ރަސްމާލޭގައި ޔޫއޭއީގެ އީގަލް ހިލްސްއިން ހިންގާ ޕްރޮޖެކްޓުގެ އެއްބަސްވުމުގައި ސޮއިކުރުމުގެ ކުރިން އެކުަލަލާވަން ޖެހޭ ރިއަލް އެސްޓޭޓު ގާނޫނުގެ ބިލަށް ހިޔާލު ހުށަހަޅަން ރައްޔިތުންނަށް ދެ ހަފުތާގެ މުއްދަތެއް ދެއްވާނެ ކަމަށް ރައީސް މުހައްމަދު މުއިއްޒު އިއްޔެ ވިދާޅުވެއްޖެ އެވެ.
މި ރިއަލް އެސްޓޭޓު ގާނޫނަކީ، ބަންޑާރަނައިބު އަހުމަދު އުޝާމް ވިދާޅުވެފައިވާ ގޮތުގައި، ރަސްމާލޭގައި ހިންގާ ޕްރޮޖެކްޓުންގެ އިތުރުން މުޅި ރާއްޖޭގައި އެ ކަހަލަ ޕްރޮޖެކްޓުތައް ހިންގޭ ގޮތަށް އެކުލަވާލާ ގާނޫނެކެވެ. އޭނާ ވިދާޅުވީ މި ގާނޫނު ބޭނުންވަނީ ޓޫރިޒަމް ގާނޫނުގެ ދަށުން ކުރިއަށް ގެންގޮސްފިނަމަ މުއްދަތު ހަމަވުމުން އިމާރާތްތަކުގެ އަގު ސަރުކާރުން އިންވެސްޓަރަށް ބަދަލުގެ ގޮތުގައި ދޭން ޖެހޭތީ ކަމަށެވެ.
މި ގާނޫނު ވުޖޫދަށް ނުގެނެސް ރަސްމާލެ އެއްބަސްވުމުގައި އީގަލް ހިލްސްއާއެކީ ސޮއިނުކުރާނެ ކަމަށް ސަރުކާރުން ވަނީ ބުނެފަ އެވެ. ނަމަވެސް މިއަދާ ހަމައަށް މަޖިލީހަށް މި ބިލެއް ނާދެ އެވެ.
މި ބިލުގައި އޮތް އެއްޗެއް ނޭނގޭތީ ސުވާލުތަކެއް އުފެދިފައި ވަނިކޮށް، ޕީއެސްއެމްގެ "ނޭޝަން ޗެޓް" ޕޮޑްކާސްޓުގައި ވާހަކަ ދައްކަވަމުން މުއިއްޒު ވިދާޅުވީ ބިލު މަޖިލީހަށް ފޮނުވުމުން އާންމުންނަށް ބިލު ފެންނާނެ ކަމަށެވެ. އަދި، އެކަމަށް ހިޔާލު ހުށަހަަޅަން އެކަށީގެންވާ ވަގުތު ދޭނެ ކަމަށް އެމަނިކުފާނު ވިދާޅުވި އެވެ.
"ރިއަލް އެސްޓޭޓް ޓޫރިޒަމާ ގުޅޭ ހާއްސަ ބިލެއް މަޖިލީހަށް މި ފޮނުވިގެން މި ދަނީ. ދާއިރުގައި އެ ބިލު ރައްޔިތުންނަށް ފެންނަ ގޮތަށް މަޖިލީހުން އާންމުކުރާނެ ހިޔާލާއި މަޝްވަރާއަށް. ވަކި މުއްދަތަކަށް، ހަމަ ގާތްގަނޑަކަށް އަޅުގަނޑަށް ހީވަނީ ދެތިން ހަފުތާއެއް ނޫނޭ، ދެ ހަފުތާއެއްހާ ދުވަހަށް ނަމަވެސް ހުޅުވާލީމަވެސް އެ އޮތީ ބިލު ފެންނަން،" މުއިއްޒު ވިދާޅުވި އެވެ.
މުއިއްޒު ވަނީ ރަަސްމާލެ ޕްރޮޖެކްޓުގެ ކަންކަން ސިއްރިއްޔާތުގައި ހިނގާ ކަމަށް ދައްކާ ވާހަކަތައް ވެސް ދޮގުކުރައްވާފަ އެވެ. އެމަނިކުފާނު ވިދާޅުވީ އެ މަޝްރޫއުގެ ފުރިހަމަ އެއްބަސްވުން މަޖިލީހުގެ ދާއިމީ ކޮމިޓީއަކަށް ފޮނުވާނެ ކަމަށެވެ. އަދި މަޖިލީހަށް އެއްބަސްވުން ފޮނުވުމާއި ގާނޫނަށް ހިޔާލު ހޯދުމަކީ ޒިންމާދާރު ސަރުކާރަކުން މިކަން ކުރެވޭނެ އެންމެ ދެފުށް ފެންނަ ގޮތް ކަމަށް ވިދާޅުވި އެވެ.
މީގެ އިތުރުން، އީގަލް ހިލްސްގެ މަޝްރޫއާ ދެކޮޅަށް އިދިކޮޅު ފަރާތްތަކުން ދައްކަނީ އެއްވެސް އިހްލާސްތެރިކަމެއް ނެތް ވާހަކަތަކެއް ކަމަށް މުއިއްޒު ތުހުމަތު ކުރެއްވި އެވެ. އެއީ މަޝްރޫއު ހުއްޓުވައި ރައްޔިތުންނަށް ބިރުދައްކަން ދައްކާ އަސާސެއް ނެތް ސިޔާސީ ވާހަކަތަކެއް ކަމަށް އެމަނިކުފާނު ވިދާޅުވި އެވެ.
ރަސްމާލެ ޕްރޮޖެކްޓަކީ ދެ ފުށް ފެންނަ ޕްރޮޖެކްޓެއް ކަމަށް މުއިއްޒު ވިދާޅުވީއިރު، މި ޕްރޮޖެކްޓުގެ މައުލޫމާތު ހޯދަން އިދިކޮޅު މެންބަރުން މަޖިލީހަށް ހުށަހެޅި ގަރާރާއި ކުއްލި މައްސަލަ ވަނީ މަޖިލީހުން ބޭރުކޮށްލާފަ އެވެ. އަދި ކޮމާޝަލް ޓާމްސް އެއްބަސްވުން ހިއްސާކޮށްދޭން މެންބަރަކު އެދުމުން ހައުސިން މިނިސްޓަރު މުއްތަލިބު ވަނީ "މިހާރު ސޮއިކޮށްފައިވާ ކޮމާޝަލް ޓާމްސް އެއްބަސްވުމުގައި ހުރި މައިގަނޑު މާއްދާތަކާ ގުޅޭ ތަފުސީލުތައް އާންމުވެފައިވާ" ކަަމަށް ވިދާޅުވެ އޭގައި ހުރި އެއްޗެއް ހިއްސާކުރަން ދެކޮޅު ހަދާފަ އެވެ.
