އެއްވެސް އަސާސެއް ނެތް ކަންކަމުގައި މީހުންގެ އަގުވައްޓާލުމަށްޓަކައި ކޮރަޕްޝަންގެ ތުހުމަތުކޮށް މައްސަލަ ހުށަހަޅާ ކަމަށާއި އެފަދަ މައްސަލަތަކުގައި އަމަލުކުރާނެ އުސޫލެއް އެކުލަވާލަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީއަށް އިއްޔެ އޭސީސީ ހާޒިރުކޮށް މިދިޔަ އަހަރު އެ ކޮމިޝަނުން ކުރި މަސައްކަތްތަކުގެ މައުލޫމާތު ސާފުކޮށްފައިވެ އެވެ.
އެ ބައްދަލުވުމުގައި އެ ކޮމިޓީގެ މެންބަރު ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން ވަނީ ބައެއް މީހުންގެ އަގުވައްޓާލުމަށް އޭސީސީއަށް މައްސަލަ ހުށަހަޅާތީ އެ ކަންކަމާ ގުޅޭގޮތުން އަމަލުކުރަނީ ކޮން އުސޫލަކުންތޯ ސުވާލު ކޮށްފަ އެވެ.
"ކަނޑައެޅިގެން އެއްވެސް އަަސާސެއް ނުހުންނަ މައްސަލަތައް ކޮމިޝަނަށް ހުށަހެޅި، އެއީ އަސްލު މައްސަލައެއް ކަމަށް ދެއްކުމުގެ ބޭނުމުގައި މައްސަލަ ލެވޭ ފަހަރު އާދޭ. ކޮރަޕްޝަން ހުއްޓުވުމާއި މަނާކުރުމުގެ ގާނޫނު އޮތްއިރު އެ ގާނޫނު ސީދާ ކަނޑައެޅިގެން ސާފު އިބާރާތުން، ހުދާއި ކަޅުން ލިޔެފައި އޮތް މަފްހޫމެއް މެންބަރު ފާހަގަކުރެއްވީ،" އެ ސުވާލުގެ ޖަވާބުގައި އޭސީސީގެ ރައީސް އާދަމް ޝާމިލް ވިދާޅުވި އެވެ.
މި ވަގުތު އޭސީސީން އަމަލުކުރަމުންދާ ގާނޫނުތަކުގައި މީހެއްގެ އަގުވައްޓާލުމަށް ހުށަހަޅާ މައްސަލަތަކާ މެދު އަމަލުކުރާނެ ސީދާ އުސޫލެއް ކަނޑައެޅިފައި ނުވާ ކަމަށް ޝާމިލު ވިދާޅުވި އެވެ. އެ ކޮމިޝަނުގެ މެންބަރުންގެ އަގުވައްޓާލުމަށް ވެސް ވަރަށް ގިނަ މަސައްކަތްތަކެއް ކުރާ ކަމަށް ޝާމިލް ތުހުމަތުކުރެއްވި އެވެ.
"އެ ގޮތަށް ހުށަހެޅޭ މައްސަލަތަކުގައި ހާއްސަކޮށް ސިޔާސީ މަތީގައި ތިއްބަވާ، ބޮޑެތި މަގާމުތަކުގައި ތިއްބަވާ، ހަމައެކަނި ސިޔާސީ ބޭފުޅުންނެއް ވެސް ނޫން، މިސާލަކަށް ޖުޑީޝަރީ ކަމަށްވިޔަސް، ކޮމިޝަނުގެ ތެރޭގައި އަޅުގަނޑުމެން ގެންގުޅޭނެ ސްޓްރެޓެޖީއެއް މިވަނީ އީޔޫގެ އެހީގައި އެކުލަވާލެވިފައި،"
އެކަން ތަންފީޒުކުރުން އޮތީ އެންމެ ފަހު މަރުހަލާގައި ކަމަށް ޝާމިލް ވިދާޅުވި އެވެ. އެއަށް އަމަލުކުރަން ފެށުމުން މައްސަލަތަކުގައި ކަން ހިނގާ ގޮތް ރައްޔިތުންނަށް ސާފުވާނެ ކަމަށް ޝާމިލު ވިދާޅުވި އެވެ.
ކޮރަޕްޝަން ޕާސެޕްޝަން އިންޑެކްސްގައި ރާއްޖެއަށް ދަށް ނަތީޖާއެއް ލިބިފައިވާއިރު، ކޮރަޕްޝަނާ ގުޅޭ ގިނަ މައްސަލަތައް އެންޓި ކޮރަޕްޝަން ކޮމިޝަންގައި ތާށިވެފައި ހުރިކަން ފާހަގަކުރެވެ އެވެ. އަދި، ސަރުކާރުން ބޭނުން ވުމުން އިދިކޮޅު ސިޔާސީ މީހުންނާއި ފަނޑިޔާރުންގެ މައްސަލަތައް ތަހުގީގުކުރާ މައްސަލައިގައި ގިނަ ބަޔެއްގެ ފާޑުކިޔުން ވެސް އެ ކޮމިޝަނަށް ވަނީ އަމާޒުވެފަ އެވެ.
