މެދުއިރުމަތީގެ ހަނގުރާމަ ފެށުނު ފަހުން ރާއްޖޭގެ ފަތުރުވެރިކަމުގެ ދާއިރާއަށް 500 މިލިއަން ޑޮލަރުގެ ގެއްލުންވެފައިވާ ކަމަށް ކަމާ ގުޅޭ ޖަމިއްޔާތަކުން ބުނި ނަމަވެސް އެ ވާހަކަ ގަބޫލު ނުކުރައްވާ މޭރުމަކުން ޓޫރިޒަމް މިނިސްޓަރު މުހައްމަދު އަމީން މިއަދު ވާހަކަ ދައްކަވައިފަ އެވެ.
މިއަދު ބޭއްވެވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން އަމީން ވިދާޅުވީ ފަތުރުވެރިކަމުގެ ދާއިރާއަށް ލިބޭ ގެއްލުންތައް ސަރުކާރުން ބަލަމުންދާ ކަމަށެވެ. އެކަމަކު، ދާއިރާއަށް ލިބުނު ކަމަށް ސަރުކާރުން ގަބޫލު ކުރާ އަދަދެއް އޭނާ ހާމައެއް ނުކުރައްވަ އެވެ.
"ކޮންމެ ފަދަ ނަންބަރެއް ޖެހިވެސް ދާނެ. އަޅުގަނޑުމެންނަކަށް އެއްވެސް ކަހަލަ ހިސާބުކިތާބަކުންނެއް އަދި ނެތް [އެ އަދަދަށް ގެއްލުންވިކަން އެނގޭކަށް]. އަޅުގަނޑުމެންގެ މިނިސްޓްރީ އިން ވެސް އެއީ ކިހިނެއް އައިސްގެން އުޅޭ ނަންބަރެއްތޯ އެބަ ބަލަން، ބައެއް ޑިޕާޓްމަންޓަކުން މިހާރު ވެސް އެބަ މަސައްކަތް ކުރަމުންދޭ،" އަމީން ވިދާޅުވި އެވެ.
ފެބްރުއަރީ 28، ގައި ހަނގުރާމަ ފެށި ފަހުން ފަތުރުވެރިކަމުގެ ދާއިރާއަށް އެތައް ސަތޭކަ މިލިއަން ޑޮލަރުގެ ގެއްލުން ލިބިފައިވާކަން ހާމަ ކުރީ، ޓްރެވަލް އެޖެންޓް އެންޑް ޓުއާ އޮޕަރޭޓާސްގެ ޖަމިއްޔާ މަޓާޓޯ އަދި ހޮޓަލާއި ގެސްޓްހައުސްތަކުގެ ޖަމިއްޔާއިން ނެރުނު ބަޔާނެއްގަ އެވެ.
ދާއިރާއަށް ލިބުނު ގެއްލުން އަންދާޒާކޮށްފައި ވަނީ މީގެ ކުރިން ބުކިން ލިބިފައިވާ އަދަދުތަކަށް ބަލައިގެންނެވެ. އެ ދެ ޖަމިއްޔާއިން ލަފާ ކުރާ ގޮތުގައި މިހާތަނަށް ލިބުނު ގެއްލުން 500 މިލިއަން ޑޮލަރަށް ވުރެ ވެސް އިތުރުވާނެ އެވެ.
އެ ބަޔާނުގައި ބުނެފައި ވަނީ މިގޮތަށް ފަތުރުވެރިކަމުގެ ދާއިރާ އަޑިއަޅައިގެންދާ ނަމަ ވިޔަފާރިތައް ބަނގުރޫޓުވެ، އެތައް ސަތޭކެ ވަޒީފާއެއް ގެއްލިދާނެ ކަމަށެވެ. އެހެންވިޔަ ނުދިނުމަށްޓަކައި ސަރުކާރުން ފަތުރުވެރިކަމުގެ ދާއިރާއަށް އެހީތެރިވާން އެ ބަޔާނުގައި ގޮވާލާފައިވެ އެވެ.
މަޓާޓޯ އާއި ހޮޓާ/ގެސްޓްހައުސް ޖަމިއްޔާއިން އެދޭ ކަންކަން
- ފަތުރުވެރިކަމުގެ ދާއިރާގައި އުޅޭ ކުދި ވިޔަފާރިތަކަށް އަދި ގެސްޓްހައުސްތަކަށް ހާއްސަ ލޯނު ދޫކުރުން
- މިހާރު ނަގާފައިވާ ލޯނުތައް ދެއްކުން މެދުކަނޑާލުން، ލޯނު ރީ-ސްޓްރަކްޗާ ކޮށްދިނުން އަދި ފީތައް ދެއްކުން ވަގުތީ ގޮތުން މެދުކަނޑާލުން
- ކުދި ވިޔަފާރިތަކަށް ލޯނު ދޫކުރާއިރު ޝަރުތުތައް ލުއި ކުރުން
- އަގުތައް މަތިވަމުންދާ ދިޔުމަށް ހާއްސަ ސަމާލުކަމެއް ދިނުން؛ ހާއްސަކޮށް އެއާޕޯޓް ރިފިއުލިން އަގު މަތިވާ މައްސަލައަށް ހައްލެއް ގެނައުން
- އިމާރާތް ކުރާ ތަކެތީގެ އަގު އުފުލޭތީ ގެސްޓްހައުސްތަކާއި ކުދި ވިޔަފާރިތަކަށްވަމުންދާ ގެއްލުމަށް ހައްލެއް ގެނައުން
މަޓާޓޯ އާއި ހޮޓާ/ގެސްޓްހައުސް ޖަމިއްޔާއިން ނެރުނު ބަޔާނުގައި އިތުރަށް ބުނެފައި ވަނީ ފަތުރުވެރިކަމުގެ ދާއިރާއަށް މީގެ ކުރިން ލިބުނު ގެއްލުންތަކުން ވެސް އަރައިގަނެފައިވާ ކަމަށާއި މިފަހަރު ވެސް އެކަން ކުރެވޭނެ ކަމަށެވެ.
"އެހެންނަމަވެސް، ވިޔަފާރިތައް ހިމާޔަތް ކުރުމަށާއި ވަޒީފާތައް ރައްކާތެރި ކުރުމާއި ފަތުރުވެރިކަމުގެ ދާއިރާއަށް އޮތް އިތުބާރު ދެމެހެއްޓުމަށް މި ހާލަތުގައި ރޭވިގެން، ހަލުވި ފިޔަވަޅުތަކެއް އަޅަންޖެހޭ،" އެ ބަޔާނުގައި ބުނެފައިވެ އެވެ.
ފަތުރުވެރިކަމުގެ ދާއިރާއަށް ލިބޭ ގެއްލުންތަކުން އަރައިގަތުމަށް ސަރުކާރާއި މާލީ އިދާރާތަކާއި ފަތުރުވެރިކަމުގެ ދާއިރާގެ ސްޓޭކްހޯލްޑަރުންނާއެކު މަސައްކަތް ކުރަން އެ ދެ ޖަމިއްޔާއިން ތައްޔާރަށް ތިބި ކަމަށް ވެސް އެ ބަޔާނުގައި ބުނެފައިވެ އެވެ.
