ޕެންޝަން ފަންޑުން 2.4 ބިލިއަން ރުފިޔާގެ އިންވެސްޓުމަންޓު މުއާމަލާތެއް ހިންގަން އުޅޭ ވަގުތެއްގައި، އެ އޮފީހުގެ ހެޑް އޮފް އިންވެސްޓުމަންޓުގެ މަގާމުގައި ހުރި ހައިފާ އަހުމަދު މިއަދު އިސްތިއުފާ ދެއްވައިފި އެވެ.
އަަދަދު ނޫހަށް ކަށަވަރުވެފައިވާ ގޮތުގައި ހައިފާއާ އެކީ ޕެންޝަން އޮފީހުގެ މެނޭޖުމަންޓު ލެވަލްގައި މަސައްކަތް ކުރާ އެހެން މުވައްޒަފަކު ވެސް ވަނީ އިސްތިއުފާ ދީފަ އެވެ. ނަމަވެސް އެއީ ކާކުކަން އަދި ކަށަވަރެއް ނުވެ އެވެ.
މި ދެ މުވައްޒަފުން އިސްތިއުފާ ދިން ސީދާ ސަބަބެއް ކަށަވަރުނުވެ އެވެ. ނަމަވެސް މި ނޫހަށް މައުލޫމާތުދޭ މަސްދަރުތަކުން ބުނަނީ ދެ މުވައްޒަފުންގެ އިސްތިއުފާ ވެސް ގުޅެނީ ބޮންޑު ގަތުމުގެ މުއާމާލާތާ އެވެ.
މީގެ ކުރިން އެ އޮފީހުގެ ސީއޯއީ އާއި ސީއެފްއޯ އަދި ޕެންޝަން ބޯޑުގެ ޗެއާމަން އާއި ބޯޑު މެންބަރުންތަކެއް ވަނީ ހަމަ މި މައްސަލައިގައި އިސްތިއުފާ ދީފަ އެވެ.
ޕެންޝަން ފަންޑުގެ އާ ބޯޑާއި ލީޑާޝިޕާއެކީ 2.4 ބިލިއަން ރުފިޔާގެ ބޮންޑު މުއާމަލާތް ހިންގަނީ
ޕެންޝަން ފަންޑުން ގަނެފައިވާ 2.4 ބިލިއަން ރުފިޔާގެ ޓީބިލުތައް ވިއްކާލުމަށްފަހު، ސަރުކާރުން ދޫކުރާ ދިގު މުއްދަތުގެ ޑޮލަރުން ފައިދާ ލިބޭ ބޮންޑަކަށް އިންވެސްޓުކުރުމުގެ ފަހުގެ ތައްޔާރީތައް ދަނީ ވަމުން. މި މުއާމަލާތުގެ ސަބަބުން ޕެންޝަން ފަންޑަށް ބޭރު ފައިސާގެ ރިޒާވެއް އުފެދޭނެ ކަމަށް ބުންޏަށް ގިނަ ބަޔަކު މި މުއާމަލާތާ ދެކޮޅު.
ޕެންޝަން ފަންޑުން މި ބޮންޑު ގަތުމުގެ މުއާމަލާތް ރާވާފައި ވަނީ އެ ފަންޑުން މީގެ ކުރިން ގަނެފައިވާ ދިވެހި ރުފިޔާ ޓީބިލުތަކެއް ސެކަންޑްރީ މާކެޓުގައި ވިއްކާލުމަށް ފަހު އެ ފައިސާ ބޮންޑަށް އިންވެސްޓުކުރާ ގޮތަށެވެ. ސެކަންޑްރީ މާކެޓުގައި މި ބޮންޑު ގަންނަނީ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިންނެވެ.
ޕެންޝަން ފަންޑުން ބުނާ ގޮތުގައި މި މުއާމަލާތަކީ އެ ފަންޑުގެ މަސްލަހަތުވެރިންނަށް ފައިދާވާ ގޮތަށް، ފަންޑުގެ އިންވެސްޓުމަންޓު ސިންދަފާތުކޮށް ފަންޑަށް ޑޮލަރު ވަންނާނެ މަގެކެވެ.
އެކަމަކު މިކަމާ ދެކޮޅު އެންމެން ވެސް ގަބޫލުކުރަނީ މިއީ ކުރު ރާސްތާ އަދި މެދު ރާސްތާގައި ވެސް ޕެންޝަން ފަންޑާއި މުޅި އިގުތިސޯދަށް ވެސް ނުރަނގަޅު އަސަރު ކުރާނެ މުއާމަލާތެކެވެ. އަދި މި މުއާމަލާތަކީ ފައިސާ ޗާޕުކުރުން ކަމަށް އެ އެންމެން ވެސް އިއްތިފާގުވެ އެވެ.
ބޮންޑު މުއާމަލާތުގެ މައްސަލައިގައި ޕެންޝަން އޮފީހުގެ މުވައްޒަފުންގެ ތެރޭގައި ނުތަނަވަސްކަމާއި ކަންބޮޑުވުން ބޮޑުވެފައި ވަނިކޮށް މެނޭޖުމަންޓުން ވަނީ މައުލޫމާތު ދޭ މުވައްޒަފުން ވަޒީފާއިން ވަކިކުރާނެ ކަމުގެ އިންޒާރުދީ މިއަދު މެމޯއެއް ވެސް ނެރެފަ އެވެ.
މީގެ ކުރިން އަދަދު އިން ވާނީ ޕެންޝަން އޮފީހުގެ އާ ބޯޑާއި ލީޑާޝިޕުން މި މުއާމަލާތް ފުރިހަމަކުރުމުގެ ފަހު މަރުހަލާ ފަށާފައިވާ ކަމަށް ރިޕޯޓުކޮށްފަ އެވެ. މައުލޫމާތު ލިބެނީ މިއަދުގެ ވަގުތެއްގައި މި މުއާމަލާތް ފުރިހަމަކުރާނެ ކަމަށެވެ.
