ޕެންޝަން ފަންޑުގައި ކުރިން ތިބި ބޯޑު މެންބަރުންނާއި އިސް މުވައްޒަފުންނާއި ފަންނީ މާހިރުންނާއި އިދިކޮޅު ސިޔާސީ މީހުންނާއި އާންމުންގެ ހުރި ކަންބޮޑުވުންތަކަށް ބެލުމެއް ނެތި، ޕެންޝަން ފަންޑުން ގަނެފައިވާ 2.4 ބިލިއަން ރުފިޔާ ޓީބިލު ދިގުމުއްދަތުގެ ބޮންޑަކަށް ބަދަލުކުރުމުގެ މުއަމަލާތް ކުރިއަށް ގެންގޮސް، އެ ފައިސާ މިއަދު ޗާޕުކޮށްފި އެވެ.
ޓީބިލު ބޮންޑަށް ބަދަލުކުރުމުގެ މުއާމަލާތް ފުރިހަމަ ކުރި ކަމަށް މި މުއާމަލާތުގައި ހިމެނޭ ތިން ފަރާތް ކަމުގައިވާ ފިނޭންސް މިނިސްޓްރީ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ޕެންޝަން އޮފީހުން ރަސްމީކޮށް ނުބުނެ އެވެ. މިހެން ނަމަވެސް އިތުބާރު ހުރި މަސްދަރުތަކުން އަދަދު އަށް ކަށަވަރުކޮށްދީފައިވާ ގޮތުގައި މިއަދު ހުރިހާ ކަމެއް ފުރިހަމަ ކުރުމަށް ފަހު، ހަވީރު ވުމުގެ ކުރިން މި ފައިސާ ވަނީ ސަރުކާރަށް ލިބިފަ އެވެ.
ސަރުކާރުގެ ހަރަދުތައް ހަމަޖެއްސުމުގެ ގޮތުން އެމްއެމްއޭއިން ދަރަންޏަށް ފައިސާ ނުނެގޭތީ ޕެންޝަން އޮފީސް މެދުވެރިކޮށްގެން އިންވެސްޓުކުރި ފައިސާއަކީ ގިނަ މާހިރުން ގަބޫލުކުރާ ގޮތުގައި ގާނޫނުގައި ހުރި ބާގަނޑުތަކުގެ ބޭނުންކޮށްގެން ފައިސާ ޗާޕުކުރުމެވެ. ސަބަބެއް ކަމަށް އެ މީހުން ބުނަނީ ސީދާ އެމްއެމްއޭއިން ފައިސާ ނަގައިގެން ބޭނުންކުރުމާއި، އެމްއެމްއޭއިން ޕެންޝަން އޮފީހަށް ފައިސާ ދިނުމަށް ފަހު އެ ފައިސާ ސަރުކާރުން ބޭނުންކުރުމުގެ އިގުތިސޯދީ ނަތީޖާ އެއްގޮތް ވުމެވެ.
އެކަމަކު މި މުއާމަލާތް ހިންގަން އުޅޭ ކަމުގެ މައުލޫމާތު މިދިޔަ އަހަރުގެ އޮކްޓޫބަރުގައި ލިބުނީއްސުރެން ފެށިގެން މިއަދާ ހަމައަށް ސަރުކާރުން ހިފަހައްޓަމުން އަންނަނީ މިއީ ފައިސާ ޗާޕުކުރުން ނޫން ކަަމަށެވެ. އެއާ ހިލާފަށް، ސަރުކާރާއި ޕެންޝަން އޮފީހުން ވެސް މަސައްކަތް ކުރީ މިއީ ޕެންޝަން ފަންޑަށް ފައިދާ ހުރި އިންވެސްޓުމަންޓެއް ކަމަށް ވިސްނައިދޭށެވެ.
