރިން ވާދަކުރެއްވީ ނަވާރަވަނަ މަޖިލީހުގެ ރައީސް މުހައްމަދު އަސްލަމް އެވެ. އެމްޑީޕީގެ ޓިކެޓުގައި ވާދަކުރެއްވި އަސްލަމްއަށް 838 ވޯޓު ލިބިވަޑައިގަތެވެ.
