ޕެންޝަން އޮފީސް މެދުވެރިކޮށް ސަރުކާރުން ފައިސާ ޗާޕު ކުރަން އުޅޭ މައްސަލައިގައި އެ އޮފީހުގެ ބޯޑުގައި ހިމެނޭ އިތުރު މެންބަރަކު މިއަދު އިސްތިއުފާ ދީފި އެވެ.
މިއަދު އިސްތިއުފާ ދެއްވީ ޕެންޝަން ބޯޑުގައި ފިނޭންސް މިނިސްޓްރީ ތަމްސީލު ކުރުމަށް މި ސަރުކާރުން ޖޫން 2، 2024، ގައި އައްޔަން ކުރި މެންބަރު އަޝްރަފް ރަޝީދެެވެ. އޭނާ އިސްތިއުފާ ދެއްވިކަން މި ނޫހަށް ވަނީ ކަށަވަރުވެފަ އެވެ.
އަޝްރަފު އަކީ ފިނޭންސް މިނިސްޓްރީގެ ލީގަލް ޑިޕާޓްމެންޓުގެ އެންމެ އިސް ވެރިޔާ އެވެ.
އަޝްރަފް އިސްތިއުފާ ދެއްވިއިރު ޕެންޝަން ބޯޑުގެ ބައްދަލުވުމެއް މިއަދު ވަނީ ބާއްވައިފަ އެވެ. ފައިސާ ޗާޕު ކުރުމާ ގުޅޭ މަޝްވަރާތަކެއް އެ ބައްދަލުވުމުގައި ކުރިއަށްދިޔަކަން އެނގިފައިވެ އެވެ.
ފައިސާ ޗާޕު ކުރަން އުޅޭތީ އަޝްރަފްގެ އިތުރުން މެންބަރު އަހުމަދު ސަރުވަޝް އާދަމް ވެސް ވަނީ އިސްތިއުފާ ދެއްވައިފަ އެވެ. އޭނާ އިސްތިއުފާ ދެއްވީ އޮކްޓޯބަރު 22، ގަ އެވެ.
އަޝްރަފް އާއި ސަރުވަޝްގެ އިތުރުން ޕެންޝަން އޮފީހުގެ ޗީފް ފައިނޭންޝަލް އޮފިސަރު ހައްވާ ފަޖުވާ ވެސް ވަނީ އިސްތިއުފާ ދެއްވައިފަ އެވެ. އޭނާ އިސްތިއުފާ ދެއްވީ ފައިސާ ޗާޕު ކުރުމުގެ މުއާމަލާތް ކުރިއަށްގެންދަން ބޭނުންވާ ލިޔުމެއްގައި ސޮއި ކުރަން ދެކޮޅު ހެދުމަށްފަހު އެވެ. އޭނާގެ އިތުރުން އެހެން މުވައްޒަފުން ވެސް ދަނީ އެ ލިޔުމުގައި ސޮއި ކުރަން ދެކޮޅު ހަދަމުންނެވެ.
ސަރުކާރުން މަސައްކަތް ކުރަނީީ 2.3 ބިލިއަން ރުފިޔާ ޗާޕު ކުރާށެވެ. އެކަން ކުރަން އުޅޭ ގޮތަކީ، ޕެންޝަން އޮފީހުން ސަރުކާރުގެ ބޮންޑުތަކަކަށް އިންވެސްޓުކޮށްގެންނެވެ. އެ އިޖުރާއަތްތައް ކުރިއަށްގެންދާ ގޮތުން އިގްތިސާދުގައި ދައުރުވާ ފައިސާ އިތުރުވާނެ އެވެ.
