ރަސްމާލެ މަޝްރޫއުގެ ދަށުން ތަންތަން ގަންނަ ފަރާތްތަކަށް ކުލީގެ މުއްދަތު އާކުރުމުގެ ނުވަތަ އެ މުދާ ދާއިމީ ގޮތެއްގައި މިލްކުކޮށްގެން ތިބުމުގެ އެއްވެސް އިހުތިޔާރެއް ނޯންނާނެ ކަމަށް ހައުސިން މިނިސްޓަރު އަބްދުﷲ މުއްތަލިބު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ ރަސްމާލެ މަޝްރޫއަކީ އިޒްރޭލުގެ ރައްޔިތުން ރާއްޖޭގައި ވަޒަންވެރިކުރުވަން ހިންގާ މަޝްރޫއެއް ކަމަށް ބުނެ ދެކެވޭ ވާހަކަތަކަށް ރައްދު ދެއްވައި އޭނާގެ ލިންކްޑްއިން އެކައުންޓުގައި ޝާއިއުކުރެއްވި ލިޔުމެއްގަ އެވެ.
މުއްތަލިބު ވިދާޅުވީ ރަސްމާލެއިން ބިން ނުވަތަ ޔުނިޓްތައް ދޫކުރާނީ ވަކި މުއްދަތަކަށް ކަމަށާއި، އެއްވެސް ފަރާތަކަށް އެތަންތަން ފްރީހޯލްޑް ނުވަތަ އަމިއްލަ މިލްކަކަށް ނުހެދޭނެ ކަމަށެވެ. އަދި ބިން އޮންނާނީ ދިވެހި ދައުލަތުގެ ފުރިހަމަ ބާރުގެ ދަށުގައި ކަމަށް އޭނާ ފާހަގަކުރެއްވި އެވެ.
"ކުލީގެ މުއްދަތު އާކުރުމާއި ދާއިމީކޮށް މުދާ މިލްކުކުރުމުގެ އިހުތިޔާރެއް އެއްވެސް ފަރާތަކަށް ނޯންނާނެ،" މުއްތަލިބު ވިދާޅުވި އެވެ.
ރަސްމާލެއާ ގުޅޭގޮތުން އާންމުންގެ މެދުގައި އޮތް ކަންބޮޑުވުންތަކަކީ ފަލަސްތީނުގެ މައްސަލައާ ގުޅިފައިވާ ކަންކަންކަން ފާހަގަކުރައްވަމުން މުއްތަލިބު ވިދާޅުވީ، އިޒްރޭލުގެ ރައްޔިތުން ވަޒަންވެރިކުރުވަން އުޅޭ ކަމަށް ބުނެ ފަތުރަނީ އެއްވެސް އަސާސެއް ނެތް ބިރުވެރިކަމެއް ކަމަށެވެ.
އޭނާ ވިދާޅުވި ގޮތުގައި ޒަޔަނިސްޓުންގެ މަޝްރޫއަކީ އެހެން ގައުމުތަކުގައި ތިބި ޔަހޫދީން އިޒްރޭލަށް ގެންގޮސް ވަޒަންވެރިކުރުވުމެވެ. އަދި މިނިވަން މުސްތަގިއްލު ގައުމެއްގައި ބޭރު މީހުން ގެދޮރު ގަތުމުން އެފަދަ އަތްގަދަކުރުމެއް ހިނގާފައިވާ ތާރީހީ އެއްވެސް މިސާލެއް ދުނިޔޭގެ އެއްވެސް ތަނަކުން ފެންނަން ނެތް ކަމަށް ވެސް ވިދާޅުވި އެވެ.
މި ސަރުކާރުން އިޒްރޭލު ޕާސްޕޯޓު މަނާކުރުމަށް ނިންމާފައިވާ ނިންމުމަށް އިޝާރާތް ކުރައްވައި މުއްތަލިބު ވިދާޅުވީ، ރިއަލް އެސްޓޭޓް މުއާމަލާތެއްގެ ތެރެއިން ސިއްރިޔާތުގައި އެ އުސޫލު ދޫކޮށްލާނެ ކަމަށް ބުނުމަކީ ބުރަދަނެއް ހުރި ވާހަކައެއް ނޫން ކަމަށެވެ. އަދި ރަސްމާލެ މަޝްރޫއު ހިންގާ އީގަލް ހިލްސް އިން ވެސް ރާއްޖޭގެ އުސޫލުތަކަށް ބޯލަނބާނެ ކަމުގެ އިގުރާރުވެފައިވާ ކަމަށް އޭނާ ވިދާޅުވި އެވެ.
