އިންޑިއާގެ ސްކޫލެއްގެ ސީސީޓީވީ ކެމެރާއަކަށް ރެކޯޑު ކުރެވިފައިވާ، އަށް އަހަރުގެ ފިރިހެން ކުއްޖަކު ހަ އަހަރުގެ އަންހެން ކުއްޖަކަށް ވަރަށް ރަހުމުކުޑަ ގޮތަކަށް އަނިޔާކުރާ މަންޒަރު ފެންނަ ވީޑިއޯއަކާ ގުޅިގެން އެ ގައުމުގައި ބޮޑު ސިހުމަކާއި ކަންބޮޑުވުމެއް ވަނީ އުފެދިފަ އެވެ.
ހަރިޔާނާ ސްޓޭޓްގައި ހިނގި މި ހާދިސާގައި ސީރިއަސް އަނިޔާތަކެއް ލިބުނު އަންހެން ކުއްޖާއަށް މިހާރު ހޮސްޕިޓަލުގައި ފަރުވާ ދެމުންދާއިރު، އޭނާގެ ފުރާނައަށް ނުރައްކަލެއް ނެތް ކަމަށް އާއިލާއިން ބުނެ އެވެ. ނަމަވެސް، އެ ހަމަލާއާ ގުޅިގެން އެ ކުއްޖާއަށް ނަފްސާނީ ގޮތުން ބޮޑު އަސަރެއް ކޮށްފައިވާ ކަމަށް އާއިލާއިން ފާހަގަކުރެ އެވެ.
ފުލުހުން ބުނި ގޮތުގައި މި މައްސަލަ މިހާރު ވަނީ ރަސްމީކޮށް ރަޖިސްޓްރީކޮށްފަ އެވެ. އަދި އަނިޔާކުރި އަށް އަހަރުގެ ފިރިހެން ކުއްޖާ މިހާރު ވަނީ ކުޑަކުދިން ބައިތިއްބާ މަރުކަޒަކަށް ފޮނުވާލައި، އޭނާގެ ނަފްސާނީ ހާލަތު ދެނެގަތުމަށް އިވެލުއޭޝަންތަކެއް ހަދަން ފަށާފަ އެވެ.
މި ހާދިސާގައި އިހުމާލުވި ކަމަށް ތުހުމަތުކޮށް، އެ ސްކޫލުގެ ޕްރިންސިޕަލާއި އިތުރު ދެ މުދައްރިސަކު ވަޒީފާއިން ސަސްޕެންޑްކޮށްފައިވާ ކަމަށް ވެސް ފުލުހުން މައުލޫމާތު ދެއެވެ.
އިންޑިއާގެ އުތުރުގެ ހަރިޔާނާ ސްޓޭޓްގެ ޕަންޗްކޫލާގައި ހުންނަ ސަރުކާރު ސްކޫލެއްގައި މިދިޔަ އޮކްޓޯބަރު މަހުގެ 28 ވަނަ ދުވަހު ހިނގި މި ހާދިސާ އާންމުންގެ ސަމާލުކަމަށް އައީ، މިދިޔަ ހަފުތާ ބަންދުގައި އެ ހާދިސާގެ ސީސީޓީވީ ފުޓޭޖް ސޯޝަލް މީޑިއާގައި ދައުރުވާން ފެށުމުންނެވެ.
އެ ފިރިހެން ކުއްޖާ އެހާ ރަހުމުކުޑަ ގޮތަކަށް އަންހެން ކުއްޖާއަށް ހަމަލާދިން ސަބަބެއް އަދި މިހާތަނަށް އެނގިފައެއް ނުވެ އެވެ.
މި ބިރުވެރި ހަމަލާއާ ގުޅިގެން މުޅި އިންޑިއާއަށް ވަނީ ސިހުން ލިބިފަ އެވެ. ގިނަ ބަޔަކު ދަނީ އެ ކުޑަ އަންހެން ކުއްޖާއަށް ލިބުނު އަނިޔާތަކާއި، އެހާ ކުޑަ ފިރިހެން ކުއްޖެއްގެ ކިބައިން ފެނުނު އަނިޔާވެރިކަމާ މެދު ކަންބޮޑުވުން ފާޅުކުރަމުންނެވެ.
ފުލުހުން ބުނި ގޮތުގައި، ތިންވަނަ ގްރޭޑްގައި ކިޔަވާ އެ ފިރިހެން ކުއްޖާ އަންހެން ކުއްޖާ ގާތު ބުނީ އޭނާގެ ބައްޕަ ކްލާސްރޫމެއްގައި އިންތިޒާރު ކުރަމުންދާ ކަމަށެވެ. އެ ކުއްޖާ އެ ކްލާސްރޫމަށް ގެންގޮސް އޭނާ ވަނީ ވަރަށް ބޮޑަށް އަނިޔާކޮށްފަ އެވެ.
ކިންޑަގާޓަން ނުވަތަ ޕްރީސްކޫލުގައި ކިޔަވާ އެ އަންހެން ކުއްޖާގެ އާއިލާއަށް މިކަން އެނގުނީ، އެ ކުއްޖާ ބަލާ ދިޔަ އޮޓޯ ޑްރައިވަރު، ކުއްޖާ ފެންނަން ނެތް ކަމަށް ބުނެ އާއިލާއަށް ގުޅުމުންނެވެ.
