އިޓަލީން ފުރައިގެން އޮސްޓްރޭލިއާއަށް ދަތުރުކުރަން އޮތް ކުއަންޓަސް އެއާވޭސްގެ ފްލައިޓެއްގައި ތަތްމަކުނު އުޅޭކަން ފާހަގަވުމާ ގުޅިގެން، މިދިޔަ ހޮނިހިރު ދުވަހު އެ ދަތުރު ކެންސަލްކޮށްފި އެވެ.
ސިޑްނީ މޯނިން ހެރަލްޑް ނޫހުން ރިޕޯޓްކޮށްފައިވާ ގޮތުގައި، މިދިޔަ ހުކުރު ދުވަހު އޮސްޓްރޭލިއާގެ ޕާތުން ފުރައިގެން އިޓަލީގެ ރޯމަށް ކުރި ގާތްގަނޑަކަށް 17 ގަޑިއިރުގެ ދަތުރުގައި، ބައެއް ފަސިންޖަރުން ވަނީ ސޫފިތަކެއް އެ މީހުންގެ ގައިގައި ދަތްއަޅަމުންދާ ކަމުގެ ޝަކުވާ ކޮށްފަ އެވެ.
އެ ދަތުރުގެ ތެރޭގައި، ސޫފިތައް ދަތްއެޅުމުގެ ސަބަބުން ހަންގަނޑު ކަހާ މައްސަލައަށް ލުޔެއް ހޯދައިދިނުމަށް ފަސިންޖަރުންނަށް އެންޓިހިސްޓަމިން ބޭސް ދީފައިވާ ކަމަށް ރިޕޯޓްތައް ބުނެ އެވެ. ނަމަވެސް، ދަތުރު ނިމުމުގެ ކުރިން ބޯޓުގައި ހުރި ބޭސް ހުސްވި ކަމަށް މައުލޫމާތު ލިބެ އެވެ.
ކުއަންޓަސްގެ ތަރުޖަމާނަކު ވިދާޅުވީ، ބޯޓު ރަނގަޅަށް ސާފުކުރުމަށްޓަކައި ބޮއިންގް 787 ޑްރީމްލައިނާ މަރުކާގެ އެ ބޯޓު ބިންމަތީގައި މަޑުކުރުވަން ޖެހުނު ކަމަށެވެ.
އެއާލައިނުން ބުނި ގޮތުގައި، ދަތުރު ކެންސަލްވުމުގެ ސަބަބުން ދަތިވި ހުރިހާ ކަސްޓަމަރުންނަށް ހުރުމުގެ އިންތިޒާމު ހަމަޖައްސައިދީ، ކުރިން ފުރަން އޮތް ގަޑިން ފެށިގެން 48 ގަޑިއިރު ނުވަނީސް އެހެން ފްލައިޓްތަކުން ދަތުރުކުރެވޭނެ އިންތިޒާމު ވަނީ ހަމަޖައްސައިދީފަ އެވެ.
ތަތްމަކުނަކީ އާންމުކޮށް އަންނައުނާއި، ފަރުނީޗަރާއި، ބެޑްޝީޓް ފަދަ ތަންތަނުގައި އުޅޭ، ފިޔަ ނުހުންނަ ކުދި ސޫފިތަކެކެވެ. އިނގިރޭސިވިލާތުގެ އެންއެޗްއެސް ވެބްސައިޓުގައިވާ ގޮތުން، އޭތި ދަތްއެޅުމުން ހަންގަނޑު ކަހާ ގޮތް ވީ ނަމަވެސް، އޭގެ ސަބަބުން ސިއްހީ ބޮޑެތި މައްސަލަތަކެއް އާންމުކޮށް ދިމައެއް ނުވެ އެވެ.
ނަމަވެސް، ތަތްމަކުނު ނައްތާލުމަކީ އުނދަގޫ އަދި ބޮޑު ހަރަދެއް ހިނގާ ކަމެކެވެ. އޭތި ނައްތާލުމަށްޓަކައި ހުރިހާ ބެޑްޝީޓާއި، އަންނައުނާއި، އަދި ދޮރުފޮތި ފަދަ ތަކެތި ހޫނު ފެނުން ދޮވެ، ހޫނުކޮށް ހިއްކަން ޖެހެ އެވެ. ނުވަތަ އެ ތަކެތި ޕްލާސްޓިކް ކޮތަޅަށް އަޅައި ތިން ހަތަރު ދުވަހު ފްރީޒަރަށް ލާފައި ބަހައްޓަން ޖެހެ އެވެ.
ދަތުރުފަތުރުގެ ނިޒާމަށް ތަތްމަކުނުގެ ސަބަބުން މިފަދަ ބުރޫއެރުމަކީ އާ ކަމެއް ނޫނެވެ. މީގެ ދެ ހަފުތާއެއްހާ ދުވަސް ކުރިން ވެސް، އިނގިރޭސިވިލާތުގެ ސައުތު އީސްޓަން ރޭލްވޭގެ ބައެއް ދަތުރުތައް ކެންސަލް ކުރަން ޖެހުނީ، ރޭލު ދުއްވާ މީހުން ތިބޭ ކެބިން ތެރެއިން ތަތްމަކުނު ފެނުމާ ގުޅިގެންނެވެ.
