ރާއްޖޭގެ ޓޫރިޒަމް ސިނާއަތަށް ކުރިމަތިވަމުންދާ އިގުތިސާދީ ގޮންޖެހުންތަކުގެ ސަބަބުން، މިހާތަނަށް 500 މިލިއަން އެމެރިކާ ޑޮލަރަށްވުރެ ބޮޑު ގެއްލުމަކާ ކުރިމަތިލާންޖެހިފައިވާ ކަމަށް ބުނެ، އެ ދާއިރާގެ މުހިންމު ދެ ޖަމުއިއްޔާއަކުން ކަންބޮޑުވުން ފާޅުކޮށްފި އެވެ.
ނޭޝަނަލް ހޮޓެލްސް އެންޑް ގެސްޓްހައުސެސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އަދި މޯލްޑިވްސް އެސޯސިއޭޝަން އޮފް ޓްރަވެލް އެޖެންޓްސް އެންޑް ޓްއަރ އޮޕަރޭޓާސް (މަޓާޓޯ) ގުޅިގެން ނެރުނު ބަޔާނެއްގައި ވަނީ، މި ހާލަތުން އަރައިގަތުމަށް ސަރުކާރުން އަވަސް ފިޔަވަޅުތަކެއް އެޅުމަށް ގޮވާލާފައެވެ.
މި ދެ ޖަމުއިއްޔާއިން އިއްޔެ ހާމަކުރި ގޮތުގައި، ޓޫރިސްޓުން ރާއްޖެ އަންނަ މިންވަރަށާއި، ކުރިއާލާ ބުކިން ހަދާ މިންވަރަށް ބަލާއިރު، 2026 ވަނަ އަހަރުގެ މާޗް މަހުން ފެށިގެން މިހާތަނަށް ސިނާއަތަށް ލިބުނު ގެއްލުން ވަނީ 500 މިލިއަން ޑޮލަރަށްވުރެ މަތިވެފައެވެ.
ރަސްމީ ތަފާސްހިސާބުތަކުން ދައްކާ ގޮތުގައި 2026 ވަނަ އަހަރުގެ މާޗް އަދި އޭޕްރީލް މަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަރަށް ބޮޑަށް ދަށްވެފައިވާއިރު، ކުރިއަށް އޮތް މެއި މަހުވެސް މި އަދަދުތައް އިތުރަށް ދަށްވާނެ ކަމަށް ވަނީ ލަފާކުރެވިފައެވެ. މީގެ އިތުރުން، ރާއްޖެއަށް އެންމެ ގިނައިން ފަތުރުވެރިން އަންނަ މާކެޓްތަކުން ކުރިއަށް ހުރި ބުކިންތައް މަދުވުމަކީ ސިނާޢަތުގައި މަސައްކަތްކުރާ ފަރާތްތަކަށް ކުރިމަތިވެފައިވާ ބޮޑު މާލީ ގޮންޖެހުމެކެވެ.
މި ހާލަތުގެ ސަބަބުން އެންމެ ބޮޑު ނޭދެވޭ އަސަރެއް ކުރަމުންދަނީ ރާއްޖޭގެ ފަތުރުވެރިކަމުގެ އިގުތިސާދުގައި މުހިންމު ދައުރެއް އަދާކުރާ ކުދި އަދި މެދު ފަންތީގެ ވިޔަފާރިތަކަށެވެ. މީގެ ތެރޭގައި ލޯކަލް ގެސްޓްހައުސްތަކާއި، ޓްރެވަލް އެޖެންޓުންނާއި، ޓުއާ އޮޕަރޭޓަރުން ހިމެނެއެވެ. މި ފަރާތްތައް މާލީ ގޮތުން ބަލިކަށިވެ، ބައެއް ވިޔަފާރިތައް މުޅިން ހުއްޓާލަންޖެހޭ ހިސާބަށް ކަންކަން ގޮސްފައިވާކަން ބަޔާނުގައި ފާހަގަކޮށްފައިވެއެވެ.
މަޓާޓޯ އާއި އެންއެޗްޖީއޭއެމް އިން ވަނީ މި ކާރިސާއިން ސަލާމަތްވުމަށްޓަކައި ސަރުކާރަށާއި މާލީ އިދާރާތަކަށް ހުށަހެޅުންތަކެއް ހުށަހަޅާފައެވެ. އޭގެ ތެރޭގައި، ވިޔަފާރިތަކަށް އެހީތެރިވުމުގެ ގޮތުން އިންޓަރެސްޓް ފްރީ މޮރޮޓޯރިއަމް ލޯން ދޫކުރުމާއި، މިހާރު ހުރި ލޯނުތައް ރީސްޓްރަކްޗާ ކޮށްދިނުމާއި، ޓެކްސް ދެއްކުން ފަސްކޮށްދިނުމުގެ އިތުރުން އެކި ބާވަތުގެ ފީތައް މައާފުކޮށްދިނުން ހިމެނެއެވެ. އަދި މުވައްޒަފުން ވަޒީފާގައި ހިފެހެއްޓުމަށްޓަކައި މާލީ އެހީތެރިކަން ފަސޭހައިން ލިބޭނެ ނިޒާމެއް ގާއިމުކޮށްދިނުމަށްވެސް ވަނީ އެދިފައެވެ.
މީގެ އިތުރުން، ހިންގުމުގެ ހަރަދުތައް އިންތިހާއަށް މަތިވަމުންދާ މައްސަލައާއި، އެއާޕޯޓް ތެލުގެ އަގު ބޮޑުވުމުގެ ސަބަބުން ވާދަވެރިކަމަށް ކުރާ އަސަރުތައް ހައްލުކުރުމަށް ވަގުތުން ފިޔަވަޅު އެޅުމަށް ވަނީ ގޮވާލާފައެވެ. އަދި ފަތުރުވެރިކަމުގެ މަޝްރޫއުތަކަށް ބޭނުންވާ ތަކެތީގެ އަގު ބޮޑުވުމުގެ ސަބަބުން ގެސްޓްހައުސް އޮޕަރޭޓަރުންނަށް ދިމާވާ ދަތިތަކަށް ހައްލެއް ހޯދައިދިނުމަށް ސަޕޯޓް މެކޭނިޒަމެއް ތައާރަފްކުރުމަށްވެސް ބަޔާނުގައި ބާރުއަޅާފައިވެއެވެ.
