ހުއްދަނެތި ބޮޑު އަގުގައި ބޭރު ފައިސާ ގަނެވިއްކުމުގެ ވިޔަފާރިކުރާ ކަމުގެ ތުހުމަތުގައި ބަންގްލަދޭޝްގެ ތިން ރައްޔިތަކު އިމިގްރޭޝަންގެ ބަންދަށް ގެންގޮސްފި އެވެ.
މި މީހުން އަތުލައިގަނެފައިވަނީ ރާއްޖޭގައި ގަވާއިދާ ހިލާފަށް ބޭރު ފައިސާގެ މުއާމަލާތްކުރާ ފަރާތްތަކުގެ މައުލޫމާތު ހިއްސާކުރުމަށް ގާއިމުކޮށްފައިވާ ހޮޓްލައިނަށް ލިބުނު މައުލޫމާތަކާ ގުޅިގެން ފުލުހުން ހިންގި ހާއްސަ މަސައްކަތެއްގެ ތެރެއިންނެވެ.
މި މައްސަލައާ ގުޅިގެން އާމިރު ހުސައިން އާއި އެމްޑީ މީޒާނުއްރަހްމާން އަދި ސިރާޒް ހާން އެވެ. މި ތިން މީހުންނަކީ ވެސް ފުޅާ ދާއިރާއެއްގައި ކަޅު ބާޒާރުގައި ޑޮލަރުގެ މުއާމަލާތް ކުރާ ކަމަށް ތުހުމަތު ކުރެވޭ ބަޔެކެވެ. ފުލުހުން ބުނި ގޮތުގައި މި މީހުންނާ މެދު އަޅާނެ ފިޔަވަޅުތައް ނިންމާނީ ތަހުގީގަށް ލިބޭ އިތުރު މައުލޫމާތާއި ހޯދުންތަކުގެ މައްޗަށް ބިނާކޮށެވެ.
މި އޮޕަރޭޝަން ހިންގީ ކަޅު ބާޒާރުގައި ޑޮލަރު ވިއްކާ ފަރާތްތައް ހޯދުމަށް މިދިޔަ އޮގަސްޓު މަހު ސަރުކާރުން އެކުލަވާލާފައިވާ ގައުމީ ފެންވަރުގެ ހާއްސަ ޓާސްކްފޯހުންނެވެ.
މި ޓާސްކްފޯސް އެކުލަވާލީ ފަހުން އެންމެ ފުރަތަމަ ހައްޔަރުކުރި ހަ ބިދޭސީން ވަނީ ފާއިތުވި ތިން އަހަރެއްހާ ދުވަހުގެ ތެރޭގައި އެ މީހުންގެ އެކައުންޓުތަކުން 1.6 މިލިއަން ޑޮލަރާއި 54 މިލިއަން ރުފިޔާ ދައުރުކޮށްފަ އެވެ. މިދިޔަ މަހުގެ މެދުތެރޭގައި ދެ ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފައިވެ އެވެ.
އޭގެ ފަސް ވަރަކަށް ދުވަސް ފަހުން، ޔޭޔޭ ބްރޭންޑުގެ ސީރިއަލް ޕެކެޓުތަކެއްގެ ތެރޭގައި ގިނަ އަދަދެއްގެ ޑޮލަރާއި އެހެނިހެން ބޭރު ފައިސާ ފޮރުވައިގެން ފުރަން އުޅުނު ބަންގްލަދޭޝްގެ ހަ މީހުން ވަނީ ވެލާނާ އިންޓަނޭޝަނަލް އެއާޕޯޓުން ހައްޔަރުކޮށްފަ އެވެ.
ސަރުކާރުން ބުނެފައި ވަނީ ގަވާއިދާ ހިލާފަށް ބޭރު ފައިސާގެ މުއާމަލާތްކުރާ ފަރާތްތަކާ މެދު ހަރުކަށި ފިޔަވަޅު އަޅަމުން ގެންދާނެ ކަމަށެވެ. ނަމަވެސް މަދު ބިދޭސީންތަކަކާއި ކުންފުނިތަކަކާއި އެންމެ މަނީ އެކްސްޗޭންޖެއް ފިޔަވައި އިތުރު ބައެއްގެ މައްސަލައެއް ބަލައި، ފިޔަވަޅެއް އެޅި ކަމަކަށް ނުބުނެ އެވެ.
