ފައިސާ ޗާޕު ނުކުރާނެ ކަމަށް ވައުދުވެވަޑައިގެން ވެރިކަމަށް ވަޑައިގެންނެވި ރައީސް މުހައްމަދު މުއިއްޒުގެ ސަރުކާރުން، "ވަލުދޮރާށިން" ޖުމްލަ 6.2 ބިލިއަން ރުފިޔާ ޗާޕުކުރަމުންދާ ކަމަށް ކުރީގެ ފިނޭންސް މިނިސްޓަރު އިބްރާހީމް އަމީރު ތުހުމަތު ކުރައްވައިފި އެވެ.
އަމީރު އެކްސް އެކްސްގައި ކުރެއްވި ޕޯސްޓެއްގައި ވިދާޅުވީ، ދައުލަތުގެ ހަރަދަށް ޒިންމާވުމުގެ ގާނޫނުގެ ރޫހާ މުޅިން ހިލާފަށް ސަރުކާރުން ހިންގާ މި މުއާމަލާތުގެ ތެރެއިން އެމްއެމްއޭ އިން ބޭންކުތައް މެދުވެރިކޮށް މިހާތަނަށް 3.8 ބިލިއަން ރުފިޔާ ސަރުކާރަށް ދޫކޮށްފައިވާ ކަމަށެވެ.
ބާކީ 2.4 ބިލިއަން ރުފިޔާއަކީ ޕެންޝަން ފަންޑުން ގަނެފައިވާ ޓީ-ބިލުތަކެއް އެމްއެމްއޭ އިން ގަނެ، އެ ފައިސާ އަނެއްކާ ސަރުކާރުގެ ޓީ-ބިލުގައި އިންވެސްޓްކުރުވައިގެން ގާނޫނީ މެންޑޭޓާ ހިލާފަށް "ޗާޕުކުރާ" ފައިސާ ކަމަށް އަމީރު ސިފަކުރެއްވި އެވެ.
ކޮވިޑް-19 ގެ ވަބާގެ ތެރޭގައި ދައުލަތުގެ އާމްދަނީން 30 ބިލިއަން ރުފިޔާ މަދުވެ، އިގްތިސާދުން 97 ބިލިއަން ރުފިޔާ ގެއްލިގެން ދިޔަ ނާޒުކު ހާލަތުގައި، ފަންނީ ލަފާއެކު ގާނޫނުގެ ހުދޫދުގެ ތެރެއިން ދެފުށް ފެންނަ ގޮތަށް މަނިޓައިޒްކުރި މިންވަރުގެ 78 ޕަސެންޓު މި ސަރުކާރުން ސިއްރުވެރިކަމާއެކު މަނިޓައިޒް ކުރަމުންދަނީ އެއްވެސް އިގުތިސާދީ ނުވަތަ ސިއްހީ ކާރިސާއެއް ނެތި، ދައުލަތުގެ އާމްދަނީ 40 ބިލިއަނަށް އަރާފައިވާ ދަނޑިވަޅެއްގައި ކަމަށްވެސް ކުރީގެ މާލީ ވަޒީރު ފާހަގަކުރެއްވި އެވެ.
2.4 ބިލިއަންގެ މުއާމަލާތުގެ ފަހުގެ ތައްޔާރީތައް
އަމީރު މިފަދަ ތުހުމަތުތަކެއް ކުރައްވާފައިވާއިރު، ޕެންޝަން ފަންޑުން ގަނެފައިވާ 2.4 ބިލިއަން ރުފިޔާގެ ޓީ-ބިލުތައް އެމްއެމްއޭ އަށް ވިއްކާލުމަށްފަހު، އެ ފައިސާ ފިނޭންސް މިނިސްޓްރީން ދޫކުރާ ދިގު މުއްދަތުގެ "ރިވާސް ޑުއަލް ކަރަންސީ ބޮންޑެކަށް" އިންވެސްޓްކުރުމުގެ ފަހުގެ ތައްޔާރީތައް ވަނީ ފަށާފަ އެވެ.
