ރާއްޖޭގެ ބާޒާރުގައި ކެރެޓުގެ އަގު އާދަޔާއިހިލާފަށް އުފުލެން މެދުވެރިވި ސަބަބު ދެނެގަނެވި އެކަން ހައްލު ކުރެވިފައިވާ ކަމަށާއި މިއަދަށްފަހު، ބާޒާރުގައި އަގުބޮޑުކޮށް ކެރެޓު ނުވިއްކާނެކަމަށް އުއްމީދުކުރައްވާ ކަމަށް އިކޮނޮމިކް މިނިސްޓަރު، މުހައްމަދު ސައީދު ވިދާޅުވެއްޖެ އެވެ.
އެކްސްގައި ސައީދުކުރެއްވި ޕޯސްޓެއްގައި ވިދާޅުވީ ކެރެޓުގެ އަގުބޮޑުވީ ސަޕްލައި ކުރުމުގައި ދިމާވި މައްސަލައަކުން ކަމަށެވެ. ނަމަވެސް، ކެރެޓުގެ އަގޮބޮޑުވިއިރު، ވެސް އެސްޓީއޯއިން އަގުހެޔޮކޮށް ކެރެޓު ލިބެންހުރި ކަމަށް އޭނާ ވިދާޅުވި އެވެ.
"އަދި، މިހާރު ސަޕްލައި މައްސަލަ ދިމާވި ކުންފުނިތަކުގެ މުދާވެސް ވަނީ ކުލިއާ ކުރެވިފައިކަމަށް ބެލި ބެލުމުން އެނގުނު، ވީމާ އަގުބޮޑުކޮށް ނުވިއްކާނެކަމަށް އުއްމީދުކުރަން،" ސައީދު ކުރެއްވި ޕޯސްޓުގައި ލިޔުއްވައިފައިވެ އެވެ.
ސައީދު ވިދާޅުވީ މި ވަގުތު ވެސް އެސްޓީއޯއިން ކެރެޓު ކޮންޓޭނަރުތަކެއް ކްލިއާ ކުރަމުންދާ ކަމަށެވެ.
ސައީދު މިހެން ވިދާޅުވިއިރު، މީގެ ކުރިން އާންމުކޮށް 35ރ. އާއި 25ރ. އާ ދެމެދުގެ އަގަކަށް ލިބުނު ކެރެޓު ކިލޯއެއްގެ އަގު ވަނީ 170ރ. އަށް އުފުލިފަ އެވެ.
ބާޒާރުގައި ކެރެޓުގެ އަގު އުފުލުނު ނަމަވެސް، އެސްޓީއޯއިން ކެރެޓު ކިލޯއެއް ވިއްކަމުން ދަނީ 40ރ. އަށެވެ.
ސައީދު ވިދާޅުވި ގޮތުންނަމަ، މާދަމާއިން ފެށިގެން ކެރެޓު އަގު ބާޒާރުގައި ވެސް ހެޔޮވާނެކަމަށް ބެލެވެ އެވެ.








