ރަސްމާލޭގެ 500 ހެކްޓަރުގެ ބިން އިޒްރޭލާ ގުޅުން އޮންނަ ޔޫއޭއީގެ މަހުޖަނު މުހައްމަދު އަލައްބާރުގެ އީގަލް ހިލްސް ކުންފުންޏަށް ދޭން އެއްބަސްވުމަށް ފަހު، އެ މުއާމަލާތް ގާނޫނީ ގޮތުން ސައްހަ ކުރުމުގެ ބޭނުމުގައި ރައްޔިތުންގެ މަޖިލީހަށް ހުށަހަޅާފައިވާ ރިއަލް އެސްޓޭޓް ވިޔަފާރީގެ ބިލު ދިރާސާކުރާއިރު، ކޮމިޓީއަށް ހާޒިރުވެ ހިޔާލު ހުށަހަޅަން ބޭނުންވާ ސިޔާސީ ޕާޓީތަކާއި ދީނީ އަދި މަދަނީ ޖަމިއްޔާތަކުން އެކަމަށް އެދުމުގެ ފުރުސަތު ހުޅުވާލައިފި އެވެ.
ރައްޔިތުންގެ މަޖިލީހުގެ އިދާރާއިން މިއަދު ކުރި އިއުލާނެއްގައި ބުނީ ރަސްމާލެ ދޫކޮށްލާ ބިލަށް ހިޔާލެއް ހުށަހަޅަން ސިޔާސީ ޕާޓީއަކުން ނުވަތަ ޖަމިއްޔާއަކުން ބޭނުންވާ ނަމަ، ޑިސެމްބަރު 2، ގެ ކުރިން އެ އިދާރާގެ އީމެއިލް އެޑްރެސް national.development_committee@majlis.gov.mv އަށް ނުވަތަ އިދާރާއަށް ލިޔުމުން ހުށަހެޅުމަށް އެދޭ ކަމަށެވެ.
ރަސްމާލެ ދޫކޮށްލާ ބިލަށް ސިޔާސީ ޕާޓީތަކާއ ދީނީ އަދި، މަދަނީ ޖަމިއްޔާތަކުގެ ހިޔާލު ހޯދަން ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީން ނިންމީ މިއަދު އެވެ. އެ ކޮމިޓީއަށް އެގޮތަށް ހުށަހެޅުއްވީ ބާރަށު ދާއިރާގެ މެންބަރު، އިބްރާހިމް ސުޖާއު އެވެ.
ގައުމީ ތަރައްގީ އާއި ތަރިކައިގެ ކޮމިޓީން މިގޮތަށް މިއަދު ފާސްކުރި ނަމަވެސް، މީގެ ކުރިން ބޭއްވި އެ ކޮމިޓީގެ ބައްދަލުވުމުގައި، އެމްޑީޕީއަށް ނިސްބަތްވެވަޑައިގަންނަވާ ތޮއްޑޫ ދާއިރާެގެ މަޖިލިސް މެންބަރު، ހުސެއިން ސަމީރު އެ ހުށަހެޅުން ހުށަހެޅުއްވުމުން ޕީއެންސީ މެންބަރުން އެކަމަށް ތާއީދެއް ނުކުރެއްވި އެވެ.
އެ ބިލު ދިރާސާކުރާއިރު، ކޮމިޓީއަށް ހާޒިރުވެ ހިޔާލު ހުށަހެޅުމުގެ ފުރުސަތު ސިޔާސީ ޕާޓީތަކާއި ޖަމިއްޔާތަކަށް ހުޅުވައިލައިވާއިރު، އިދިކޮޅު އެމްޑީޕީ އާއި ޕީއެންއެފްއިން ވަނީ އެ މަޝްރޫއުއާ ގުޅޭގޮތުން ކަންބޮޑުވުން ފާޅުކޮށްފަ އެވެ. އޭގެ އިތުރުން، އެ މަޝްރޫއު ކުރިއަށް ގެންދިޔުމުގެ ކުރިން އާންމުންގެ ހިޔާލު ހޯދުމަށް ފެންނަނުފެންނަ ވޯޓެއް ނެގުމަށް ވެސް އެ ޕާޓީތަކުން ދަނީ ގޮވައިލަމުންނެވެ.








