11 އަހަރުގެ ކުޑަ އަންހެން ކުއްޖަކާއެކު ޖިންސީ އަމަލު ހިންގި މީހަކު 16 އަހަރަށް ޖަލަށް ލުމަށް މިދިޔަ ބުދަ ދުވަހު ހުކުމްކޮށްފި އެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުން ދައުވާކުރި މި މައްސަލައިގައި ޖަލަށްލުމަށް ހުކުމްކުރީ މ. މުނިޔާގެ، މުހައްމަދު އަނިލް، 47 އެވެ.
ކޯޓުން ހުކުމްކުރީ މުހައްމަދު އަނިލް 16 އަހަރަށް ޖަލަށްލުމަށް ކަނޑައަޅައި، ދައުވާއާ ގުޅިގެން ބަންދުގައި ހުރި ހަތަރު މަހާއި 19 ދުވަސް ހުކުމުގެ މުއްދަތުން އުނިކޮށް، އޭނާ ތަންފީޒުކުރަންޖެހޭ އަދަބަކީ 15 އަހަރާއި ހަތް މަހާއި 11 ދުވަސް ކަމަށެވެ.
މި މައްސަލައަކީ ކުޑަކުދިންނަށް ޖިންސީ ގޯނާކުރުމުގެ މައްސަލަތައް ހުއްޓުވައި އެފަދަ މައްސަލަތައް ތަހުގީގުކޮށް، ކުށްވެރިން އިންސާފުގެ ކުރިމައްޗަށް ގެނައުމަށް ކުރަމުންދާ މަސައްކަތުގެ ތެރެއިން ކުރެވުނު ކާމިޔާބު މަސައްކަތެއް ކަމަށް ފުލުހުން ބުންޏެވެ.
ކުޑަކުދިންނަށް ރައްކާތެރި މާހައުލެއް ގާއިމުކޮށްދިނުމަށާއި ކުޑަކުދިންނަށް ޖިންސީގޯނާކޮށް، އިހުމާލުވާ ފަރާތްތަކުގެ މައްސަލަ ތަހުގީގުކޮށް މިފަދަ ކުށްތަކުން ކުޑަކުދިން ރައްކާތެރިކުރުމަށް ކުރަންޖެހޭ މަސައްކަތްތައް ފަސްޖެހުމެއްނެތި ފުލުހުންގެ ކުރަމުން ގެންދާނެކަމުގެ ޔަގީންކަން އެ މުއައްސަސާއިން ވަނީ ދީފަ އެވެ.
