ރާއްޖޭގައި އިންޑިއާ ސިފައިން ގާއިމުވެތިބޭ ކަމަށް ތުހުމަތުކޮށް އިދިކޮޅު ޕީޕީއެމް/ޕީއެންސީ އިން ސިލްސިލާކޮށް ހިންގަމުން އަންނަ ހަރަކާތްތައް ފުޅާކޮށް މާލޭގައި ބޮޑު އެއްވުމެއް ބޭއްވީ މިދިޔަ ހަފްތާގަ އެވެ.
"ނޭވާހޮޅިއަށް" ނަމުގައި އެއްވުން ބާއްވަން މަސައްކަތްކުރި ނަމަވެސް ފުލުހުން ވަނީ އެއްވުމުގެ ފުރުސަތު ނުދީ އެއްވުން ރުޅާލާފަ އެވެ.
މިދިޔަ ހަފްތާގެ ތެރޭގައި އެއްވުމަށް އިދިކޮޅުން ތައްޔާރުވަމުން ދަނިކޮށް އެއްވުން ނުބޭއްވުމަށް ފުލުހުން އިންޒާރު ވެސް ދިނެވެ. އާންމު ސަލާމަތަށް ނުރައްކާވާތީ ކުރިއަށް ގެންދިޔުމުގެ ފުރުސަތު ނުދޭނެ ކަމަށާއި އެއްވުމުގައި ބައިވެރިވާ މީހުންނާ ދެކޮޅަށް ފިޔަވަޅު އަޅާނެ ކަމަށް ބުނެ އިންޒާރު ދިނެވެ. ހަމައެހެންމެ، ރަސްމީ އިދާރާތަކުން އަންގާފައިވާ އެންގުންތަކަށް ބޯލެނބުމަށް އިދިކޮޅު ފަރާތްތަކަށް އިލެކްޝަންސް ކޮމިޝަނުން އިލްތިމާސް ކުރި އެވެ.
މި އިންޒާރުތަކަށް ބެލުމެއް ނެތި ބޭއްވުމުގެ މުޒާހަރާގެ ތެރެއިން 11 މީހުން ހައްޔަރުކުރި އެވެ. އެ މީހުން ހައްޔަރު ކުރީ "ފުލުހުންގެ ދައުރު އަދާ ކުރުމަށް ހުރަސް އެޅުމުން" ކަމަށް ފުލުހުން ބުނެ އެވެ.
މާލެ ސަރަހައްދަށް ޒަމާނުއްސުރެ ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަށް މި ސަރުކާރުން އިއުލާނުކޮށްފައިވާ މަޝްރޫއުތަކުގެ ތެރެއިން، ހުޅުމާލޭން ދޫކުރަން ނިންމާފައިވާ 1،000 ގޯއްޗަށް ކުރިމަތިލުމަށް އަންނަ ޖޫން މަހުގެ ނިޔަލަށް ހުޅުވާލާނެ ކަމަށް ހައުސިން މިނިސްޓަރު މުހައްމަދު އަސްލަމް ހާމަކުރެއްވީ ވެސް ނިމިދިޔަ ހަފްތާގަ އެވެ.
މި ސަރުކާރުން އިއުލާނުކޮށް ފަށާފައިވާ އެއްވެސް ފްލެޓު މަޝްރޫއެއް މި ދައުރުގެ ތެރޭގައި ނުނިމޭނެކަން ހައުސިން މިނިސްޓްރީން ރައްޔިތުންގެ މަޖިލީހާ ހިއްސާކޮށްފައިވާ މައުލޫމާތުތަކުން ހާމަވީ ވެސް ނިމިދިޔަ ހަފްތާގަ އެވެ. މި ސަރުކާރުން ހާއްސަކޮށް މާލޭ ސަރަހައްދުގައި ކުރިއަށް ގެންދާ ބޯހިޔާވަހިކަމުގެ މަޝްރޫއުތައް ލަސްވަމުންދާތީ މީގެ ކުރިން ވެސް ސަރުކާރަށް ވަނީ ބޮޑެތި ފާޑުކިޔުންތައް އަމާޒުވެފަ އެވެ.
ކްރިމިނަލް ކޯޓުން ޔޫތު މިނިސްޓަރު މަހުލޫފުގެ މައްސަލަ ބޭރުކޮށްލީ ދައުލަތުން ހުށަހެޅި ހުރިހާ ހެއްކަކަށް ރިޔާއަތް ނުކޮށް ކަމަށް ކަނޑައަޅާ، އެ ދައުވާ ކުރިއަށް ގެންދިއުމަށް ހައިކޯޓުން އަމުރުކުރީ ވެސް މިދިޔަ ހަފްތާގަ އެވެ. ހައިކޯޓުން އެ ނިންމުން ބާތިލްކުރީ އެ މައްސަލަ ބެއްލެވި ގާޒީންގެ އަގުލަބިއްޔަތުންނެވެ.
