ދިވެހިންނަށް ބޯހިޔާވަހިކަން ދޭން ކަމަށް ބުނެ ހިއްކަމުންދާ ފުށިދިއްގަރުފަޅުން އެއްބައި އިޒްރޭލަށް ވާގިވެރިވާ ޔޫއޭއީގެ އީގަލް ހިލްސްއަށް ދޫކޮށްލުމަށް ފަހިކުރާ ބިލު (ރިއަލް އެސްޓޭޓް ބިލް) ހިމެނޭ ގޮތަށް ހަތަރު ބިލެއް މިއަދު މަޖިލީހަށް ހުށަހަޅައިފި އެވެ.
ރައްޔިތުންގެ މަޖިލީހުގެ މިއަދުގެ އެޖެންޑާގައި ހިމަނާފައިވާ ހަތަރު ބިލުގެ ތެރެއިން ރަސްމާލެ ވިއްކާލާ ބިލު ސަރުކާރުގެ ފަރާތުން ހުށަހެޅުއްވީ ފެންވޭރު އުތުރު ދާއިރާގެ މެންބަރު އަހްމަދު އައިފާން އެވެ.
ސަރުކާރުގެ ފަރާތުން ދެން މަޖިލީހަށް ހުށަހެޅުއްވީ ގުރައިދޫ ދާއިރާގެ މެންބަރު ހަނާން މުހައްމަދު ރަޝީދު ހުށަހެޅުއްވި މަރުގެ އަދަބު ކަނޑައެޅުމާއި ތަންފީޒުކުރުމާ ބެހޭ ބިލާއި ވިލިމާލެ ދާއިރާގެ މެންބަރު މުހައްމަދު އިސްމާއިލް ހުށަހަޅުއްވާ ނަމާއި އަބުރު ރައްކާތެރިކުރުމުގެ ހައްގުގެ ބިލުގެ އިތުރުން ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދު ހުށަހަޅުއްވާ ދިވެހިރާއްޖޭގެ އިމިގްރޭޝަނުގެ ބިލެވެ.
ސަރުކާރުގެ ފަރާތުން ހުށަހެޅުއްވި މި ހަތަރު ބިލުގެ ފުރަތަމަ ކިޔުން އިއްވުން ޖަލްސާއަށް އެޖެންޑާކޮށްފައިވާއިރު، އަންނަ އަހަރަށް ލަފާކުރާ ދައުލަތުގެ ބަޖެޓުގެ ބަހުސްވެސް މިއަދު ފެށުމަށް ވަނީ ތާވަލުކޮށްފަ އެވެ.
ރަސްމާލެ ވިއްކާލުމުގެ ބިލު ސަރުކާރުގެ ފަރާތުން ހުށަހަޅުއްވާފައި މިވަނީ އެފަދަ ބިލެއް ހުށަހަޅާނެކަން ސަރުކާރުން އިއުލާނު ކުރުމަށްފަހު އެވެ. އެފަދަ ބިލެއް ހުށަހަޅަން އުޅޭކަން ހާމަކުރީ ރަސްމާލެ ވިއްކާލުމުގެ ފުރަތަމަ އެއްބަސްވުމުގައި ސޮއިކުރުމަށްފަހުކަން ފާގަހަކުރެވެ އެވެ. މި ބިލަށް ރައްޔިތުންގެ ހިޔާލު ހޯދުމަށް ދެ ހަފުތާގެ ވަގުތު ދެއްވާނޭކަމަށް ރައީސް މުއިއްޒު ވަނީ ވިދާޅުވެފަ އެވެ.
ރަސްމާލެ އެއްބަސްވުމުގެ ކުރިން ހަދާ ރިއަލް އެސްޓޭޓު ގާނޫނަށް ހިޔާލު ހުށަހަޅަން ދެ ހަފުތާ ދޭނަން: މުއިއްޒު
ރަސްމާލެ މަޝްރޫއުގެ އެއްބަސްވުމުގައި ސޮއިކުރުމުގެ ކުރިން، އަލަށް އެކުލަވާލާ ރިއަލް އެސްޓޭޓް ބިލަށް ހިޔާލު ހުށަހަޅަން އާންމުންނަށް ދެ ހަފުތާގެ މުއްދަތެއް ދެއްވާނެ ކަމަށް ރައީސް މުއިއްޒު ވިދާޅުވެއްޖެ. އަދި މަޝްރޫއުގެ އެއްބަސްވުން މަޖިލީހުގެ ކޮމިޓީއަކަށް ހުށަހަޅައިގެން ދެފުށް ފެންނަ ގޮތަކަށް ކުރިއަށް ގެންދާނެ ކަމަށް ވެސް ވިދާޅުވި.
ދައުލަތުން ބޮޑު ހަރަދުކޮށްގެން ހިއްކި ރަސްމާލޭގެ ބިމުން 500 ހެކްޓަރު އީގަލް ހިލްސްއަށް ދޫކޮށްލުމަށް ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ރަސްމާލޭގެ އެއްބައި އީގަލް ހިލްސްއަށް ދޫކޮށްލާތީ އާއި އެ ކުންފުނީގެ ވެރިޔާ އަލައްބާރު އަކީ އިޒްރޭލްގެ އެކުވެރިއެއް އަދި މަދަދުވެރިއަކަށް ވުމުން ދީނީ އިލްމުވެރިންނާއި އިދިކޮޅު ޕާޓީތަކުން ދަނީ ކަންބޮޑުވުން ފާޅުކުރަމުންނެވެ. އެ މަޝްރޫއުގެ ސަބަބުން ރާއްޖޭގެ އެހެން ދީންތަކުގެ މީހުން ރާއްޖޭގައި ވަޒަންވެރިވުމަށް ފުރުސަތު ހުޅުވިގެންދާތީވެ ރައްޔިތުންގެ ފެންނަ ނުފެންނަ ވޯޓެއް ނެގުމަށް، މި މަޝްރޫއުއާ ދެކޮޅަށް މަސައްކަތްކުރާ "ގައުމީ ހަރަކާތުން" އަދި އިދިކޮޅު އެމްޑީޕީން ވަނީ ގޮވާލާފަ އެވެ.
