މާދަމާ ބާއްވާ ލޯކަލް ކައުންސިލް އިންތިހާބާއި ރައްޔިތުންގެ މެދުގައި ނަގާ ފެންނަ ނުފެންނަ ވޯޓު (ރެފެރެންޑަމް) އާ ގުޅިގެން އިދިކޮޅުގެ ވޯޓުތައް ގަންނަން ސަރުކާރުން ބޮޑެތި އަދަދުތަކުން ފައިސާ ހުށަހަޅަމުންދާ ކަމަށް ކުރެވޭ ތުހުމަތުތަކުގެ އަޑު ގަދަވެއްޖެ އެވެ.
އަދަދު އާ ވާހަކަދެއްކި އިދިކޮޅު ކެންޑިޑޭޓަކު ބުނީ ސަރުކާރުން ވޯޓު ގަންނަން ސަރުކާރުން 75،000ރ. އާ ހަމައަށް ފައިސާ ހުށަހަޅަމުންދާ ކަމަށާއި ޝަރުތު ކުރަމުންދަނީ ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ކެންޑިޑޭޓުންނަށް ފައިދާވާ ގޮތަށް ވޯޓު ދިނުމަށް ކަމަށެވެ.
"ވޯޓު ލާން ދަންޏާ އެބަ ދޭ 25،000ރ އާއި ލައްކައެއްހާ ރުފިޔާ ވެސް. ގަނޑުކޮށް ވެސް އެބަ ފައިސާ ދޭ 10 ވަރަކަށް މީހުންވިއްޔާ. ބޮލަކަށް އެބަދޭ 25،000ރ. ވެސް،" އޭނާ ބުންޏެވެ.
އިދިކޮޅު މީހުންގެ ވޯޓުތައް ސަރުކާރުން ދެނެގަނެ އެ ވޯޓުތައް ހޯދުމަށް ސީދާ އެމީހުންނަށް ގުޅައި ބައްދަލުކުރަމުންދާ ކަމަށާއި ބައެއް މީހުންގެ ގޭގެއަށް ގޮސް ނަގުދު ފައިސާއިންވެސް ދީފައި އެބަހުރި ކަމަށް އެ ކެންޑިޑޭޓު ބުންޏެވެ.
މީގެ އިތުރުން އޭނާ ބުނީ އިދިކޮޅު މީހުންގެ އައިޑީކާޑުތައް ގަތުމަށް 5،000ރ. އާއި 25،000ރ. އާ ދެމެދުގެ ފައިސާ ހުށަހަޅަމުންދާ ކަމަށާއި އެންމެ ކުަޑަކޮށް 5،000ރ. ހުށަހަޅަނީ މަސްތުވާތަކެތި ބޭނުންކުރާ މީހުންނަށް ކަމަށެވެ.
"އައިޑީކާޑު އެބަ ގަނޭ 5،000ރ. އާއި 25،000ރ. އާ ދޭތެރޭގައި. މަސްތުވާތަކެތި ބޭނުންކުރާ މީހުންގެ އައިޑީކާޑު ގަންނަނީ 5،000ރ. އަށް. މަސްތުވާތަކެތި ބޭނުން ނުކުރާ ރަނގަޅު މީހުންގެ އައިޑީކާޑުތައް 25،000ރ. އާ ހަމައަށް އެބަ ގަނޭ،" އޭނާ ބުންޏެވެ.
އޭސީސީއަށް ހުށަހަޅާ މައްސަލަތައް ނުބަލާތީ އިއްޔެ އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ވަނީ އެންޓި ކޮރަޕްޝަން ކޮމިޝަނަށް ދޮށަށް އެއްވެ، އެ ކޮމިޝަނުގެ ރައީސް އަހްމަދު ޝާމިލުގެ އިސްތިއުފާއަށް ގޮވާފަ އެވެ.
ވޯޓު ގަންނަ ކެންޑިޑޭޓުންނަކީ ރައްޔިތުންގެ ބާރުވެރިކަން ނިގުޅައިގަނެ އެ މީހުންގެ އަމިއްލަ މަސްލަހަތަށް މަސައްކަތް ކުރާ ބައެއް ކަމަށާއި ކައުންސިލް އިންތިހާބުގެ ދުވަސްވަރު ތާއީދު ހޯދުމަށް ރިޝްވަތު ދީފި ނަމަ ރިޕޯޓު ކުރުމަށް އޭސީސީން ޖެނުއަރީ 12، ގައި އެދުނެވެ.
ނަމަވެސް އިންތިހާބާ ގުޅިގެން ސަރުކާރުން ރިޝްވަތު ދެމުންދާ ކަމަށް ކުރެވޭ ތުހުމަތުތަކާ ގުޅޭ އެއްވެސް މައްސަލައެއް އޭސީސީން އަމިއްލައަށް އިސްނަގައިގެން ބަލަމުނެއް ނުދެ އެވެ.
އޭސީސީއަށް އެތައް މައްސަލައެއް ރިޕޯޓުކޮށްފައިވީ ނަމަވެސް، މިހާތަނަށް އެއްވެސް މައްސަލައެއްގައި ގޮތެއް ނިންމިކަން އެނގިފައެއް ނުވެ އެވެ. އޭގެއިތުރުން އެއްވެސް މައްސަލައަކާ ގުޅިގެން ކަންބޮޑުވާ ކަމެއް ވެސް ހާމަކޮށްފަ އެވެ.
