ރާއްޖެއިން އިޒްރޭލަކީ ގައުމެއް ގޮތުގައި ބަލައި ނުގަނެ އޮއްވައި، އެ ގައުމުގެ ވާހަކަ ގާނޫނުއަސާސީގައި ލިޔުމަކީ އިޒްރޭލު ގައުމެއްގެ ގޮތުގައި ބަލައިގަތުން ކަމަށް "ދިވެހިންގެ ބިން ދިވެހިންނަށް" ގައުމީ ހަރަކާތުގެ ތަރުޖަމާނު އަލީ ހުސައިން ރޭ ވިދާޅުވެއްޖެ އެވެ.
ގައުމީ ހަރަކާތުން ބޭއްވި މުޒާހަރާގައި އަލީ ހުސައިން ވިދާޅުވީ އިޒްރޭލަކީ ގައުމެއް ގޮތުގައި ދިވެހި ރައްޔިތުން ގަބޫލުނުކޮށް، ދިވެހިން ގަބޫލުކުރަނީ އެއީ ޒަޔަނިސްޓް އެންޓިޓީއެއް ގޮތުގައި ކަމަށެވެ. ނަމަވެސް އިޒްރޭލުގެ ރައްޔިތުންނަށް ރާއްޖެއަށް ނާދެވޭނެ ވާހަކަ ގާނޫނުގައި ލިޔުމުން އެއީ އިޒްރޭލަކީ ގައުމެއްގެ ގޮތުގައި ރާއްޖެއިން ބަލައިގަތުން ކަމަށް އޭނާ ވިދާޅުވި އެވެ.
"ރައީސް މުއިއްޒު މި ކުރެއްވި ކަމަކީ ދިވެހި ދައުލަތުން އިޒްރޭލު ބަލައިގަތުން. ބަލައިގަތީމަ ނޫންތޯ އިޒްރޭލުގެ ވާހަކަ ގާނޫނެއްގައި، ބިލެއްގައި މި ލިޔަނީ ނާދެވޭނޭ ކިޔާފައި ކިޔާފައި. މިއީ މިހާތަނަށް ދިވެހި ރައްޔިތުން އިޒްރޭލު އެއީ ގައުމެއްގެ ގޮތުގައި ބަލައެއް ނުގަނޭ. އަޅުގަނޑުމެން ގަބޫލުކުރަނީ އެއީ ޒައިނިސްޓު އެންޓިޓީއެއްގެ ގޮތުގައި،" އަލީ ހުސައިން ވިދާޅުވި އެވެ.
"އިސްލާމީ ގިނަ ގައުމުތަކުން އީރާން އަދި ސައުދީ އަރަބިއްޔާ ފަދަ އަދި އެހެންވެސް އިސްލާމީ ގައުމުތަކުން އިޒްރޭލު ބަލައެއް ނުގަނޭ. އެ ތަނަށް ކިޔަނީ ޒައިނިސްޓު އެންޓިޓީއެއް. އެ ތަނުގައި ވަޒަންވެރިވެގެން އުޅޭ މީހުންގެ މައްޗަށް ނުފޫޒު ފޯރުވަނީ."
އަލީ ހުސައިން ވިދާޅުވީ މަޖިލީހަށް ހުށަހަޅާފައިވާ ރިއަލް އެސްޓޭޓް ބިލުން ރާއްޖޭގައި އެހެން ދީންތަކުގެ މީހުންނަށް ވަޒަންވެރިވުމުގެ ފުރުސަތު ފަހިވުން ނުހުއްޓުވޭ ކަމަށެވެ. އޭގެއިތުރުން އިޒްރޭލު މީހުންނަށް ރާއްޖެއަށް ނާދެވޭނެ ކަމަށް ބުނާއިރު، ފަލަސްތީނަށްވެސް ޒަޔަނިސްޓް އެންޓިޓީން މީހުން ވަޒަންވެރިކުރުވީކަން އޭނާ ފާހަގަކުރެއްވި އެވެ.
"އެ ބިލުން ދިވެހިރާއްޖޭގައި ގައިރުދީންތަކުގެ މީހުން، މީހުން ވަޒަންވެރިވުން ނުވަދިހަނުވަ އަހަރުން ނުވަދިހަނުވަ އަހަރުން އާކުރެވޭ ގޮތަށް އޮތުން މަނަލެއް ނުކުރޭ. ދެން އިޒްރޭލު މީހުންނަށް ނާދެވޭނޭ ބުނާއިރު، މިހާރު ފަލަސްތީނުގެ ބިމުގައި ވަޒަންވެރިވެގެން އެ އުޅޭ ހުރިހާ އެންމެންނަކީ އިޒްރޭލަށް ނިސްބަތްވާ މީހުންނެއް ނޫނޭ. އެ ތަނުގައި އޮތް ޒައިނިސްޓު އެންޓިޓީން އެ ތަނަށް ސެޓްލާސްގެ ގޮތުގައި ދުނިޔޭގެ އެ ތަންމިތަނުގައި ތިބި ޒައިނިސްޓުން ގެންނަނީ،" އަލީ ހުސައިން ވިދާޅުވި އެވެ.
އޭގެއިތުރުން އިޒްރޭލު ގައުމެއްގެ ގޮތުގައި ބަލައިގަނެފައިވާ މަދު ގައުމުތަކުގެ ތެރޭގައި ޔޫއޭއީ ހިމެނޭކަން އަލީ ހުސައިން ފާހަގަކުރެއްވި އެވެ. ރަސްމާލެއިން އެއްބައި ދޫކޮށްލަން ހަމަޖެހިފައިވަނީ ޔޫއޭއީގެ ކުންފުންޏެއް ކަމަށްވާ އީގަލް ހިލްސްއަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރުން ހުއްޓާލިކަން ސަރުކާރުން ހާމައެއް ނުކުރެ އެވެ. ދާއިމީ އެއްބަސްވުމުގައި މި ނޮވެމްބަރު މަހު ސޮއިކުރާނެ ކަމުގެ އަޑުތައް ވަނީ ފެތުރިފަ އެވެ.








