ސަރުކާރު ކުންފުނިތަކުގައި މަސައްކަތް ކުރާ މުވައްޒަފުންގެ އަދަދު 33 ޕަސެންޓު މަދުކުރުމަށް ފިނޭންސް މިނިސްޓްރީން ކުންފުނިތަކަށް އެންގިއިރު، އެ ކުންފުނިތަކުގައި 42،000 އަށް ވުރެ ގިނަ މުވައްޒަފުން އެބަތިބި ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
ސަރުކާރު ކުންފުނިތަކުގައި ތިބި މުވައްޒަފުންގެ އަދަދު މަދުކުރަން ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) މެދުވެރިކޮށް އެ ކުންފުނިތަކަށް އެންގީ، މެދުއިރުމަތީގައި ހިނގަމުންދާ ހަނގުރާމައާ ގުޅިގެން އަޅަން ނިންމާފައިވާ ހަރަދު ކުޑަކުރުމުގެ ފިޔަވަޅެއްގެ ގޮތުގަ އެވެ.
އެ ގޮތުން ސަރުކާރުން ކުންފުނިތަކަށް އަންގާފައި ވަނީ ހިންގުމުގެ ހަރަދުތައް ކުޑަކުރުމުގެ ގޮތުން މިހާރު ތިބި މުވައްޒަފުންގެ އަދަދު މަދުކުރުމަށާއި ކޮންމެހެން ބޭނުން ނުވާ ވަޒީފާތަކަށް މީހުން ނުނެގުމަށެވެ.
ހަނގުރާމަ ކޮމިޓީން ބޭއްވި ނޫސްވެރިންގެ ބައްދަލުވުމުގައި މިކަމުގެ ތަފުސީލުތަކަށް ވަޑައިގަންނަވަމުން ޒަމީރު ވިދާޅުވީ، ބައެއް ކުންފުނިތައް "ރައިޓް ސައިޒް" ކުރާއިރު 33 ޕަސެންޓު މުވައްޒަފުން ނުކެނޑިދާނެ ކަމަށެވެ.
މީގެ މިސާލެއްގެ ގޮތުގައި ޒަމީރު ހިއްސާކުރެއްވީ ގައުމީ އެއާލައިން، މޯލްޑިވިއަން، އޮޕަރޭޓުކުރާ އައިލެންޑް އޭވިއޭޝަން އެވެ. އޭނާ ވިދާޅުވީ، އައިލެންޑް އޭވިއޭޝަން ފަދަ ކުންފުނިތަކުން އެ އަދަދަށް މުވައްޒަފުން ކަނޑައިފިނަމަ، ކުންފުނި ނުހިންގޭ ހާލަތަށް ގޮސްދާނެތީ އެއީ ކުރެވޭނެ ކަމެއް ނޫން ކަމަށެވެ.
ސިޔާސީ ބޭނުމަށް އެތައް ހާސް ވަޒީފާތަކެއް އުފެއްދުމަށް ފަހު އެސްއޯއީތަކުން 33 އިންސައްތަ މުވައްޒަފުން މަދުކުރަން އަންގައިފި
ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކޮށް ހަރަދު ކުޑަކުރުމަށްޓަކައި، އެސްއޯއީތަކުގެ މުވައްޒަފުންގެ 33 އިންސައްތަ މަދުކުރުމަށް ފިނޭންސް މިނިސްޓްރީން ޕީސީބީއަށް އަންގައިފި. މީގެ އިތުރުން، ސިޔާސީ ބޭނުމަށް ވަޒީފާ ދިނުން ހުއްޓާލައި، ތައުލީމާއި ގާބިލިއްޔަތަށް ބަލައިގެން މީހުން އައްޔަންކުރާ އުސޫލު ހަރުދަނާކުރުމަށް ވެސް ވަނީ އިރުޝާދު ދީފައި.
ޒަމީރު ވިދާޅުވީ، ސަރުކާރުން އަންގާފައި ވަނީ ކުންފުނިތަކުގެ މިހާރުގެ އޮޕަރޭޝަންސްއަށް ބަލާފައި އެކަށީގެންވާ އަދަދަކަށް މުވައްޒަފުންގެ ބައިތިއްބަން ކަމަށެވެ. އަދި، މި ގޮތަށް ވަޒީފާތަކުން ވަކިކުރާއިރު ވެސް، ގާނޫނުތަކުގައި ކަނޑައެޅިފައިވާ އުސޫލުތަކުގެ ތެރެއިން އެކަން ކުރަން އަންގާފައި ވާނެ ކަމަށް އޭނާ ވިދާޅުވި އެވެ.
"އަޅުގަނޑު މި ދެންނެވީ، މާދަމާ ހެނދުނު އިރުއަރަންވާއިރަށް މީހުން ކަނޑާށެކޭއެއް ނޫން. ހަމަޖެހޭ އުސޫލެއްގެ ގޮތުން، އަދި އެމްޕްލޯޔިމަންޓް ގާނޫނާ އެއްގޮތަށް އެކަން ކުރަން އަންގާފަ ވާނީ،" ޒަމީރު ވިދާޅުވި އެވެ.
