މި އަހަރުގެ ފުރަތަމަ ދެ މަސްދުވަހުގެ ތެރޭގައި ފަތުރުވެރިން އައި މިންވަރު ބޮޑުތަނުން އިތުރުވަމުންދިޔަ ނަމަވެސް މެދުއިރުމަތީގައި ފެށި ހަނގުރާމަ އާއެކު ރާއްޖޭގެ ފަތުރުވެރިކަމަށް ބޮޑު ލޮޅުމެއް އަރައިފި އެވެ.
ސަރުކާރުން ކުރިއެރުންތަކެއް އަންނާނެ ކަމަށް ލަފާކުރި ނަމަވެސް، ޓޫރިޒަމް މިނިސްޓްރީގެ ތަފާސްހިސާބުތަކުން ފެންނަމުންދަނީ ފަތުރުވެރިން އަންނަ މިންވަރު ދަށްވަމުންދާ މަންޒަރެވެ.
ޖެނުއަރީ މަހު 227,403 ފަތުރުވެރިންނާއެކު ފަސް އިންސައްތައިގެ ކުރިއެރުމެއް ލިބުނުއިރު، ފެބްރުއަރީ މަހު ރެކޯޑު އަދަދަކަށް ރާއްޖެއަށް ފަތުރުވެރިން އައިސްފައިވެ އެވެ. އެއީ އޭގެ ކުރީ އަހަރުގެ ފެބްރުއަރީ މަހަށް ވުރެ 15.7 އިންސައްތައިގެ ކުރިއެރުމެކެވެ.
ނަމަވެސް، މާޗު މަހު މި މަންޒަރު މުޅިން ބަދަލުވެ، އައި ފަތުރުވެރިންގެ އަދަދު ވަނީ 166,616 އަށް ވެއްޓިފަ އެވެ. މިއީ 2025 ވަނަ އަހަރުގެ މާޗު މަހާ އަޅާބަލާއިރު 20.7 އިންސައްތައިގެ ބޮޑު ދަށްވުމެކެވެ.
މިހާ ބޮޑުތަނުން ފަތުރުވެރިންގެ އަދަދު ދަށްވީ އެމެރިކާ އާއި އިޒްރޭލުން އިރާނަށް ބޮން އަޅައި ފެށި ހަނގުރާމަ އާއެކު އެވެ. މެދުއިރުމަތީގެ އެއާލައިންތަކަކީ ރާއްޖެއަށް އެންމެ ގިނަ ފަތުރުވެރިން ގެނެސްދޭ އެއާލައިންތައް ކަމަށްވާއިރު އެ ސަރަހައްދުގެ އެއާޕޯޓުތައް ބަންދުކޮށް ފްލައިޓުތައް ގްރައުންޑު ކުރުމުން ބޮޑު ގެއްލުމަކާ ވަނީ ކުރިމަތިލާން ޖެހިފަ އެވެ.
މި ނޭދެވޭ އަސަރު އޭޕްރިލް މަހުވެސް ދަނީ ފެންނަމުންނެވެ. މި މަހުގެ ފުރަތަމަ ހަތް ދުވަހު އައީ 36,333 ފަތުރުވެރިންނެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 26 އިންސައްތައިގެ ދަށްވުމެކެވެ.
ވިޔަފާރި ދަތުރުތަކާއި ކުރޫޒް ލައިނާ ފަސިންޖަރުން ނުހިމަނައި، ހަމައެކަނި ފަތުރުވެރިންނަށް ބަލާއިރު ހާލަތު އަދި މާ ގޯހެވެ. މި އަހަރުގެ މިހާތަނަށް އައީ 670,102 ފަތުރުވެރިންނެވެ. މިއީ 2025 ވަނަ އަހަރުގެ މި މުއްދަތުގައި އައި 681,496 ފަތުރުވެރިންނަށްވުރެ މަދު އަދަދެކެވެ.
ދުވާލަކު އަންނަ ފަތުރުވެރިންގެ އެވަރެޖު ވެސް ވަނީ 7,026 އިން 6,908 އަށް ދަށްވެފަ އެވެ.
ރާއްޖެއަށް އެންމެ ގިނައިން ފަތުރުވެރިން އަންނަ 10 ގައުމަށް ބަލާއިރު އެންމެ ގިނަ ފަތުރުވެރިން އައީ ޗައިނާއިންނެވެ. އެ ގައުމުން އެއް ލައްކައަށްވުރެ ގިނަ ފަތުރުވެރިން އައިސްފައިވާއިރު ދެވަނައިގައި 12 އިންސައްތަ ފަތުރުވެރިންނާއެކު އޮތީ ރަޝިއާ އެވެ.
އިންޑިއާގެ މާކެޓް ވަނީ ފަސްވަނައިން ހަވަނައަށް ވެއްޓިފަ އެވެ. އެއީ އެންމެ 4.2 އިންސައްތަ ހިއްސާއާއެކުގަ އެވެ. މިއީ ދެ ގައުމުގެ ދެމެދުގައި ފަތުރުވެރިކަން ކުރިއެރުވުމަށް ކޮށްފައިވާ އިންވެސްޓްމަންޓްތަކާ އަޅާބަލާއިރު ވަރަށް ދަށް ނަތީޖާއެކެވެ.
އިއްޔެއާ ހަމައަށް ރާއްޖެ އައި ފަތުރުވެރިންގެ 69 އިންސައްތަ ހިއްސާކުރަނީ ރިސޯޓުތަކެވެ. ގެސްޓްހައުސްތަކުގެ ހިއްސާ 25.9 އިންސައްތައިގައި ހުރިއިރު، މިހާރު ރާއްޖޭގައި 930 ގެސްޓްހައުސް އޮޕަރޭޓްކުރެ އެވެ. ނަމަވެސް، ފަތުރުވެރިން އަންނަ މިންވަރު ދަށްވަމުންދާނަމަ، މިހާ ބާރުމިނެއްގައި ގެސްޓްހައުސްތަކުގެ އަދަދު އިތުރުވުމަކީ އެ ދާއިރާއަށް އޮތް ނުރައްކަލެއް ކަމަށް ބެލެވެ އެވެ.
