ފްލައިދުބާއީގެ އެފްޒެޑް 1073 ފްލައިޓްގެ ކެޕްޓަނަށް ހަމަލާދީ، ބޯޓު ހައިޖެކް ކުރަން އުޅުނު ކޯ-ޕައިލެޓާ އޮސްޓްރޭލިއާއާ އޮތް ގުޅުންތައް އެ ގައުމުގެ ކައުންޓާ ޓެރަރިޒަމް ޔުނިޓަކުން ތަހުގީގު ކުރަން ފަށާފައިވާ ކަމަށް ފުލުހުންގެ ތަރުޖަމާނަކު އާދީއްތަ ދުވަހު ވިދާޅުވެއްޖެ އެވެ.
އޮސްޓްރޭލިއާގެ ފެޑަރަލް ފުލުހުންގެ ތަރުޖަމާނު ވިދާޅުވީ، ފެޑަރަލް ފުލުހުންނާއި، ވިކްޓޯރިއާ ސްޓޭޓް ފުލުހުންގެ އިތުރުން އޭއެސްއައިއޯ އިންޓެލިޖެންސް އެޖެންސީ ހިމެނޭ "ވިކްޓޯރިއަން ޖޮއިންޓް ކައުންޓާ ޓެރަރިޒަމް ޓީމުން" އެ މީހާ އާއި އޮސްޓްރޭލިއާއާ އޮތް ގުޅުންތައް ބަލަމުންދާ ކަމަށެވެ.
މި ތަހުގީގުގެ މައުލޫމާތު ލިބިފައިވާ ދެ މަސްދަރަކުން ބުނި ގޮތުގައި، އެ ކޯ-ޕައިލެޓަކީ އޮސްޓްރޭލިއާގެ ވިކްޓޯރިއާ ސްޓޭޓްގެ ވެރިރަށް މެލްބަންގެ ޔުނިވާސިޓީއަކުން ކިޔަވާފައިވާ މީހެކެވެ. އަދި މީގެ ދިހަ ވަރަކަށް އަހަރު ކުރިން އޭނާ ކިޔެވީ އާރްއެމްއައިޓީ ޔުނިވާސިޓީގައި ކަމަށް ތިންވަނަ މަސްދަރަކުން ބުނެފައިވީ ނަމަވެސް، އެ ޔުނިވާސިޓީން މިކަމާ ގުޅޭ ގޮތުން އެއްވެސް އެއްޗެއް ބުނަން ވަނީ އިންކާރުކޮށްފަ އެވެ.
އޭގެ އިތުރުން ހަރުކަށި ފިކުރާ ގުޅުން ހުރި އޮސްޓްރޭލިއާގެ މިސްކިތްތަކުގައި އޭނާ ވަގުތު ހޭދަކުރި ކަމަށް ވެސް ބައެއް ރިޕޯޓުތައް ބުނެ އެވެ.
ޔުނައިޓެޑް އެރަބް އެމިރޭޓްސް (ޔޫއޭއީ) ގެ ޕްރޮސެކިއުޓާ ޖެނެރަލް ހޮނިހިރު ދުވަހު ވިދާޅުވީ، މިދިޔަ ބުދަ ދުވަހު ދުބާއީން އިޒްރޭލަށް ދަތުރުކުރި ފްލައިދުބާއީގެ އެފްޒެޑް 1073 ފްލައިޓްގެ ކޯ-ޕައިލެޓް، އެ ބޯޓުގެ ކެޕްޓަނަށް ހަމަލާދިނީ ކުއްލި ހާލަތްތަކުގައި ބޭނުންކުރާ ކޯރާޑިއަކުން (އެމަޖެންސީ ކްރޭޝް އޭކްސް) ކަމަށެވެ. އަދި މިއީ "ޓެރަރިސްޓް ހަމަލާއެއް" ކަމަށް ވެސް އޭނާ ސިފަކުރެއްވި އެވެ.
ރޮއިޓާސް އަށް ފްލައިޓް ސިމިއުލޭޓަރެއްގައި އެ މަންޒަރު ދައްކައިދިން އޭވިއޭޝަން އިންސްޓްރަކްޓަރަކު ބުނި ގޮތުގައި، އެފްޒެޑް 1073 ފްލައިޓް ގާތްގަނޑަކަށް 30 ސިކުންތުގެ ތެރޭގައި 16،000 ފޫޓު ތިރިއަށް ވެއްޓެމުން ދިޔައިރު، ބޯޓުގައި ތިބި މީހުންނަށް އިހުސާސް ކުރެވޭނީ "ވާޓިކަލް ރޯލާ ކޯސްޓަރެއްގައި" ތިބޭ ފަދަ ބިރުވެރި ގޮތަކަށެވެ. ނަމަވެސް، ބޯޓު ކޮންޓްރޯލްގެ ދަށަށް ގެނެސް ސަލާމަތްތެރިކަމާއެކު ވަނީ ޖައްސާފަ އެވެ.
