އިދިކޮޅު ޕީޕަލްސް ނެޝަނަލް ފްރަންޓުން ކުރަމުންދާ މުޒާހަރާގެ ތެރެއިން މަގުމަތީގައި ބޭންދި ސޯފާއެއް ފުލުހުން ކުޑަ ވަގުތު ކޮޅަކަށް ގެންގޮސްފި އެވެ.
ޕީއެންއެފް އިން މުޒާހަރާ ކުރަމުންދަނީ މަޖީދީ މަގު ކޮޅުގައި އާޓިފިޝަލް ބީޗު ކުރިމަތީގަ އެވެ. މުޒާހަރާގެ ބައިވެރިން ވަނީ އެތަނުގައި ރަތް ކުލައިގެ ބޮޑު ސޯފާއެއް ބައިންދައިފަ އެވެ.
މުޒާހަރާގެ ބައެއް ބައިވެރިން އެ ސޯފާގައި އިށީންދެގެން ތިއްބާ އެ ފަރުނީޗަރު ގެންދިޔައީ ފުލުހުންގެ 11 މީހަކު އައިސްގެންނެވެ. ސޯފާގައި ތިބި މީހުން ގަދަކަމުން ނަގައި އެ ސޯފާ ފުލުހުން އެރުވީ ފުލުހުންގެ ވެހިކަލަކަށެވެ.
ފުލުހުން ސޯފާ ގެންދިޔުމުން ޕީއެންއެފްގެ ވަކީލުން ވަނީ ސޯފާ އަނބުރާ ހޯދުމުގެ މަސައްކަތް ވަގުތުން ފަށައިފަ އެވެ. އަދި މަދު ވަގުތުކޮޅެއްގެ ތެރޭގައި ފުލުހުން ވަނީ ޓޯޔާޑުން އެ ސޯފާ ދޫކޮށް، ޕީއެންއެފްއާ އަނބުރާ ހަވާލުކޮށްފަ އެވެ.
ކުރީގެ ރައީސް އަބްދުﷲ ޔާމީންގެ ޕީއެންއެފް އިން މިރޭ މުޒާހަރާ ކުރާއިރު، އިދިކޮޅު އެމްޑީޕީ އިން ވެސް ދަނީ ވެރި ރަށް މާލޭގައި މިރޭ މުޒާހަރާ ކުރަމުންނެވެ. މިއީ އިދިކޮޅު ޕާޓީތަކުން ސިލްސިލާކޮށް މުޒާހަރާ ކުރާ ފަސް ވަނަ ރެ އެވެ.
އެމްޑީޕީ އާއި ޕީއެންއެފް އިން ސަރުކާރާ ދެކޮޅަށް މުޒާހަރާ ކުރަން ފެށީ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުން ސަރުކާރަށް ލިބުނު ބޮޑު ނާކާމިޔާބީއަށްފަހު އެވެ.
އެމްޑީޕީ އާއި ޕީއެންއެފް އިން ބުނަނީ ރައީސް މުހައްމަދު މުއިއްޒު އިސްތިއުފާ ދެއްވައި، އިންތިގާލީ ވެރިކަމެއް ރާއްޖޭގައި ގާއިމް ކުރަންޖެހޭ ކަމަށެވެ.
