ވެރިކަން ކުރާ ޕީއެންސީއަށް ނިސްބަތްނުވާ އިންތިހާބީ ކެންޑިޑޭޓުންނަކީ ދީނެއް މިއްލަތެއް އިސްކުރާ ބައެއް ނޫންކަމަށް ވިދާޅުވެ، މުޒާހަރާ ކުރުމަކީ އަހުލާގީ ފެންވަރު ދަށް ކަމެއްކަމަށް ރައީސް މުަހައްމަދު މުއިއްޒު ސިފަކުރައްވައިފި އެވެ.
އޭޕްރިލް 4، ގައި ބޭއްވި ލޯކަލް ކައުންސިލް އިންތިހާބާއި ޑަބްލިޑީސީ އިންތިހާބުގެ އިތުރުން، ދެ އިންތިހާބު އެއްކޮށްލަން ފެނޭތޯ ބެލުމަށް ނެގި ފެންނަ ނުފެންނަ ވޯޓަށްފަހު، ފުރަތަމަ ފަހަރަށް ސިޔާސީ ޕޯޑިއަމެއްގައި ވާހަކަދައްކަވަމުން މުއިއްޒު ރޭ ވިދާޅުވީ އިންތިހާބުގައި ކާމިޔާބު ހޯދި ޕީއެންސީއަށް ނިސްބަތް ނުވާ ފަރާތްތަކުން ދީނީ މިންގަނޑުން ބޭރުން އަހުލާގީ ފެންވަރު ދަށް އަމަލުތައް ހިންގަމުންދާ ކަމަށެވެ.
"އިންތިހާބުވާ މަގާމާ ހަވާލުނުވެ، އެކަމަކުވެސް އަޅުގަނޑުމެންނަށް މިފެންނަނީ މާލޭގެ މަގުމަތިން މިފެނިގެންދަނީ މި ހޮވިފައިތިބި އިންތިހާބީ ކެންޑިޑޭޓުން މުޒާހަރާކުރަމުންދާތަން. މަގުމަތީ ހަލަބޮލިކުރަމުންދާތަން. ހަޑިހުތުރު ބަސްތައް ބޭނުންކުރަމުންދާތަން. ދީނީ މިންގަނޑުން ބޭރު ވަރަށް އަހްލާގީ ފެންވަރުދަށް އަމަލުތައް ހިންގަމުންދާތަން މިހޮވުނު ކެންޑިޑޭޓުން." މުއިއްޒު ވިދާޅުވި އެވެ.
ރައްޔިތުން އެ މީހުންނަށް ވޯޓު ދިނީ މުޒާހަރާ ކުރަން ނޫން ކަމަށް މުއިއްޒު ވިދާޅުވި އެވެ. އަދި، އެމީހުންގެ ކިބައިން ރައްޔިތުން އުއްމީދު ކޮށްފައި އޮންނާނީ ވެސް އަހުލާގީ ރީތި މިސާލުތައް ދައްކައިދޭން ކަމަށް މުއިއްޒު ވިދާޅުވި އެވެ.
ނަމަވެސް، ޕީއެންސީއަށް ނިސްބަތްނުވާ އިންތިހާބީ ކެންޑިޑޭޓުންގެ ފަރާތުން ފެންނަނީ ދީނާ ދުރު އަމަލުތަކެއް ކަމަށް މުއިއްޒު ވިދާޅުވި އެވެ.
"އެހެންނަމަވެސް އަޅުގަނޑުމެންނަށް މި ފެނިގެން މި ދަނީ އަޅުގަނޑުމެންނާ އިދިކޮޅު ފިކުރުގެ މީހުންގެ ކިބައިން ހަމަ އަބަދުވެސް ފެންނަ މަންޒަރު. ގައުމެއް އިސްކުރަނީކީ ނޫން، ދީނެއް މިއްލަތެއް އިސްކުރަނީކީ ނޫން، މުޅިން އެހެންގޮތަކަށް އުޅޭތަން." މުއިއްޒު ވިދާޅުވި އެވެ.
"އެހެންވީމަ ހަމަވިސްނޭ ރައްޔިތުން. އަދުލު އިންސާފު ގަބޫލުކުރާ ދީންދެކެ ލޯބިވާ ރައްޔިތުން ވިސްނަން އެބަޖެހޭ. އަޅުގަނޑުމެން އިސްކުރަންޖެހޭނީ ގައުމުކަން."
މުއިއްޒު މި މޭރުމުން ވާހަކަދައްކަވާފައި މި ވަނީ އިދިކޮޅު އެމްޑީޕީ އާއި ޕީއެންއެފްއިން ސިލްސިލާ މުޒާހަރާތަކެއް ކުރަމުންދާ ދަނޑިވަޅެއްގަ އެވެ. އެ މުޒާހަރާތަކުގައި ރާއްޖޭގެ އެކި ކައުންސިލްތަކަށް އިންތިހާބުވި ބައެއް ބޭފުޅުންނާއި ޑަބްލިއުޑީސީތަކަށް އިންތިހާބުވި ބައެއް ބޭފުޅުން ބައިވެރިވެ އެވެ.
އެމްޑީޕީން މުޒާހަރާ ކުރަމުން ދަނީ ސަރުކާރަށް 12 ޑިމާންޑެއް ކުރުމަށްފަހު އެވެ. ނަމަވެސް، އެއިން އެއްވެސް ޑިމާންޑަކަށް ސަރުކާރުން މިހައިތަނަށް އިޖާބަދީފައެއް ނުވެ އެވެ.
