މިއަދުގެ އިރުއޮއްސުނުފަހުން ރައީސުލްޖުމްހޫރިއްޔާ މުހައްމަދު މުއިއްޒު ސޯޝަލް މީޑިއާގައި ކެމްޕޭން ކުރެއްވި މައްސަލަ ބަލާނެ ކަމަށް އިލެކްޝަންސް ކޮމިޝަނުގެ ރައީސް، މުހައްމަދު ޒާހިދު ވިދާޅުވެއްޖެ އެވެ.
ކެމްޕޭން ކުރުން މަނާ ވަގުތުގައި މުއިއްޒު ކެމްޕޭން ކުރެއްވީ މިއަދު ހަވީރު 6:08 ގައި ފޭސްބުކްގައި ކުރެއްވި ޕޯސްޓެއްގަ އެވެ.
އިލެކްޝަންސް ކޮމިޝަނުން މިރޭ ބޭއްވި ނޫސްވެރިންގެ ބައްދަލުވުމަށްފަހު އަދަދު ނޫހުން އެކަމާ ބެހޭގޮތުން ކުރި ސުވާލަކަށް ޖަވާބު ދެއްވަމުން ޒާހިދު ވިދާޅުވީ ގާނޫނުން އެ ކޮމިޝަނާ މަތިކޮށްފައިވާ ގޮތަށް އެ މައްސަލަ ބައްލަވާނެ ކަމަށެވެ.
"އަޅުގަނޑުމެން ބަލާނެ ނޫންތޯ؟ އަޅުގަނޑުމެންނަށް އޭތި ނޯޓިސްއަށް އަތުވެއްޖެއްޔާ އަޅުގަނޑުމެން ބަލާނެ ނޫންތޯ؟ މީހަކު ޝަކުވާއެއް ކޮށްފިއްޔާ ބަލާނެ ނޫންތޯ؟" ޒާހިދު ވިދާޅުވި އެވެ.
މިރޭ ހައެއްގެ ފަހުން މުއިއްޒު ކެމްޕޭން ޕޯސްޓެއް ކުރެއްވުމާ ގުޅޭގޮތުން ސުވާލު ކުރުމުން، އެ މައްސަލަ ސަމާލުކަމަށް އައީ ނޫންތޯ ސުވާލު ކުރުމުން ޒާހިދު ދެއްވީ ގާނޫނީ ގޮތުން ކުރަން ލާޒިމު ކޮށްފައި އޮތް ކަމެއް ނުކޮށް ދޫކޮށްނުލާނެކަމުގެ ޔަގީންކަމެވެ.
"އަޅުގަނޑުމެން އެކަން ކުރާނެ ނޫންތޯ؟ ނުކޮށް ނުހުންނާނެ ނޫންތޯ؟ އެއީކީ ޗޮއިސްއެއް ނޫނެއްނޫންތޯ؟ އަޅުގަނޑުމެން ގާނޫނީ ގޮތުން ކުރަންޖެހޭ ކަމެއް ކުރާނެ ނޫންތޯ؟" ޒާހިދު ވިދާޅުވި އެވެ.
ވޯޓުލާ ދުވަހުގެ ކުރީ ދުވަހުގެ ހަވީރު 6:00 އިން ފެށިގެން ވޯޓުލާ ދުވަހުގެ ފަހު ދުވަހުގެ ހެނދުނު 6:00 އާ ހަމައަށް ކެމްޕޭން ކުރުމަކީ އިންތިހާބުތަކާ ބެހޭ އާންމު ގާނޫނުގައި މަނާ ކަމެކެވެ.
އެ ގާނޫނުގެ 44 ވަނަ މާއްދާގެ (ހ) ގެ 1. ގައި ބަޔާން ކޮށްފައި އޮންނަނީ އިންތިހާބެއްގެ ވޯޓުނަގާ ދުވަހުގެ ކުރީ ދުވަހުގެ ހަވީރު 6:00 އިން ފެށިގެން އިންތިހާބުގެ ވޯޓު ނަގާ ދުވަހުގެ ހެނދުނު 6:00 އާ ހަމައަށް އެއްވެސް މީހަކަށް އެ ގާނޫނުގެ 28 ވަނަ މާއްދާގެ (ށ) ގައި ބަޔާންކުރާ ކަންކަން ނުކުރެވޭނެ ކަމަށެވެ. 28 ވަނަ މާއްދާގެ (ށ) އަކީ އިންތިހާބަކަށް ކުރިމަތިލާފައިވާ މީހުންނަށް ތާއީދު ހޯދުމަށް ކުރެވޭނެ ކަންކަން ބަޔާން ކޮށްފައި އޮންނަ މާއްދާ އެވެ.
އެ މާއްދާގައި ބަޔާން ކޮށްފައި އޮންނަ ކަންކަމުގެ ތެރޭގައި، ވޯޓުލާ ދުވަހުގެ ހަވީރު 6:00 ގެ ފަހުން، ޕާޓީ ނުވަތަ ކެންޑިޑޭޓުންގެ ނިޝާން ޖަހާފައިވާ ތަކެތި ބޭނުންކުރުމާއި ގެންގުޅުމުގެ އިތުރުން ކެންޑިޑޭޓުން އިޝްތިހާރު ކުރުން ހިމެނެ އެވެ.
މިއަދު ހަވީރު އިރުއޮއްސުނުފަހުން މުއިއްޒު ފޭސްބުކްގައި ކުރެއްވި ޕޯސްޓުގައި ވަނީ މާދަމާ ވޯޓުލުމަށް ހިތްވަރު ދެއްވައި، އެމަނިކުފާނުގެ ޕާޓީ، ޕީއެންސީގެ ފޮޓޯތަކެއް ހިއްސާ ކުރައްވައިފަ އެވެ. އަދި، އެ ޕޯސްޓުގައި ޕީއެންސީގެ ކެމްޕޭނުގައި ބޭނުންކުރަމުންދާ ގޮތަށް، ދޫނި އިމޯޖީއަކާއި ހެޔޮ ފާހަގައެއް ޖައްސަވައިފައިވެ އެވެ. "ވޯޓު ދޫންޏަށް" އެއީ ޕީއެންސީން ކެމްޕޭން ސްލޯގަންއެއް ގޮތުގައި ބޭނުންކުރަމުންދިޔަ އިބާރާތެކެވެ.