ރަސްމާލޭގެ ރައްކާތެރިކަން ކަށަވަރުކުރުމަށް އަޅާނެ ފިޔަވަޅުތަކުގެ ތަފްސީލު ދެއްވަމުން މުއްތަލިބު ވިދާޅުވީ، އިޒްރޭލުގެ އެއްވެސް ރައްޔިތަކަށް ނުވަތަ އެ ގައުމުގެ ކޮންޓްރޯލް އޮންނަ ފަރާތަކަށް މި މަޝްރޫއުގެ އެއްވެސް މަރުހަލާއެއްގައި ބައިވެރިނުވެވޭނެ ގޮތަށް އުސޫލުތައް ހަރުދަނާ ކުރާނެ ކަމަށެވެ. އަދި މުދާ ގަންނަ ފަރާތްތަކުން އެ މީހުންގެ ރައްޔިތުކަން ހާމަކޮށް އިގުރާރުވާން ޖެހޭނެ ކަމަށާއި، ދޮގު މައުލޫމާތު ދީފި ނަމަ އެއްބަސްވުން ބާތިލުކޮށް މުދާ ދައުލަތަށް ނެގޭނެ ކަމަށް ވެސް ވިދާޅުވި އެވެ.
މީގެ އިތުރުން، ރަސްމާލޭން ތަނެއް ގަތުމަކީ ދާއިމީ ރެސިޑެންސީއެއް ނުވަތަ ރައްޔިތުކަމެއް ލިބޭނެ ކަމެއް ނޫން ކަމަށާއި، މި މަޝްރޫއުގައި އަބަދުވެސް އިސްކަންދޭނީ ދިވެހިންނަށް ކަމަށް މުއްތަލިބު ވިދާޅުވި އެވެ. އޭނާ ވިދާޅުވީ އަމާޒަކީ ކޮންމެ ފިޔަވަހީގައި ވެސް ޔުނިޓްތަކުގެ ބޮޑު ބައެއް ދިވެހިންނަށް ގަނެވޭނެ ގޮތް ހެދުން ކަމަށެވެ.
ރަސްމާލެއިން ވިއްކާ ތަންތަނުގައި އެކަކަށް ނޫނީ ވަކި ގައުމަކަށް ނިސްބަތްވާ ބަޔަކަށް މާ ގިނަ ތަންތަން ގޮތަކަށް "އޯނާޝިޕް ކެޕް" ތަކެއް ތައާރަފުކުރާނެ ކަމަަށް ވެސް މުއްތަލިބު ވިދާޅުވި އެވެ.
މުއްތަލިބުގެ ލިޔުން ނިންމަވާލެއްވީ ރާއްޖޭގެ އިގްތިސާދު އަމިއްލަ ފައިމައްޗަށް ތެދުވުމުގެ މުހިންމުކަމުގެ މައްޗަށް އަލިއަޅުވާލައްވަމުންނެވެ. އޭނާ ވިދާޅުވީ ރާއްޖޭގެ އަމިއްލަ އިގުތިސޯދު ބިނާކޮށްގެން މެނުވީ ފަލަސްތީނު ފަދަ މައްސަލަތަކުގައި ރާއްޖެއިން ގެންގުޅޭ ސާބިތު އުސޫލުތައް ދެމެހެއްޓެން ނެތް ކަމަށެވެ.
ރަސްމާލެ މަޝްރޫއުގެ މައްސަލައިގައި އެއްވެސް ގޮތަކުން ގޯހެއް ނޫޅޭނެ ކަމަށް ބުނެ ސަރުކާރުން ޔަގީންކަން ދެމުން ދިޔަ ނަމަވެސް، މި ޕްރޮޖެކްޓާ ދެކޮޅު އަޑުތައް އަންނަނީ ގަދަވަމުންނެވެ.
