މި އޭޕްރީލް 4، ގައި ބޭއްވި ލޯކަލް ކައުންސިލްތަކުގެ އިންތިހާބުގައި އިދިކޮޅު އެމްޑީޕީއަށް ގިނަ ގޮނޑި ލިބުނުއިރު، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ގިނަ ގޮނޑި ލިބުނީ ވެރިކަން ކުރާ ޕީއެންސީއަށް ކަން ހިސާބުތަކުން ދައްކައިފި އެވެ.
އިލެކްޝަންސް ކޮމިޝަނުން މިއަދު އާންމު ހިސާބުތަކުން ދައްކާ ގޮތުގައި އެމްޑީޕީ އިން 289 ގޮނޑި ކާމިޔާބު ކުރި އެވެ. ޕީއެންސީއަށް ލިބުނީ 280 ގޮނޑި އެވެ. އަދި އަމިއްލަ ގޮތުން ވާދަ ކުރި ކެންޑިޑޭޓުން 91 ގޮނޑި ކާމިޔާބު ކުރި އެވެ.
އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ 304 ގޮނޑި ޕީއެންސީ އިން ކާމިޔާބު ކުރިއިރު އެމްޑީޕީއަށް އެ އިންތިހާބުގައި ހޯދުނީ 274 ގޮނޑި އެވެ. އަދި އަމިއްލަ ގޮތުން ވާދަ ކުރި 78 ކެންޑިޑޭޓަކު ވެސް އިންތިހާބު ކާމިޔާބު ކުރި އެވެ.
ރާއްޖޭގެ ފަސް ސިޓީގެ މޭޔަރުގެ މަގާމު ވެސް ލިބުނީ އެމްޑީޕީއަށެވެ. އަދި ކައުންސިލްތަކުގެ 41 ގޮނޑި އެ ޕާޓީ އިން ހޯދި އެވެ. ސިޓީތަކުން ޕީއެންސީއަށް ހޯދުނީ އެންމެ ފަސް ގޮނޑި އެވެ.
އިލެކްޝަންސް ކޮމިޝަނުން އިންތިހާބުގެ ބައެއް ތަފާސްހިސާބު ނެރެފައި މި ވަނީ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުތަކުން މޮޅުވީ ޕީއެންސީ ކަމަށް ދައްކަން އެ ޕާޓީ އިން މަސައްކަތް ކުރަމުން ދަނިކޮށެވެ.
އިންތިހާބުން މޮޅުވީ ޕީއެންސީ ކަމަށް އެ ޕާޓީން ބުނަނީ، ދެ އިންތިހާބުން ލިބުނު ގޮނޑިތައް އެކީ ގުނައިގެންނެވެ. އެފަދަ މޭރުމަކުން ރައީސް މުހައްމަދު މުއިއްޒު ވެސް ރޭ ވާހަކަ ދެއްކެވި އެވެ.
"މުޅި ރާއްޖޭގެ މި އިންތިހާބަށް ބަލާއިރުގަ ހަގީގަތުގަ ޖުމްލަކޮށް ބަލާއިރުގަ ކޮންމެ ކޮންމެ ކަހަލަ ކެންޑިޑޭޓެއް ނަމަވެސް މިދެންނެވީ ކައުންސިލްކަމުގަ ވިޔަސް، ކައުންސިލް މެމްބަރުން ވިޔަސް، ކައުންސިލްތަކުގެ ރައީސުން ކަމުގައި ވިޔަސް، ޑަބްލިއުޑީސީ މެމްބަރުން ކަމުގައި ވިޔަސް އަދި ޑަބްލިއުޑީސީ ރައީސުން ކަމުގައި ވިޔަސް މިކޮންމެ ހަތަރު ދާއިރާއިން މި ކޮންމެ ދާއިރާއަކުން ވެސް އިރާދަކުރެއްވީތީ މި މުޅި ރާއްޖޭން އަޅުގަނޑުމެންނަށް ވަނީ ގިނަ ގޮނޑިތައް ލިބިފައި،" އެމަނިކުފާނު ވިދާޅުވި އެވެ.