ޕެންޝަން ފަންޑުގެ އާ ބޯޑާއި ލީޑާޝިޕާއެކީ 2.4 ބިލިއަން ރުފިޔާގެ ބޮންޑު މުއާމަލާތް ހިންގަނީ
ޕެންޝަން ފަންޑުން ގަނެފައިވާ 2.4 ބިލިއަން ރުފިޔާގެ ޓީބިލުތައް ވިއްކާލުމަށްފަހު، ސަރުކާރުން ދޫކުރާ ދިގު މުއްދަތުގެ ޑޮލަރުން ފައިދާ ލިބޭ ބޮންޑަކަށް އިންވެސްޓުކުރުމުގެ ފަހުގެ ތައްޔާރީތައް ދަނީ ވަމުން. މި މުއާމަލާތުގެ ސަބަބުން ޕެންޝަން ފަންޑަށް ބޭރު ފައިސާގެ ރިޒާވެއް އުފެދޭނެ ކަމަށް ބުންޏަށް ގިނަ ބަޔަކު މި މުއާމަލާތާ ދެކޮޅު.
މި މުއާމަލާތާ ގުޅޭގޮތުން ސަރުކާރާއި ޕެންޝަން އޮފީހުން ބުނަމުންދަނީ، މިއީ ޕެންޝަން ފަންޑަށް ބޭރު ފައިސާ (ޑޮލަރު) ވަންނަން ފަށައި، ފަންޑުގެ މަސްލަހަތުވެރިންނަށް ބޮޑު ފައިދާއެއް ލިބިގެންދާނެ ކަމެއް ކަމަށެވެ. އަދި ބާޒާރުން ބޭރު ފައިސާ ގަންނަން ނުޖެހި، އިންވެސްޓްމަންޓެއްގެ ތެރެއިން ފަންޑުގައި ބޭރު ފައިސާގެ ރިޒާވެއް އުފެދޭނެ ކަމަށްވެސް ޕެންޝަން އޮފީހުން ބުނެއެވެ.
ނަމަވެސް މި މުއާމަލާތާ މެދު ހިޔާލުތަފާތުވުންތައް ބޮޑުވެ، ޕެންޝަން އޮފީހުގެ ބޯޑުގައި ކުރިން ތިއްބެވި މެންބަރުންނާއި އެ އޮފީހުގެ އިސް މުވައްޒަފުންތަކެއް ވަނީ އިސްތިއުފާ ދެއްވާފައެވެ.
މި މުއާމަލާތް މިހާތަނަށް މަޑުޖެހިފައި އޮތީ ލިޔެކިޔުންތަކުގައި ސޮއިކުރާނެ އިސް މުވައްޒަފަކު ނެތުމުންނެވެ. ނަމަވެސް، ޕެންޝަން އޮފީހުގެ ބޯޑުގެ އާ ޗެއާމަނަކަށް އަބްދުލް މަޖީދު އަލީ އައްޔަންކުރެއްވުމާއެކު، މުއާމަލާތުގެ ފަހު މަރުހަލާގެ މަސައްކަތްތައް މިހާރު ދަނީ ކުރިއަށެވެ.
މާލީ މާހިރުން ފާހަގަކުރާ ގޮތުގައި، އެމްއެމްއޭ އިން ސީދާ ދަރަންޏެއް ނުނެގި ނަމަވެސް، ސަރުކާރުގެ ހަރަދުތައް ހަމަޖައްސަން މި ފައިސާ ބޭނުންކުރުމަކީ "ނުސީދާ ގޮތުން ފައިސާ ޗާޕުކުރުން" އެވެ. މިއީ ހަރަދަށް ޒިންމާވުމުގެ ގާނޫނުގައިވާ ހިފެހެއްޓުންތަކުން ރެކެން ސަރުކާރުން ބޭނުންކުރި "ލޫޕްހޯލް" އެކެވެ.
މި މުއާމަލާތް ނިންމާލަން އަވަސްވެގަނެގެން އުޅެނީ، ބޭރުގެ މަސްރަހުގައި ހިނގަމުންދާ ހަނގުރާމަތަކުގެ ސަބަބުން ރާއްޖޭގެ ޓޫރިޒަމަށް އަސަރުކޮށް، ޑޮލަރު ތާށިވެ، ކަޅު ބާޒާރުގައި ރުފިޔާގެ އަގު ވަރަށް ބޮޑަށް ވެއްޓިފައިވާ ދަނޑިވަޅެއްގައެވެ.
