މާލޭގެ މަޖީދީމަގުގައި ހުންނަ ނަލަހިޔާ ރެޒިޑެންސް އިން ހަތަރު މިލިއަން ރުފިޔާ ވަގަށް ނެގި މައްސަލައިގައި އިތުރު މީހަކު ހައްޔަރުކޮށްފި އެވެ.
ފުލުހުން ބުނީ މި މައްސަލައާ ގުޅިގެން ހައްޔަރުކުރީ ހދ. ނޮޅިވަރަންފަރު، ޖަޒީލާމަންޒިލް، ޖަޒީލު މުހައްމަދު، 47، އެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހަށް ބަންދުކުރުމަށް ވަނީ އަމުރުކޮށްފަ އެވެ.
ޖަޒީލު މުހައްމަދު ހައްޔަރުކުރުމުގެ ކުރިން މައްސަލައިގައި އިތުރު ހަތަރު މީހަކު ހައްޔަރުކުރި އެވެ. އެއީ ޅ. ނައިފަރު، މުހައްމަދު ނޫރު އަހްމަދު އާއި ސ. މީދޫ، މުހައްމަދު އަފްރާހް އާއި ރ. މަޑުއްވަރި، އިސްމާއިލް އާސިފް އަދި މ. އޭސިއާ، އަހްމަދު ފާރިސް އެވެ.
މި މައްސަލައާ ގުޅިގެން ހައްޔަރުކުރި އިސްމާއިލް އާސިފްއަކީ ލަނޑާ ނަގާ ދޯންޏެއްގެ ތެރޭގައި 2019 ގައި ރ. މަޑުއްވަރީ، ފެހިއަލި، އިސްމާއިލް ހައްމާދުއާ ދެމެދު އުފެދުނު ދެބަސްވުމެއްގައި ހައްމާދަށް ވަޅިން ހަމަލާދީ މޫދަށް އެއްލައިލި މައްސަލާގައި 10 އަހަރަށް ޖަލަށް ލާން ސެޕްޓެމްބަރު 2022 ގައި ކްރިމިނަލް ކޯޓުން ހުކުމްކޮށްފައިވާ މީހެކެވެ.
އެ މައްސަލައިގައި އޭނާ ބަންދުގައި ހުއްޓާ، މިނިވަން ކޮށްފައި ވަނީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހު ދުވަސްކޮޅު ސެޕްޓެމްބަރު 19. 2023، ގަ އެވެ.
މި ވައްކަމުގައި ޖުމްލަ ހަތަރު މިލިއަން ރުފިޔާ ވަގަށް ނަގާފައިވާއިރު، މިހާތަނަށް ހޯދުނީ 50،000ރ. ކަމަށް ފުލުހުން ބުންޏެވެ. މައްސަލައާ ގުޅިގެން ހައްޔަރުކުރި ފަސް މީހުންވެސް މިވަގުތު ތިބީ ބަންދުގަ އެވެ.
ފުލުހުން ބުނި ގޮތުގައި މި މައްސަލައިގެ ތަހުގީގުގެ ބޮޑު ބައެއް މިހާރު ވަނީ ނިމިފަ އެވެ. އަދި ތަހުގީގު މަރުހަލާ މުޅިން ފުރިހަމަކޮށް، މި މީހުންގެ މައްޗަށް ޖިނާއީ ދައުވާ އުފުލުމަށްޓަކައި ޕީޖީއަށް ފޮނުވުމުގެ އެންމެ ފަހުގެ މަސައްކަތްތައް ކުރަމުންދާ ކަމަށްވެސް ފުލުހުން ބުންޏެވެ.
