ޔޫރަޕްގެ ހަތް ގައުމެއްގައި ހުރި ގިނަ އަދަދެއްގެ ސުޕަމާކެޓްތަކަކަށް ސައިބާ ހަމަލާއެއްދީ، އެ ތަންތަނުގައި ހުންނަ ފިނިކުރާ ނިޒާމުތަކަށް ބޮޑެތި ގެއްލުންތަކެއް ދީފި އެވެ.
މި ހަމަލާގެ ސަބަބުން ބެލްޖިއަމް އާއި ލަގްޒެމްބާގްގައި ހުރި "ޑެލްހައިޒް" ސުޕަމާކެޓްގެ 40 އެއްހާ އައުޓްލެޓަށް އަސަރުކޮށްފައިވާއިރު، ސްވިޑަން، އަޔަލޭންޑް، ނެދަލޭންޑްސް، އެސްޓޯނިއާ އަދި ފިންލޭންޑްގެ ބައެއް ފިހާރަތަކަށް ވެސް ވަނީ މި މައްސަލަ ކުރިމަތިވެފަ އެވެ.
ގެއްލުން ލިބުނު ބައެއް ފިނިކުރާ ނިޒާމުތައް އުފައްދާ ބެލްޖިއަމްގެ ކުންފުންޏެއް ކަމަށްވާ "ސަބްކޯބެލް" އިން ބުނި ގޮތުގައި، މި ހަމަލާގައި ފްރިޖުތަކުގެ "އިވެޕޮރޭޓަރު" ތައް ވަނީ އަމިއްލައަށް ގަނޑުފެން ވިރުވާ ނުވަތަ "ޑިފްރޮސްޓް" މޯޑަށް ބަދަލުކޮށްލާފަ އެވެ. މީގެ ސަބަބުން ހޫނުމިން މަތިވެފައިވާއިރު، މިއީ މިދިޔަ މަހު ފަރަންސޭސިވިލާތުގެ ސުޕަމާކެޓްތަކަށް ވެސް ހަމަލާދިން ގޮތެވެ.
މިދިޔަ އޮކްޓޫބަރު މަހު ފަރަންސޭސިވިލާތަށް ދިން ހަމަލާގައި، އެތައް މިލިއަން ޔޫރޯއެއްގެ އަގުހުރި ކާބޯތަކެތި ހަލާކުވެގެން އުކާލަން ޖެހުނު ކަމަށް އެ ގައުމުގެ މީޑިއާތަކުން އޭރު ރިޕޯޓްކޮށްފައިވެ އެވެ.
"ޑެލްހައިޒް" ސުޕަމާކެޓްތަކުގެ ފިނިކުރާ ނިޒާމުތައް ބަލަހައްޓާ "ސަބްކޯބެލް" ކުންފުނީގެ ސީއީއޯ ސްޓެފަން މޮއެލަންސް ހޯމަ ދުވަހު "ބެލްގާ" ނިއުސް އެޖެންސީއަށް މައުލޫމާތު ދެމުން ވިދާޅުވީ، މިއީ ސައިބާ ހަމަލާއެއް ކަމަށާއި، ހަމަލާގެ އަސަރުކުރި ޔުނިޓްތައް ނެޓްވޯކުން ވަކިކުރުމުގެ މަސައްކަތް މުޅި ރޭގަނޑާއި ހެނދުނު އެ ކުންފުނިން ކޮށްފައިވާ ކަމަށެވެ.
އޭނާ އިތުރަށް ވިދާޅުވީ، އޮކްޓޫބަރު މަހުގެ ކުރީކޮޅު ފަރަންސޭސިވިލާތަށް ދިން ހަމަލާއަށް ފަހު، ކަސްޓަމަރުންގެ ފްރިޖުތައް މިފަދަ ނުރައްކާތަކުން ސަލާމަތްކުރުމަށް މަސައްކަތް ކުރަމުންދާ ކަމަށެވެ. ނަމަވެސް މި މައްސަލަ ހައްލުކުރުމަށް ހަމައެކަނި ސޮފްޓްވެއާ އަޕްޑޭޓަކުން ނުފުދޭ ކަމަށާއި، މެޝިނަރީއަށް ފިޒިކަލް ބަދަލުތަކެއް ގެންނަން ޖެހޭ ކަމަށް އޭނާ ފާހަގަކުރެއްވި އެވެ.
ޔޫރަޕްގެ ގިނަ ސުޕަމާކެޓްތަކަކީ އިންޓަނެޓް މެދުވެރިކޮށް ގުޅާލެވިފައިވާ ތަންތަނަށް ވުމުން، އެ ތަންތަނުގެ މަރާމާތާއި މައްސަލަ ހައްލުކުރުމުގެ މަސައްކަތްތައް ދުރުގައި ތިބެގެން (ރިމޯޓްކޮށް) ކުރެވެ އެވެ.
"މިކަމަށް އޮތް އެންމެ ފަސޭހަ ހައްލަކީ ރައްކާތެރި އިންޓަނެޓް ކަނެކްޝަނެއް މެދުވެރިކޮށް ފްރިޖުތައް ބެލެހެއްޓުން. ފަރަންސޭސިވިލާތުގެ ހަމަލާއަށް ފަހު އަޅުގަނޑުމެންގެ ގިނަ ކަސްޓަމަރުން ވަނީ އެ ނިޒާމަށް ބަދަލުވެފައި،" މޮއެލަންސް ވިދާޅުވި އެވެ.
ރިޕޯޓްތައް ބުނާ ގޮތުގައި ޔޫރަޕްގެ ބައެއް ފިހާރަތަކުގައި ހުރި ފްރީޒަރުތަކުގެ ހޫނުމިން ވަނީ 50 ޑިގްރީ ސެލްސިއަސް އަށް ވުރެ މައްޗަށް ގޮސްފަ އެވެ.
މި ފަހުގެ ހަމަލާގެ ފަހަތުގައި ވަނީ ކޮން ބައެއްކަން އަދި މިހާތަނަށް ސާފެއް ނުވެ އެވެ.
އެމެރިކާގެ ކަމާބެހޭ އިދާރާތަކުން ދަނީ މިދިޔަ އޮގަސްޓް މަހު އެމެރިކާގެ ބައެއް އަސްކަރީ މަރުކަޒުތަކުގެ ފިނިކުރާ ނިޒާމުތަކަށް ދިމާވި މައްސަލަތައް ތަހުގީގު ކުރަމުންނެވެ. އަދި އެ ހާދިސާތަކާއި ޔޫރަޕަށް މިހާރު ކުރިމަތިވެފައިވާ ހަމަލާތަކާ ގުޅުމެއް އޮތްތޯ ބެލުމަށް ފަރަންސޭސިވިލާތުގެ އޮފިޝަލުންނާ ގުޅިގެން ދަނީ މަސައްކަތް ކުރަމުންނެވެ.
ބެލްޖިއަމް އާއި ސްވިޑަންގެ ގައުމީ ސައިބާ ސެކިއުރިޓީ އެޖެންސީތަކުން ބުނީ މި ހާދިސާ ވަރަށް ގާތުން މޮނިޓާ ކުރަމުންދާ ކަމަށެވެ.