ރައްޔިތުންގެ މަޖިލީހުގެ ކުރީގެ މެމްބަރު އަލްހާން ފަހުމީ އަދި އޭނާގެ އާއިލާގެ ބައެއް މެންބަރުންގެ ހިއްސާ އޮންނަ ކުންފުންޏަކުން އާންމުންގެ އަތުން ފައިސާ ނަގައިގެން ހިންގަމުންދިޔަ ސްކީމުގައި، މަކަރުން ފައިސާ ހޯދާ ޕޮންޒީ ސްކީމާ ވައްތަރު ކަންކަން ހުރުމުން ތަހުގީގު ކުރަން ފެށީ ވެސް ނިމިދިޔަ ހަފްތާގަ އެވެ.
ރައްޔިތުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލައިގެން ދިން ޓެރަރިޒަމް ހަމަލާއަށްފަހު، ހަރުކަށި ފިކުރާ ދެކޮޅަށް ފުލުހުން ހިންގި އޮޕަރޭޝަނުގައި މާލޭން ހައްޔަރު ކުރި އއ. މާޅޮސް، އަސަރީގެ މުހައްމަދު ނާޒިމްއަށް ކުރާ ޓެރެރިޒަމްގެ ދައުވާތަކަށް އޭނާ އިންކާރުކުރީ ނިމިދިޔަ ހަފްތާގަ އެވެ.
ހުޅުމާލޭގައި 2019 ވަނަ އަހަރުގެ ފަހުކޮޅު ތޫނު އެއްޗަކުން ހަމަލާދީ އަނިޔާވެރި ގޮތަކަށް މަރާލި ގާސިމް ހަސަން, 59, ގެ މަރުގެ މައްސަލަ އަވަހަށް ނިންމައިދިނުމަށް އެ މައްސަލައިގައި ދައުވާ ލިބޭ ޅ. ހިންނަވަރު، ބޮޑުހިޔާގެ، އަދުހަމް މުހައްމަދު އެދުނީ ވެސް ނިމިދިޔަ ހަފްތާ ބޭއްވި ޝަރީއަތުގެ އަޑުއެހުމެއްގަ އެވެ.
ހަރުކަށި ފިކުރު ހުއްޓުވުމަށް ދިވެހި ރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނަށް ގެންނަން ޖެހޭ އިސްލާހުތައް ދެނެގަތުމުގެ މަޝްވަރާތައް އެޓާނީ ޖެނެރަލްގެ އޮފީހުން ފެށީ ވެސް މިދިޔަ ހަފްތާގަ އެވެ. ފަތުވާދޭ މަޖިލިސް އެކުލެވިގެންވާ ގޮތާއި އެ މަޖިލީހުގެ މަސްއޫލިއްޔަތުތައް މުރާޖަ ކުރުމުގެ އިތުރުން ހަރުކަށި ފިކުރު ހުއްޓުވުމަށް އެ ގާނޫނަށް ގެންނަން ޖެހޭ އިސްލާހުތައް ދެނެގަތުމަށް ވަނީ މަޝްވަރާކޮށްފަ އެވެ.
މިނިސްޓްރީ އޮފް ކޮމިއުނިކޭޝަންސްގައި މިނިސްޓަރަކަށް ކުރިން ހުންނެވި މުހައްމަދު މަލީހް ޖަމާލް، އެ މިނިސްޓްރީގައި އޭނާގެ ކޮޓަރި އާއި އެ ތަނާ ގުޅުވައިގެން ހަމަ އެ ޑިޒައިނާ އެއްގޮތަށް ބްލޮކް-ބީ މަރާމާތު ކުރުމަށް 795،000ރ. ސަރުކާރުގެ ބަޖެޓުން ހަރަދުކުރި ކަމަށް ހާމަވީ ވެސް ނިމިދިޔަ ހަފްތާގަ އެވެ.
މާލެ ސަރަހައްދުގައި އެއްވުންތައް ބޭއްވުމަށް ހުރަސްއަޅާ ގާނޫނު އުވާލުމަށްފަހު، ޑިމޮކްރެސީގެ ހަމަތަކުގެ މަތިން ލިބޭ އެ ހައްގު ފުޅާކުރުމަށް ކުރީގެ ރައީސް މައުމޫން އަބްދުލްގައްޔޫމް ލީޑްކުރައްވާ އެމްއާރުއެމުން ގޮވާލީ ވެސް މިދިޔަ ހަފްތާގަ އެވެ.
