އިދިކޮޅު ޕްރޮގްރެސިވް ޕާޓީ އޮފް މޯލްޑިވްސްގެ ފަރާތުން ވެރި ރަށް މާލޭގައި މިއަދު ކުރިއަށްގެންދިޔަ މުޒާހަރާގައި ބައިވެރި 11 މީހަކު ފުލުހުން ހައްޔަރުކޮށްފި އެވެ.
އިންޑިއާ ސިފައިން ރާއްޖެއިން ބޭރު ކުރުމަށް ގޮވާ ޕީޕީއެމުން ކުރިއަށްގެންދާ ސިލްސިލާ ހަރަކާތްތަކުގެ ތެރެއިން މިއަދު ބޭއްވި "ނޭވާ ހޮޅިއަށް" މުޒާހަރާގައި ހައްޔަރު ކުރި އެންމެން ވެސް ހައްޔަރު ކުރީ "ފުލުހުންގެ ދައުރު އަދާ ކުރުމަށް ހުރަސް އެޅުމުން" ކަމަށް ފުލުހުން ބުންޏެވެ.
ހައްޔަރު ކުރި މީހުންގެ ތެރޭގައި މާވަށު ދާއިރާގެ މެމްބަރު މުހައްމަދު ސައީދާއި ގުރައިދޫ ދާއިރާގެ މެމްބަރު ގައްސާން މައުމޫން ހިމެނިވަޑައިގަންނަވަ އެވެ. މުޒާހަރާގެ ބައިވެރިންނާއެކު އެ ދެ ބޭފުޅުން މިހާރު ފުލުހުންގެ ބަންދު މަރުކަޒު ދޫނިދޫއަށް ގެންގޮސްފައިވާ ކަމަށް ޕީޕީއެމުން ބުނެ އެވެ.
މުޒާހަރާ ކުރުން ހުއްޓުވާނެ ކަމަށް ބުނެ ފުލުހުން ކުރިން އިންޒާރު ދީފައި އޮއްވާ ބޭއްވި އެ އެއްވުން ހަވީރު 4:00 ފެށިގެން ތިން ގަޑިއިރު ވަންދެން ކުރިއަށްގެންދިޔަ އެވެ. ބޮޑުތަކުރުފާނު މަގު ޕީޕީއެމް އޮފީސް ކައިރިން ހިނގާފައި ނިކުމެ ކާނިވާ ސަރަހައްދާ ހަމައަށް މުޒާހަރާގެ ބައިވެރިން ދިޔަ އެވެ. ފުލުހުން މުޒާހަރާގެ ބައިވެރިން ފުލުހުން ހުއްޓުވީ އެހިސާބުންނެވެ.
"އިންޑިއާ އައުޓް" ހަރަކާތް ކުރިއަށްގެންދަވަނީ އެމަނިކުފާނުގެ އިސްނެންގެވުމަކަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވާ ނަމަވެސް މިއަދުގެ ހަރަކާތުން އެމަނިކުފާނު ފެނިވަޑައެއްނުގަންނަވަ އެވެ. "ނޭވާ ހޮޅިއަށް" މުޒާހަރާ މިއަދު ލީޑް ކުރެއްވީ ޕީޕީއެމްގެ ޑެޕިއުޓީ ލީޑަރު އަބްދުއްރަހީމް އަބްދުﷲ އެވެ.
މުޒާހަރާ ފެށީ އިދިކޮޅު ލީޑާޝިޕުގެ ބައެއް ބައިވެރިން ޕީޕީއެމް ޖަގަހައިން ނިކުމެގެން ބޮޑުތަކުރުފާނު މަގުން އުތުރަށް ހިނގައިގަތުމާއެކުގަ އެވެ. އޭގެ ތެރޭގައި އަބްދުއްރަހީމްގެ އިތުރުން ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް، މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު އެންމެ ކުރީ ސަފުގައި ތިއްބެވި އެވެ.