ބައްޕަ ގޮސް، އަނިޔާކުރި ފިރިހެން ކުއްޖާ ގާތު އެހުމުން، އެ ކުއްޖާ އޮތީ މަތީ ފަންގިފިލާގެ ކްލާސްރޫމެއްގައި ކަމަށް ބުންޏެވެ. އެ ކްލާސްރޫމަށް ދިޔައިރު ދަރިފުޅު އޮތީ ވަރަށް ބޮޑަށް އަނިޔާވެފަ އެވެ.
"އަހަރެންނަށް އޭނާ ފެނުމުން ހަޅޭއްލަވައިގަނެވުނު. އޭނާ އޮތް ހާލަތު ފެނުމުން ހީވީ ދަރިފުޅު މަރާލާފައި އޮތްހެން. ސްކޫލެއްގައި ކުއްޖަކަށް ރައްކާތެރިކަން ނެތިއްޔާ، ދެން ރައްކާތެރިކަން އޮންނާނީ ކޮންތާކު؟" އޭނާ ސުވާލު އުފެއްދި އެވެ.
އެ ކުއްޖާއަށް ފުރަތަމަ ފަރުވާ ދިނީ ސަރަހައްދީ ހޮސްޕިޓަލެއްގަ އެވެ. ނަމަވެސް ފަހުން ވަނީ ޗަންދީގަޅްގައި ހުންނަ މަލްޓި-ސްޕެޝަލިޓީ ހޮސްޕިޓަލެއް ކަމަށްވާ ޕީޖީއައިއެމްއީއާރް އަށް ބަދަލުކޮށްފަ އެވެ.
ޕީޖީއައިއެމްއީއާރް އިން ނެރުނު ބަޔާނެއްގައި ބުނީ، ހަ އަހަރުގެ އެ އަންހެން ކުއްޖާ ހޮސްޕިޓަލަށް ގެނައިރު އޮތީ "ވަރަށް ސީރިއަސް ހާލަތެއްގައި" ކަމަށެވެ.
އެ ކުއްޖާއަށް ފަރުވާ ދެމުންދަނީ އެކި ދާއިރާތަކުގެ ހާއްސަ ޑޮކްޓަރުންގެ ޓީމަކުން ކަމަށާއި، އޭނާގެ ހާލަތު ވަރަށް ގާތުން ބަލަމުންދާ ކަމަށް ހޮސްޕިޓަލުން ބުންޏެވެ.
ފުލުހުންގެ އިސް އޮފިޝަލެއް ކަމަށްވާ އަދިތީ ސިންގް ހޮނިހިރު ދުވަހު ވީޑިއޯ މެދުވެރިކޮށް ދެއްވި ބަޔާނެއްގައި ވިދާޅުވީ، ސްކޫލް މެނޭޖްމަންޓުގެ "އިހުމާލު" އޮތް ކަމަށް ބަލައި މައްސަލައެއް ރަޖިސްޓްރީކޮށް، ހިނގި ކަންތައް ތަހުގީގު ކުރަމުންދާ ކަމަށެވެ.
"ކުޑަކުދިންގެ އަދުލުގެ ގާނޫނުގެ ދަށުން، ނަފްސާނީ މާހިރުން ދަނީ އެ ފިރިހެން ކުއްޖާގެ ހާލަތު ބަލަމުން. އެއަށްފަހު އަޅަންޖެހޭ ފިޔަވަޅުތައް އަޅާނަން،" އޭނާ ވިދާޅުވި އެވެ.
އިންޑިއާގެ ގާނޫނު ބުނާ ގޮތުން އަށް އަހަރުގެ ކުއްޖަކަށް ޖިނާއީ އަދަބެއް ނުދެވޭނެ ނުވަތަ ޖަލަކަށް ނުފޮނުވޭނެ އެވެ. އެހެންކަމުން އެ ކުއްޖާ މިހާރު ވަނީ ކުޑަކުދިންގެ އަދުލުގެ ބޯޑުން ހިންގާ އޮބްޒަވޭޝަން ހޯމްއަކަށް ފޮނުވާފައި ކަމަށް ފުލުހުންގެ އިސް އޮފިޝަލެއް ކަމަށްވާ އަމަރިންދަރު ސިންގް ވިދާޅުވި އެވެ.
ކުޑަކުދިން ހިމެނޭ މިފަދަ މައްސަލަތަކުގައި އެންމެ ބޮޑު އިސްކަމެއް ދެނީ އެކުދިން އިސްލާހުކުރުމަށާއި ކައުންސެލިން ދިނުމަށް ކަމަށް ވެސް އޭނާ އިތުރަށް ވިދާޅުވި އެވެ.
މި ހާދިސާއާ ގުޅިގެން ހަރިޔާނާ ސްޓޭޓް ސަރުކާރުން މިހާރު ވަނީ ހާދިސާ ހިނގި ގޮތާއި، އެކަމުގައި އެއްވެސް ފަރާތެއްގެ އިހުމާލެއް އޮތްތޯ ބެލުމަށް ހާއްސަ ކޮމިޓީއެއް އެކުލަވާލާފަ އެވެ.
