ފްލައިދުބާއީގެ ބޯޓެއް ހައިޖެކް ކުރަން އުޅުނު ކަމަށް ތުހުމަތު ކުރެވޭ އޮމާންގެ ކޯ-ޕައިލެޓް ހަރުކަށި ފިކުރާއި ޓެރަރިޒަމަށް ލެނބެން ފެށީ އޮސްޓްރޭލިއާގައި ކިޔަވަން އުޅުނު ދުވަސްވަރު ކަމަށް އެކުވެރި އަރަބި އިމާރާތް (ޔޫއޭއީ) ގެ އޮފިޝަލުން ވިދާޅުވެއްޖެ އެވެ.
ޔޫއޭއީގެ އެޓާނީ ޖެނެރަލް ހަމަދު ސައިފް އަލް ޝަމްސީ ތުހުމަތު ކުރެއްވި ގޮތުގައި، ހަމާމް އަލް ހަމާމީގެ ނަމަކަށް ކިޔާ މި ޕައިލެޓް މިދިޔަ ހަފުތާގައި މަސައްކަތް ކުރީ "ޖާނުން ފިދާވުމުގެ ހަމަލާއެއް" ދީ، އިޒްރޭލުގެ ޓެލް އަވީވް އެއާޕޯޓަށް ބޯޓު ވައްޓާލުމަށެވެ.
ބޯޓުގެ ކޮކްޕިޓް ތެރޭގައި އޮންނަ ކުއްލި ހާލަތްތަކުގައި ބޭނުންކުރާ ކޯރާޑި ބޭނުންކޮށްގެން އޭނާ ވަނީ ބޯޓުގެ ކެޕްޓަނަށް ހަމަލާދީ ޒަހަމްކޮށްލާފަ އެވެ. ނަމަވެސް، ބޯޓުގެ ފަސިންޖަރުން ވަނީ އޭނާ ހިފަހައްޓައި ކޮންޓްރޯލް ކޮށްފަ އެވެ. ދުބާއީން ޓެލް އަވީވަށް ދަތުރުކުރި މި ފްލައިޓްގެ އެހެން ކުރޫއަކުން ވަނީ ބޯޓު ސައުދީ އަރަބިއްޔާއަށް ސަލާމަތްތެރިކަމާއެކު ޖައްސައިފަ އެވެ.
މެލްބަންގެ އާރްއެމްއައިޓީ ޔުނިވާސިޓީން މީގެ ކުރިން ކަށަވަރުކޮށްދީފައިވާ ގޮތުގައި، އެ ޕައިލެޓަކީ އެ ތަނުގައި ކިޔެވި ދަރިވަރެކެވެ. ނަމަވެސް އޭނާގެ އިންޖިނިއަރިން ކޯސް ފުރިހަމަނުކޮށް އޭނާ ވަނީ އެ ޔުނިވާސިޓީން ވަކިވެފަ އެވެ.
އެޓާނީ ޖެނެރަލް ޝަމްސީ ވިދާޅުވި ގޮތުގައި، އުމުރުން 29 އަހަރުގެ މި ޕައިލެޓާ ސުވާލުކުރުމުން، އޭނާއަށް މިކަމުގެ ހިތްވަރު ލިބުނީ 2001 ވަނަ އަހަރު އެމެރިކާއަށް އަލްގައިދާއިން ދިން 11 ސެޕްޓެމްބަރުގެ ހަމަލާތަކުން ކަމަށް އޭނާ ވަނީ އިއުތިރާފުވެފަ އެވެ.
ޔޫއޭއީގެ ދައުލަތުގެ ނިއުސް އެޖެންސީ "ވާމް" އިން ހުކުރު ދުވަހު ރިޕޯޓްކޮށްފައިވާ ގޮތުގައި، އެޓާނީ ޖެނެރަލް ވިދާޅުވީ އޭނާ ހަރުކަށި ފިކުރާއި ޓެރަރިޒަމަށް ލެނބެން ފެށިކަމުގެ ނިޝާންތައް ފުރަތަމަ ފެންނަން ފެށީ 2017 ވަނަ އަހަރު އޮސްޓްރޭލިއާގައި ކިޔަވަން އުޅުނު ދުވަސްވަރު ކަމަށް ތަހުގީގުން ދައްކާ ކަމަށެވެ.
އެ ދުވަސްވަރު އޭނާ ހަރުކަށި ފިކުރުގެ ލިޔުންތައް ކިޔުމާއި، ޓެރަރިސްޓް ޖަމާއަތްތަކާއި ޖާނުން ފިދާވުމުގެ ހަމަލާތައް ދައްކުވައިދޭ އިންޓަނެޓް ކޮންޓެންޓްތައް ބެލުމުގެ ސަބަބުން، ހަރުކަށި ފިކުރުގެ ނުފޫޒު އޭނާއަށް ފޯރާފައިވާ ކަމަށް ވެސް ޝަމްސީ ވިދާޅުވި އެވެ.
ވާމްގެ ރިޕޯޓުގައިވާ ގޮތުން، ޓެރަރިޒަމަށް ހިތްވަރުދޭ ތަކެތި ގިނައިން ބެލުމާއި، އަމިއްލަ ކޯޗެއްގެ ދަށުން ބޮކްސިން ތަމްރީނުތައް ހަދައިގެން، މި ރޭވުން ތަންފީޒު ކުރުމަށް ނަފްސާނީ ގޮތުންނާއި ޖިސްމާނީ ގޮތުން އޭނާ ތައްޔާރުވި ކަމަށް ތަހުގީގު ކުރާ ފަރާތްތަކަށް އޭނާ ވަނީ ކިޔައިދީފަ އެވެ.
"އޭނާ އިއުތިރާފުވެފައިވާ ގޮތުގައި މި އަމަލު ހިންގީ އެހެން އެއްވެސް ބައެއްގެ ބައިވެރިވުމެއް ނެތި އަމިއްލައަށް. ނަމަވެސް މި ދައުވާ ކަށަވަރު ކުރުމަށް ތަހުގީގުތައް އަދިވެސް ދަނީ ކުރިއަށް،" ވާމް އިން ބުންޏެވެ.
އޮސްޓްރޭލިއަން ބްރޯޑްކާސްޓިން ކޯޕަރޭޝަން (އޭބީސީ) އިން ރިޕޯޓްކޮށްފައިވާ ގޮތުގައި، މި މީހާއަށް 2014 ވަނަ އަހަރު އޮސްޓްރޭލިއާގެ ސްޓޫޑަންޓް ވިސާ ދޫކޮށްފައިވާއިރު، އޭނާ އެ ގައުމުން ފުރައިގެން ދިޔުމުގެ ކުރިން 2015 އިން 2017 އަށް އެ ގައުމުގައި ކިޔަވަން އުޅުނެވެ.
ސެޕްޓެމްބަރު 30 ވަނަ ދުވަހު ދަތުރުކުރި ފްލައިޓް އެފްޒެޑް1073 ގައި 170 އަށް ވުރެ ގިނަ ފަސިންޖަރުންނާއި ކުރޫއިން ތިއްބެވެ.
މި ހާދިސާ ހިނގިތާ މަދު ދުވަސްކޮޅެއްގެ ތެރޭގައި، އޮސްޓްރޭލިއާގެ ކަމާބެހޭ ފަރާތްތަކުން ވަނީ އެ މީހާއާ އޮސްޓްރޭލިއާއާ އޮތް ގުޅުންތައް ބަލަމުންދާކަން ކަށަވަރުކޮށްދީފަ އެވެ.
