މިދިޔަ އޭޕްރީލް 4، ގައި ބޭއްވި ލޯކަލް ކައުންސިލް އިންތިހާބުން ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ބަލިވި ނަމަވެސް، އއ. ތޮއްޑޫ އާއި އއ. ރަސްދޫ ކައުންސިލުގެ މެޖޯރިޓީ އެ ޕާޓީއަށް ލިބުން ފާހަގަ ކުރަން ހަވާއަރުވައިފި އެވެ.
ތޮއްޑޫ ދާއިރާގައި ހިމެނޭ އއ. ތޮއްޑޫ އާއި އއ. ރަސްދޫ އަދި އއ. އުކުޅަސް އިން ޕީއެންސީއަށް ގިނަ ގޮނޑި ލިބުމާ ގުޅިގެން އުފާފާޅުކުރުމަށް ހަވާ އެރުވީ ރަސްދޫގައި ޕީއެންސީން ބޭއްވި ޖަލްސާ ނިންމާލުމަށްފަހު އެވެ.
މި ޖަލްސާގައި މުހައްމަދު މުއިއްޒު ވަނީ މުޅި ރާއްޖެއިން ލޯކަލް ކައުންސިލް އިންތިހާބުގައި ޕީއެންސީއަށް ގިނަ ގޮނޑިތައް ލިބިފައިވާ ކަމަށް ސިފަކުރައްވާފަ އެވެ. ނަމަވެސް ކައުންސިލް އިންތިހާބުގައި ޕީއެންސީއަށްވުރެ ގިނަ ގޮނޑި ލިބިފައިވަނީ އެމްޑީޕީއަށެވެ.
މުއިއްޒު ވިދާޅުވީ ރަސްދޫ އާއި ތޮއްޑޫ ދާއިރާގެ ތިން ރަށުން ވެސް ލިބިގެންދިޔައީ ވަރަށް ތާރީހީ ވަރަށް ތާރީހީ ވަރުގަދަ ކާމިޔާބެއް ގޮތުގައި ސިފަކުރައްވާފަ އެވެ. ތޮއްޑޫ ދާއިރާގެ މެޖޯރިޓީ ކުރިން ހޯދަމުންދިޔައީ އިދިކޮޅު އެމްޑީޕީންނެވެ.
"މި މުޅި ރާއްޖޭން އަޅުގަނޑުމެންނަށް ވަނީ ގިނަ ގޮނޑިތައް ލިބިފައި އަދި ނުލިބިދިޔަ ވަރަށް ގިނަ ގޮނޑިތައްވެސް އެބަހުރި. އެހެންވީމާ ކާމިޔާބީ ގިނައީ. ވަރަށް ބޮޑެތި ކާމިޔާބީތައް ހާއްސަކޮށް މި ދާއިރާ ކަހަލަ ދާއިރަތަކުން ލިބިގެން ގޮސްފައިވަނީ،" މުއިއްޒު ވިދާޅުވި އެވެ.
ކައުންސިލް އިންތިހާބުގައި ރާއްޖޭގެ ފަސް ސިޓީން ޕީއެންސީ ވަނީ ބޮޑު ނާކާމިޔާބީއަކާ ކުރިމަތިލާފަ އެވެ. އެގޮތުން ސިޓީ ކައުންސިލްތަކުގެ 52 ގޮނޑީގެ ތެރެއިން 46 ގޮނޑި އެމްޑީޕީއަށް ލިބުނުއިރު، ޕީއެންސީއަށް ލިބުނީ އެންމެ ހަ ގޮނޑި އެވެ. ސިޓީތަކުގެ ޖުމްލަ ވޯޓު ވެސް އެންމެ ގިނައިން ލިބިފައިވަނީ އެމްޑީޕީއަށެވެ.
ނަމަވެސް އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ގިނަ ގޮނޑިތައް ލިބުނީ ޕީއެންސީއަށެވެ.
މީގެއިތުރުން ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ސަރުކާރުން ހުށަހެޅި ހުށަހެޅުމާ ގުޅިގެން ނެގި ފެންނަ ނުފެންނަ ވޯޓުގައި ރައްޔިތުން ވަނީ ސަރުކާރަށް ބޮޑުތަނުން ނޫނެކޭ ބުނެފަ އެވެ. އެ އިންތިހާބުގައި 148،859 މީހުން ނޫނެކޭ ބުނެފައިވާއިރު، އާނއެކޭ ބުނީ 67،680 މީހުންނެވެ.