ވަޒީފާތަކުން މީހުން ކަނޑާއިރު، ޒަމީރު ވިދާޅުވީ، މީހުންނަށް ވާނެ އުނދަގޫތަކަށް ބަލައިގެން މިކަން ކުރަން ވެސް ކުންފުނިތަކަށް އަންގާފައި ވާނެ ކަމަށެވެ.
އަހަރެއް ތެރޭ ސަރުކާރު ކުންފުނިތަކަށް 4،600 މުވައްޒަފުން އިތުރުވި، 12 ކުންފުންޏެއް ހިންގީ ގެއްލުމުގައި
މިދިޔަ އަހަރުގެ ރިވިއު އަށްވުރެ މި އަހަރުގެ ރިވުގައި މުވައްޒަފުންނާ ގުޅޭގޮތުން ހިމަނާފައި ވަނީ މަދު މައުލޫމާތުތަކެއް. މިދިޔަ އަހަރުގެ ރިވިއުގައި ވަކިވަކި ކުންފުނިތަކުގައި ތިބީ ކިހާ މުވައްޒަފުންނެއްކަން އެނގޭ ގޮތަށް އޮތްއިރު މި އަހަރުގެ ރިވިއުގައި އެފަދަ އެއްވެސް މައުލޫމާތެއް ނެތް
ސަރުކާރު ކުންފުނިތަކުގައި ތިބި ކަމަށް ޒަމީރު އަންދާޒާކުރާ އަދަދުން ހިސާބުކުރާއިރު، ސީދާ 33 ޕަސެންޓު މުވައްޒަފުން ކަނޑާނަމަ، 13،000 އަށް ވުރެ ގިނަ މީހަކަށް ވަޒީފާ ގެއްލުމުގެ ބިރު އެބައޮތެވެ. މިހެނަސް، ބައެއް ކުންފުނިތަކުން މުވައްޒަފުން ނުކުނޑާނަމަ، ވަޒީފާ ގެއްލޭ މީހުންގެ އަދަދު މަދު ވާނެ އެވެ.
ގިނަ ބަޔެއްގެ ވަޒީފާ ގެއްލޭ ގޮތަށް ސަރުކާރުގެ ސިޔާސަތު ކުއްލިއަކަށް ބަދަލުކުރިއިރު، ސަރުކާރު ކުންފުނިތަކުގައި ތިބި މުވައްޒަފުންގެ އަދަދު މިހާ ވަރަށް އިތުރުވީ މި ސަރުކާރުގަ އެވެ.
ސަރުކާރުން މިކަން ކުރީ، ކުރީ ސަރުކާރުން ސިޔާސީ ބޭނުންތަކަށް ކުންފުނިތަކުން ވަޒީފާ ބަހާލިކަމަށް ބުނެ އެ ގޮތަށް ވަޒީފާ ނުދޭނެ ކަމަށް ތަކުރާރުކޮށް ބުނުމަށް ފަހުގަ އެވެ. އަދި، މި ސަރުކާރުގެ ހޯމް ގްރޯން ރިފޯމް އެޖެންޑާގައި ވެސް ކުންފުނިތައް "ރައިޓް ސައިޒް" ކުރަން ހިމެނުމަށް ފަހު، އެކަމެއް ވެސް ނުކުރެ އެވެ.
ޕީސީބީން ޝާއިއުކޮށްފައިވާ އެނުއަލް ސެކްޓާ ރިޕޯޓު 2024 ގައިވާ ގޮތުގައި، މި ސަރުކާރުގެ ދައުރު ފެށުނު 2023 ވަނަ އަހަރު ނިމުނުއިރު ސަރުކާރު ކުންފުނިތަކުގައި ތިބީ 35,000 މުވައްޒަފުންނެވެ.
މިހާރު ކުންފުނިތަކުގައި ތިބި ކަމަށް ބުނާ އަދަދަކީ އަސްލު އަދަދު ނަމަ، އެ ފަހުން މިވީ ދެ އަހަރާއި ތިން މަސް ދުވަހުގެ ތެރޭގައި އެސްއޯއީތަކުން ވަނީ 7،000 ވަޒީފާ އުފައްދާފަ އެވެ.
ސަރުކާރު ކުންފުނިތަކުގައި މަސައްކަތް ކުރާ މުވައްޒަފުންނާއި ޕަބްލިކް ސެކްޓާގައި މަސައްކަތް ކުރާ ކަމަށް އަންދާޒާކުރެވޭ 45،000 ވަރަކަށް މީހުން އެއްކޮށްލުމުން ވަޒީފާތަކުގައި ތިބި މީހުންގެ އަދަދު 87,000 އަށް އަރަ އެވެ.
މިއީ ރާއްޖޭގެ މަސައްކަތް ކުރާ އާބާދީ ކަމުގައިވާ 270،000 މީހުންގެ ގާތްގަނޑަކަށް ތިން ބައި ކުޅަ އެއް ބަޔެވެ. މީގެ މާނައަކީ، ރާއްޖޭގައި ވަޒީފާ އަދާކުރާ ކޮންމެ ތިން މީހެއްގެ ތެރެއިން އެކަކަށް އާމްދަނީ ލިބެނީ ސަރުކާރު ނޫނީ ސަރުކާރު ކުންފުންޏަކުން ކަމެވެ.