ބައެއް މުހިންމު ހަބަރުތައް
- އަންނަ ހޯމައަށް ރޯދަ އިނާޔަތް ދޭން އެންގުން
- ލެންޑް ޔޫސް ޕްލޭން ފާސްނުކޮށް ވިލިމާލެއިން ބިން ދޫނުކުރަން އެންގުން
- ގުރައިދޫ މަރުކަޒަށް ދެ ސައިކޭޓްރިސްޓުން ހޯދަނީ، ޖޫން މަހު ރާއްޖެ އަންނާނެ
- މަސައްކަތްކުރިކަން ކަށަވަރު ނުކޮށް އިސްލާމިކް މިނިސްޓްރީން އިތުރުގަޑީގެ ފައިސާ ދިން މައްސަލައެއް
- މިންތީގެ ހަމަހަމަކަން ގާއިމުކުރަން އެކްޝަން ޕްލޭނެއް ނެރުން
- ތިނަދޫގައި ކުރިޔަށްގެންދިޔަ އާއްމު އަޑުއެހުންތައް ނިންމާލުން
- 181 ގެސްޓްހައުސް އާއި 31 ސަފާރީއަށް އީޔޫގެ ހިލޭ އެހީ
- އެކުވެރިކަމުގެ މެޗެއްގައި ރާއްޖެ އިން ބަންގްލަދޭޝް ބަލިކުރުން
- ރޯދަ މަހަށް ހާއްސަކޮށް "ރޯދަ އަދަދު" މެގަޒިން ނެރުން
ހަފްތާގެ ހޮވާލެވޭ ބައެއް ލިޔުން
- މިއީ 1962 ވަނަ އަހަރު ގދ. ތިނަދޫ އިން މީހުން ބޭލި ހާދިސާ އާ ގުޅިގެން ހިނގައިދިޔަ ކަންތައްތަކާއި އޭގެ ފަހުން ތިނަދޫ އާރާސްތުކޮށް އަލުން އާބާދުވުމާ ގުޅޭގޮތުން އެ ރަށަށް ކުރި ދަތުރުގައި މުހައްމަދު ނަސީމް ތައްޔާރުކޮށްފައިވާ ފުރިހަމަ ރިޕޯޓެކެވެ.
- ސިއްހީ ކުއްލި ނުރައްކަލުގެ ހާލަތު އުވާލުމުން ވެސް އެ ހާލާތުގައި އެޅި ބައެއް ފިޔަވަޅުތަކަށް އަމަލުކުރުމާއި އާ އާންމު ހާލަތުގެ ބޭނުން ހެޔޮގޮތުގައި ހިފުމަށް އިލްތިމާސްކޮށް ނަސްމާ އަބްދުލްމުހްސިން ލިޔެފައިވާ ކޮލަމެކެވެ.
- ލ. ގަމަށް އުފަން އުމުރުން ހަތަރު އަހަރުގެ ސެރެބްރަލް ޕަލްސީ ހުންނަ ކުއްޖަކަށް ކުޑަކުދިންގެ ހައްގުގައި މަސައްކަތްކުރާ ޖަމްއިއްޔާއަކުން ވެދިން އެހީތެރިކަމާއެކު އެ ކުއްޖާގެ ހަޔާތް ބަދަލުވި ގޮތް ފާތިމަތު އަޖުފާން ވަނީ މި ރިޕޯޓުގައި ގެނެސްދީފަ އެވެ.
ދިރާސާތަކުން ކިޔާލުމަށް
"މޯލްޑިވްސް ޕޮޕިއުލޭޝަން ޕްރޮޖެކްޝަންސް 2014-2054"
މިއީ 2014 އިން ފެށިގެން ކުރިއަށް އަންނަ ހުރި 50 އަހަރުގެ ތެރޭގައި ރާއްޖޭގެ އާބާދީ އަށް ބަދަލު އަންނާނެ ގޮތާ ގުޅޭގޮތުން ޔޫއެންއެފްޕީއޭ އިން ކޮށްފައިވާ ދިރާސާއެކެވެ. މި ދިރާސާ ބިނާކޮށްފައިވާ ހަމަ އެ އަހަރު ރާއްޖޭގައި ކުރިއަށް ގެންދިޔަ ބޯހިމެނުމުގެ ހޯދުންތަކުގެ މައްޗަށް ބިނާކޮށެވެ.