މުޒާހަރާ ފެށުމަށް އިދިކޮޅު ލީޑަރުން ނިކުންނަވަނީ. މުޒާހަރާގެ ތެރެއިން ދެ ފަހަރެއްގެ މަތިން ހަމަނުޖެހުން ވަނީ ހިންގައިފަ. ފޮޓޯ: މުހައްމަދު ޝާބިން/އަދަދު
މުޒާހަރާގެ ބައިވެރިން އެބޭފުޅުންގެ ފަހަތުން ދިޔައީ "އިންޑިއާ އައުޓް" ޝިއާރުތައް ހަރު އަޑުން ގޮވަމުންނެވެ. މަޖީދީ މަގާއި ބޮޑުތަކުރުފާނު މަގަށްވާ ގޮތަށް ފުލުހުން ޖަހާފައި ހުރި ބެރިކޭޑްތައް މުޒާހަރާގެ ބައިވެރިން ފަހަނައަޅައި ދިޔުމަށްފަހު ދިޔައީ ކާނިވަލާ ދިމާލަށެވެ.
"އިންޑިއާ އައުޓް، އިންޑިއާ ސިފައިންނަށް މިތާކު ނުތިބެވޭނެ. މިއީ ދިވެހި ފަސްގަނޑު،" މުޒާހަރާގެ ބައިވެރިޔަކު ދިޔައީ ގޮވަމުންނެވެ.
ކާނިވާ ކައިރިން ފުލުހުންގެ ސަފުތައް ފޫއަޅުވަން އުޅުމުގެ ތެރޭ ހަމަނުޖެހުންތަކެއް ހިނގައިދިޔަތަން ފެނުނެވެ. މުޒާހަރާގައި އެވަގުތު ތިބި މީހުންގެ ތެރެއިން 40 އަކަށް މީހުން ފުލުހުންގެ ސަފުތައް ދޭތެރެއިން ދެމިގަތެވެ. އޭގެ ތެރޭގައި މެމްބަރު ގައްސާނާއި މެމްބަރު ސައީދު ހިމެނެ އެވެ.
އެމީހުން އަނެއްކާ ވެސް ހިނގަން ފެށީ ބޮޑުތަކުރުފާނު މަގުން ރައީސް އޮފީހާ ދިމާލަށެވެ. ނަމަވެސް އެހިސާބަށް ނުދެވެނީސް މަސްވެރިންގެ ޕާކު ކައިރިން ފުލުހުންގެ ސަފެއް އަނެއްކާ ވެސް ވަނީ އެމީހުން ހުއްޓުވާފަ އެވެ.
އެތަނުން އިތުރަށް ކުރިޔަށް ނުދެވުމުން، މުޒާހަރާގެ ބައިވެރިން ވަނީ އެތަނުގެ ބިންމަތީގައި އިށީނދެފަ އެވެ. އަދި އިށީނދެ ތިބެގެން ވެސް ދިޔައީ އިންޑިއާ އައުޓް ޝިއާރުތައް ބޭނުންކުރަމުންނެވެ. އެ ސަރަހައްދުން މުޒާހަރާގެ ބައިވެރިން ދުރަށް ދިޔުމަށް ފުލުހުން އޭރު ވެސް ދިޔައީ ތަކުރާރުކޮށް ނަސޭހަތްތެރިވަމުންނެވެ.
އޭގެ ފަހުން މަގުމަތީގައި އިށީނދެގެން ތިބި މުޒާހަރާގެ ބައިވެރިންގެ ތެރެއިން ފަހަރަކު މީހަކު ފުލުހުން ބާރުގެ ބޭނުންކޮށްގެން ގެންދިޔަ އެވެ. އެގޮތުން ޅ. ނައިފަރު ކައުންސިލަރަކު ވެސް ވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. އަދި މެމްބަރު ސައީދާއި ގައްސާން ވެސް ފުލުހުންގެ ބެލުމުގެ ދަށަށް ގެންދިޔައީ އެތަނުގައި އިށީނދެގެން ތިއްބަ އެވެ.
