މެދުއިރުމަތީގައި ހިނގަމުންދާ ހަނގުރާމައާ ގުޅިގެން ގައުމުގެ ކަންކަން މެނޭޖް ކުރަން ރައީސް މުހައްމަދު މުއިއްޒު އުފެއްދެވި ކޮމިޓީއަށް ބަދަލުތަކެއް ގެނެސް މެންބަރުންގެ އަދަދު ފަހަކަށް ތިރިކޮށްފި އެވެ.
މުއިއްޒު އެކުލަވާލި ކެބިނެޓު ކޮމިޓީއަށް ބަދަލުތަކެއް ގެނައީ އެމަނިކުފާނުގެ ކެބިނެޓުން 10 ވަޒީރަކު ވަކިކޮށް ކެބިނެޓު މެންބަރުންގެ އަދަދު 15 އަށް މަދުކޮށްފައި ވަނިކޮށެވެ.
އެ ކޮމިޓީގައި މިހާރު ތިއްބަވާނީ ކޮމިޓީގެ ޗެއާގެ ގޮތުގައި މާލީ ވަޒީރު މޫސާ ޒަމީރާއި ފޮރިން މިނިސްޓަރު އިރުތިޝާމް އާދަމް އާއި އިގްތިސާދީ މިނިސްޓަރު މުހައްމަދު ސައީދު އާއި ފިޝަރީޒް މިނިސްޓަރު އަހުމަދު ޝިޔާމް އަދި ޓުއަރިޒަމް މިނިސްޓަރު މުހައްމަދު އަމީން އެވެ.
އެ ކޮމިޓީގެ ޗެއާއަކަށް ކުރިން ހުންނެވީ ކުރީގެ ފޮރިން މިނިސްޓަރު އަބްދުﷲ ހަލީލެވެ. ނަމަވެސް ކެބިނެޓަށް ގެނައި ބަދަލާއެކު އޭނާގެ މަގާމު ވަނީ އަންގާރަ ދުވަހު ގެއްލިފަ އެވެ.
މީގެ ކުރިން ކޮމިޓީގައި ނުވަ ވަޒީރަކު ތިއްބެވި އެވެ. މިފަހަރުގެ ކޮމިޓީއިން ނުހިމެނޭ ވަޒީރުންގެ ތެރޭގައި ޑިފެންސް މިނިސްޓަރާއި އިސްލާމިކް މިނިސްޓަރާއި އެޑިއުކޭޝަން މިނިސްޓަރާއި ހޯމް މިނިސްޓަރު ހިމެނެ އެވެ.
މެދުއިރުމަތީގައި ކުރާ ހަނގުރާމައިގެ ސަބަބުން ކުރިމަތިވެދާނެ ދަތިތައް ހައްލު ކުރަން ކޮމިޓީ ހެދީ ހަނގުރާމަ ފެށުނު ދުވަހު ފެބްރުއަރީ 28، ގަ އެވެ. އެކަމަކު އިގްތިސާދީ ހަގީގީ ހާލަތު ރައްޔިތުންނަށް ސިއްރު ކުރާ ކަމަށް ބުނެ ކޮމިޓީއަށް ވަނީ ފާޑުކިޔުން އަމާޒުވެފަ އެވެ.
