ކ. ހުރާއިން ގޯތި ދޫކުރުމަށް ނިމިދިޔަ ދައުރުގެ ކައުންސިލުން މިދިޔަ އަހަރު އެކުލަވާލި އުސޫލަށް ޕީއެންސީގެ މެޖޯރިޓީ އޮތް އައު ކައުންސިލުން ބޮޑެތި ބަދަލުތައް ގެނެސް، ގޯއްޗަށް ކުރިމަތިލުމުގެ ފުރުސަތު އަލުން ހުޅުވާލައިފި އެވެ.
ހުރާ ކައުންސިލުން ނެރުނު އައު އުސޫލުގައި އަލަށް ހިމަނާފައިވަނީ ގޯއްޗަށް އެދޭ މީހާގެ އަނބިމީހާ ނުވަތަ ފިރިމީހާގެ ނަމުގައި ހުރާއިން ބަންޑާރަ ގޯއްޗެއް ނުވަތަ އަމިއްލަ ގޯއްޗެއް ލިބިފައި ވާނަމަ ނުވަތަ އަމިއްލަ ފަރާތަކުން ގޯއްޗެއް ނުވަތަ ބަންޑާރަ ގޯއްޗެއް ނުވަތަ ގޯއްޗަކުން ބައެއް ނުވަތަ އިމާރާތެއްގެ ފްލެޓަކުން ނުވަތަ ގޯއްޗަކުން 600 އަކަފޫޓަށް ވުރެ ބޮޑުބައެއް ލިބިފައިވާނަމަ 60 ޕޮއިންޓް އުނިވާނެ ކަމަށެވެ.
ރަށުގައި ދިރިއުޅޭކަމަށް ހެކިން ސޮއިކޮށްފައިވާ ލިޔުން ލާފައިވާ ނަމަވެސް، އެކަން އިތުރަށް ތަހުގީގު ކުރުމުގެ ފުރުސަތު ކޮމިޓީގެ މެންބަރުންނަށް ލިބިގެންވާ ކަމަށް ވެސް ވަނީ ކަނޑައަޅާފަ އެވެ. ހުރާ ކައުންސިލުން ބުނީ މި އުސޫލުގެ މަގްސަދަކީ ކ. ހުރާގައި އާއިލާއާއެކު ދިރިއުޅޭ ފަރާތްތަކަށް ގޯތި ދިނުމުގައި އިސްކަން ދިނުން ކަމަށެވެ.
މި ގޮތުން އުފަންވީއްސުރެ ހުރާގެ ރަށްވެއްސެއްނަމަ ޕޮއިންޓް ދިނުމުގެ އުސޫލުގެ ދަށުން 35 ޕޮއިންޓް ދޭން ވަނީ ނިންމާފަ އެވެ. ކުރިން އުސޫލު އޮތްގޮތުން ހުރާގެ ރަށްވެހިންނަށް ލިބެނީ 30 ޕޮއިންޓެވެ.
ހުރާއިން ދޫކުރުމަށް ހަމަޖެހިފައި ވަނީ 1،500 އަކަފޫޓުގެ 150 ގޯއްޗެވެ. ގޯއްޗަށް ކުރިމަތިލާން ހުޅުވާލީ އޮކްޓޯބަރު 11، 2026 އިން ފެށިގެން އޮކްޓޯބަރު 15، 2026، ވާ ބުރާސްފަތި ދުވަހުގެ މެންދުރު 12:00 ގެ ނިޔަލަށެވެ. އެގޮތުން ފޯމު ބަލައިގަތުމަށް ހަމަޖެހިފައިވަނީ ކޮންމެ ދުވަހެއްގެ ހެނދުނު 9:30 އިން ފެށިގެން މެންދުރު 12:00 އަށެވެ.
ފޯމް ހުށަހެޅުމުގެ ފުރުސަތު އަލުން ހުޅުވާލިޔަސް، ކުރިން ލާފައިވާ އެއްވެސް ފޯމެއް ބާތިލުނުވާނެ ކަމަށް ކައުންސިލުން ބުންޏެވެ. ނަމަވެސް ފޯމުތަކަށް މާކްސް ދިނުމުގައި ބަލާނީ އިސްލާހު ކުރެވިފައިވާ އުސޫލަށެވެ.
މީގެއިތުރުން ކުރިން ފޯމު ލާފައިވާ މީހަކު އަލުން ފޯމުލާނަމަ ކުރިން ހުށަހެޅި ފޯމު ބާތިލުވާއިރު، އިއުލާނާ ގުޅިގެން ހުށަހަޅާ މާކްސް ދިނުމާއި ރެކޯޑު ސާފުކުރުމުގައި ބަލާނީ އޮގަސްޓް 3، 2025، ގައި ކުރި އިއުލާނުގެ ތާރީހާ ހަމައަށެވެ.
ހުރާގެ ނިމިދިޔަ ކައުންސިލުން ގޯތި ދޫކުރުމަށް ހުޅުވާލުމާ ގުޅިގެން ގިނަ ބަޔަކު ފޯމު ހުށަހެޅި އެވެ. އެގޮތުން އެ ފޯމުތައް އިވެލުއޭޓް ކުރުމުގެ މަސައްކަތް ގާތްގަނޑަކަށްހެން ކައުންސިލުން އޮތީ ނިންމާފަ އެވެ.
ނިމިދިޔަ ދައުރުގެ ކައުންސިލުން ހުރާއިން ގޯތި ދޫކުރުމުގެ އުސޫލު ޖޫން 23، 2025، ގައި އާންމުކުރި އެވެ. އެއަށްފަހު ގޯއްޗަށް ކުރިމަތިލާން އޮގަސްޓް 25، 2025، އިން ފެށިގެން ސެޕްޓެމްބަރު 23، 2025، ގެ ނިޔަލަށް ހުޅުވާލި އެވެ. އެއަށްފަހު މިދިޔަ ދައުރުގެ ކައުންސިލުން ދެ ފަހަރެއްގެ މަތިން ގޯތި ދިނުމުގެ އުސޫލަށް ބަދަލުގެނަ އެވެ.
