އެމަނިކުފާނުގެ ސިޔާސީ ޕާޓީ ޕީޕަލްސް ނެޝަނަލް ކޮންގްރެސްއަށް ވޯޓު ނުދިނީ ދީން އިސްނުކުރާ މީހުން ކަމަށް ސިފަވާ ގޮތަށް ރައީސް މުހައްމަދު މުއިއްޒު ރޭ ވާހަކަ ދައްކަވައިފި އެވެ.
އޭޕްރީލް 4، ގައި ބޭއްވި ދެ އިންތިހާބާއި ފެންނަ ނުފެންނަ ވޯޓަށްފަހު ފުރަތަމަ ފަހަރަށް ރޭ ރައްޔިތުންނާ މުހާތަބުކޮށް މުއިއްޒު ވިދާޅުވީ، ރާއްޖޭގެ މެޖޯރިޓީ މީހުން ވޯޓު ދިނީ ޕީއެންސީއަށް ކަމަށާއި އެއީ ދީން އިސްކުރަން ބޭނުންވި ރައްޔިތުން ކަމަށެވެ.
"ދަންނަވަން ޖެހޭނީ މި އިންތިހާބުގެ ނަތީޖާ ބަލާއިރުގައި މި ރާއްޖޭގެ މެޖޯރިޓީގެ ރައްޔިތުން، މެޖޯރިޓީ ރައްޔިތުންގެ ވިސްނުން އިރާދަކުރެއްވީތީ ހުރީ، ގައުމު އިސްކުރުމުގެ ވިސްނުމުގަކަން. ދީން އިސްކުރުމުގެ ވިސްނުމުގައި ކަން،" މުއިއްޒު ވިދާޅުވި އެވެ.
ޕީއެންސީގެ ފިކުރަކީ "ދީނީ، ގައުމީ" ފިކުރު ކަމަށް ވެސް މުއިއްޒު ރޭ ވިދާޅުވި އެވެ.
"ހުރިހާ ގޮތަކުން ބެލި ނަމަވެސް ޑަބްލިޔޫޑީސީތަކުގެ ރައީސުންނާ، އާންމު މެންބަރުން ކަމުގައި ވިޔަސް، ކައުންސިލްތަކުގެ ރައީސުންނާ އާންމު މެންބަރުން ކަމުގައި ވިޔަސް، ހުރިހާ އިންތިހާބަކުން ރާއްޖޭގެ މެޖޯރިޓީ މިއޮތީ މި ފިކުރަށް ތާއީދުކޮށް، ދީނީ ގައުމީ ފިކުރަށް ތާއީދުކޮށް ޕީއެންސީ އަށް މެޖޯރިޓީ ދެއްވާފައި،" އެމަނިކުފާނު ވިދާޅުވި އެވެ.
ރައްޔިތުން ވޯޓު ދީގެން ހޮވި ކެންޑިޑޭޓުން "ދީނީ މިންގަނޑުން" ބޭރުވަމުންދާ ކަމަށް ވިދާޅުވެ، އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ކެންޑިޑޭޓުންނާއި އެ ކެންޑިޑޭޓުންނަށް ވޯޓު ދިން މީހުންނަށް ވެސް މުއިއްޒު ރޭ ފާޑުވިދާޅުވި އެވެ.
"މިފެނިގެންދަނީ މި ހޮވިފައިތިބި އިންތިޚާބީ ކެންޑިޑޭޓުން މުޒާހަރާކުރަމުންދާތަން. މަގުމަތީ ހަލަބޮލިކުރަމުންދާތަން. ހަޑިހުތުރު ބަސްތައް ބޭނުންކުރަމުންދާތަން. ދީނީ މިންގަނޑުން ބޭރު ވަރަށް އަހްލާގީ ފެންވަރު ދަށް އަމަލުތައް ހިންގަމުންދާތަން މިހޮވުނު ކެންޑިޑޭޓުން. އެއީ ހަމަ އަޅުގަނޑުމެންގެ ރައްޔިތުން ވޯޓުލައިގެން ހޮވުނު މީހުން،" ރައީސް ވިދާޅުވި އެވެ.
ލޯކަލް ކައުންސިލްތަކުގެ އިންތިހާބުގައި ރާއްޖޭގެ ފަސް ސިޓީގެ މޭޔަރުގެ މަގާމާއި ހުރިހާ ސިޓީ ކައުންސިލެއްގެ މެޖޯރިޓީ ލިބުނީ އެމްޑީޕީއަށެވެ. އަދި ގިނަ ރަށު ކައުންސިލްތަކުގެ މެޖޯރިޓީ ވެސް ލިބުނީ އެމްޑީޕީއަށެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ފެންނަ ނުފެންނަ ވޯޓުގައި 216،539 މީހުން ވޯޓު ދިނެވެ. އެއީ ވޯޓު ދިނުމުގެ ހައްގު ލިބޭ މީހުންގެ 74.9 ޕަސެންޓު މީހުންނެވެ.
އޭގެ ތެރެއިން 148،859 މީހުން ވޯޓު ދިނީ ދެ އިންތިހާބު އެއްކޮށްލަން ނުފެންނަ ކަމަށެވެ. އެއީ ވޯޓު ދިން މީހުންގެ 68.7 ޕަސެންޓު މީހުންނެވެ. އެއީ މިދިޔަ ރިޔާސީ އިންތިހާބުގައި މުއިއްޒަށް ލިބުނު ވޯޓަށްވުރެ ވެސް ގިނަ އަދަދެކެވެ.
