ޖަރުމަނު ސަރުކާރުން ރާއްޖޭގައި ހުންނަ އެ ގައުމުގެ ކޮންސުލޭޓު އޮފީސް ބަންދުކުރީ، ދިވެހި ސަރުކާރުން ނުފޫޒު ފޯރުވަން އުޅުމުން ކަމަށް ކުރީގެ ރައީސް އަދި އެމްޑީޕީގެ ޗެއާޕާސަން މުހައްމަދު ނަޝީދު ތުހުމަތުކުރައްވައިފި އެވެ.
މިކަމާ ގުޅޭގޮތުން ނަޝީދު އެކްސްގައި ވިދާޅުވީ، ޖަރުމަނު ސަރުކާރުން ރާއްޖޭގައި ހުންނަ އެ ގައުމުގެ ކޮންސުލޭޓް އޮފީސް ބަންދުކުރަން ނިންމުމަކީ ނުހަނު ކަންބޮޑުވާން ޖެހޭ ކަމެއް ކަމަށެވެ. މިއީ އަނެއްކާ ވެސް ސަރުކާރުގެ ނުރަނގަޅު ސިޔާސަތުތަކުގެ ސަބަބުން ދިމާވި ކަމެއްގެ ގޮތުގައި އެމަނިކުފާނު ސިފަކުރެއްވި އެވެ.
ނަޝީދު ތުހުމަތުކުރެއްވި ގޮތުގައި، ސަރުކާރުން ބޭނުންވީ ރާއްޖޭގައި ހުންނަވާ އޮނަރަރީ ކޮންސުލްގެ މަގާމަށް އެ މީހުން ބޭނުންވާ ވަކި މީހަކު ހަމަޖެއްސުމަށެވެ. އަދި މިކަމާ މެދު ޖަރުމަނު ސަރުކާރުން ކަންބޮޑުވުން ފާޅުކޮށްފައިވާ ކަމަށް ވެސް އެމަނިކުފާނު ވިދާޅުވި އެވެ.
މި މައްސަލައާ ގުޅިގެން ލަންކާގައި ހުންނަ ޖަރުމަނު އެމްބަސީން ނެރުނު މައުލޫމާތުގައި ބުނެފައިވަނީ، ވަކި ގޮތެއް އަންގަންދެން ރާއްޖޭގައި ހުންނަ އޮނަރަރީ ކޮންސުލްގެ އޮފީސް ބަންދުކުރަން ޖެހިފައިވާ ކަމަށެވެ. އެ ގައުމުން އިތުރު އެއްވެސް މައުލޫމާތެއް ހާމަނުކުރެ އެވެ.
ޖަރުމަނު ސަރުކާރުން ރާއްޖޭގައި ކޮންސުލް އޮފީހެއް ހުޅުވީ 2019 ގައި އެވެ. އޭރުން ފެށިގެން ޖަރުމަނުގެ އޮނަރަރީ ކޮންސުލްގެ މަގާމުގައި ހުންނަވަނީ ޔުނިވާސަލް އާއިލާގެ ސަންޖޭ އިބްރާހިމް މަނިކެވެ.
ޖަރުމަނަކީ ޔޫރަޕުގެ ގައުމުތަކުގެ ތެރެއިން ރާއްޖޭގައި ވިސާ އެޕްލިކޭޝަން ސެންޓަރެއް ހިންގާ ހަމައެކަނި ގައުމަށް ވާއިރު، މީގެ ސަބަބުން އެ ހިދުމަތަށް ބުރޫއަރާފާނެ ކަމަށް ބެލެވެ އެވެ. ނަމަވެސް، ދެ ގައުމުގެ ސަަރުކާރުން ވެސް ރަސްމީކޮށް އެއްޗެއް ނުބުނާތީ އެ ސެންޓަރަށް ވާގޮތެއް އަދި ނޭނގެ އެވެ.