ޕެންޝަން ފަންޑުގެ ޓީބިލު ބޮންޑަށް ބަދަލުކުރުމުގެ މުއާމަލާތުގެ ޓައިމްލައިން
- އޮކްޓޫބަރު 16، 2025 - ބޮންޑު މުއާމަލާތް ހިންގަން އުޅޭ ކަމުގެ މައުލޫމާތު ލިބުން
- އޮކްޓޫބަރު 20، 2025 - ފައިސާ ޗާޕުކުރުން ނޫން ކަމަށް ސަރުކާރުން ބުނުން
- އޮކްޓޫބަރު 22، 2025 - ޕެންޝަން އޮފީހުގެ ބޯޑުން ސަރުވަޝް އިސްތިއުފާ ދެއްވުން
- ނޮވެމްބަރު 4، 2025 - ޕެންޝަން އޮފީހުގެ ސީއެފްއޯ ފަޖުވާ އިސްތިއުފާ ދެއްވުން
- ނޮވެމްބަރު 11، 2025 - ޕެންޝަން އޮފީހުގެ ޓީބިލުތައް ސެކަންޑްރީ މާކެޓުގައި ލިސްޓު ކުރުން
- ޑިސެމްބަރު 10، 2025 - ޕެންޝަން އޮފީހުގެ ބޯޑުން އަޝްރަފް އިސްތިއުފާ ދެއްވުން
- ފެބްރުއަރީ 1، 2026 - ޕެންޝަން އޮފީހުގެ ޗެއާމަން އިނާޒް އިސްތިއުފާ ދެއްވުން
- ފެބްރުއަރީ 3، 2026 - ބޮންޑު މުއާމަލާތަށް ޕެންޝަން އޮފީހުގެ ބޯޑުން ފާސްކުރުން
- ފެބްރުއަރީ 4، 2026 - ޕެންޝަން އޮފީހުގެ ސީއީއޯ ސުޖާތާ އިސްތިއުފާ ދެއްވުން
- ފެބްރުއަރީ 5، 2026 - ޕެންޝަން އޮފީހުގެ ބޯޑުން މާދިން އިސްތިއުފާ ދެއްވުން
- މެއި 23، 2026 - ޕެންޝަން އޮފީހުގެ ޗެއާމަނަކަށް މަޖީދު އައްޔަން ކުރެއްވުން
- ޖުލައި 23، 2026 - ބޮންޑަށް އިންވެސްޓުކޮށް ފައިސާ ޗާޕުކޮށް ނިންމުން
އެ ގޮތުން ބޮންޑު މުއާމަލާތައިގެން ކުރިއަށް ދާން ޕެންޝަން އޮފީހުގެ ބޯޑުން ފާސްކުރުމަށް ފަހު ނެރުނު ނޫސް ބަޔާނެއްގައި އެ އޮފީހުން ބުނީ މިއީ ފަންޑުގެ ކުރިމަގަށާއި ދެމެހެއްޓިނިވި ކަމަށް ފަހިކޮށްދޭ އިންވެސްޓްމަންޓެއް ކަމަށެވެ. އަދި މީގެ ސަބަބުން ފަންޑުގެ ޕޯޓުފޯލިއޯ ޑައިވާސިފައިވެ، ފަންޑަށް ޑޮލަރު ވަންނަން ފަށާނެ ކަމަށް އެ ބަޔާނުގައި ބުންޏެވެ.
ނަމަވެސް މި މައްސަލައިގައި ޕެންޝަން އޮފީހުގެ ބޯޑުން އިސްތިއުފާ ދިން ގިނަ ބަޔަކު ހިމެނޭހެން ބުނަނީ މިއީ ލިބޭ ފައިދާއަށް ވުރެ ގެއްލުން ބޮޑު މުއާމަލާތެއް ކަމަށެވެ. މިކަމާ ދެކޮޅު ހަދާ މީހުން ބުނަނީ މި މުއާމަލާތުން ލިބޭ ފައިސާއިން ސަރުކާރުން މުސާރަތައްދީ ބިލުތައް ދެއްކުމުން އިގުތިސޯދުގައި ރުފިޔާ އިތުރުވެ، ޑޮލަރަށް އޮންނަ ޕްރެޝަރު އުފުލި، ތަކެތީގެ އަގު އުފުލޭނެ ކަމަށެވެ.
މީގެ އެންމެ ގޯސް ނަތީޖާއަކަށް ވާނީ، ތަކެތީގެ އަގު އުފުލި މި އިންވެސްޓްމަންޓާ އެކީ ފަންޑަށް ލިބޭނެ ކަމަށް އަންދާޒާ ކުރާ ފައިދާގެ އަގު އެއްކޮށް ފުހެވުމެވެ.
