ގއ. ވިލިނގިލީގައި ހުންނަ އެ އަތޮޅު އަތޮޅު ތައުލީމީ މަރުކަޒުގައި ރޭ ދަންވަރު އަލިފާން ރޯވެ ބައެއް އިމާރާތްތައް އަނދާ ހުލިވެ، ބޮޑެތި ގެއްލުންތަކެއް ލިބިއްޖެ އެވެ.
ރޭ ދަންވަރު ހިނގި އަލިފާނުގެ މި ހާދިސާގައި ޕްރައިމަރީ ޓީޗަރުންގެ ސްޓާފްރޫމާއި، ޕްރިންޓިން ރޫމް އަދި އެއް ކްލާސްރޫމް ވަނީ އެއްކޮށް އަނދާފައި ކަމަށް އެޑިއުކޭޝަން މިނިސްޓަރު އިސްމާއީލް ޝަފީއު ވިދާޅުވި އެވެ.
މި ސްކޫލަކީ، މާދަމާ ބާއްވާ ލޯކަލް ކައުންސިލް އިންތިހާބާއި ހިޔާލު ހޯދުމުގެ ވޯޓު ކުރިއަށް ގެންދިޔުމަށް ނިންމާފައިވާ އެއް މަރުކަޒެވެ.
އެޑިއުކޭޝަން މިނިސްޓަރު ފޭސްބުކްގައި ލިޔުއްވާފައި ވަނީ އަލިފާނުގެ ހާދިސާގެ ސަބަބުން ދަރިވަރުންގެ ކިޔެވުމަށް ބުރޫއެރިޔަ ނުދިނުމަށްޓަކައި އަވަސް ފިޔަވަޅުތަކެއް އަޅަމުންދާ ކަމަށެވެ.
އެގޮތުން ޕްރިންޓިން ރޫމަށް ބޭނުންވާ ސާމާނާއި، މުދައްރިސުންނަށް ބޭނުންވާ ކޮމްޕިއުޓަރާއި ފަރުނީޗަރު ލިބޭނެ އިންތިޒާމު މިހާރު ދަނީ ހަމަޖައްސަމުން ކަމަށެވެ.
ކިޔެވުން ނުހުއްޓޭނެ ފަދަ ގޮތަކަށް ސްކޫލުގެ ކަންކަން އިންތިޒާމު ކުރާނެ ކަމުގެ ޔަގީންކަން މިނިސްޓަރު ދެއްވި އެވެ.
މި ހާދިސާގައި އަލިފާން ނިއްވުމަށް ކުރެވުނު މަސައްކަތް ފާހަގަކުރައްވައި، އަލިފާން ނިއްވުމުގައި ބައިވެރިވި ހުރިހާ ބޭފުޅުންނަށް މިނިސްޓްރީން ވަނީ އިންތިހާއަށް ޝުކުރު ދަންނަވާފައެވެ.
ސްކޫލުގައި އަލިފާން ރޯވަން މެދުވެރިވި ސަބަބެއް ފުލުހުން އަދި ހާމައެއް ނުކުރެ އެވެ.
