އޮސްޓްރޭލިއާގެ އެންމެ މަގުބޫލު އެއް ރޮކް ބޭންޑް ކަމަށްވާ "ޕައުޑާފިންގާ" އިން، އެ ބޭންޑް ރޫޅާލިތާ 17 އަހަރު ފަހުން އަލުން އެނބުރި އައުމަށް ބާއްވާ ޓުއާގެ ތަފުސީލުތައް ހާމަކޮށްފި އެވެ.
ބްރިސްބޭނަށް ނިސްބަތްވާ މި ބޭންޑުން އަލުން ގުޅުނުކަން މިދިޔަ ހަފުތާގައި ކަށަވަރުކޮށްދީފައިވާއިރު، މި ޓުއާ ރަސްމީކޮށް ފެށުމަށް ހަމަޖެހިފައިވަނީ އަންނަ އަހަރުގެ ސެޕްޓެމްބަރު މަހު ބްރިސްބޭންގައި ބާއްވާ ހަތަރު ޝޯއަކުންނެވެ.
މީގެ އިތުރުން ކެއަންސް، ސިޑްނީ، އެޑިލޭޑް، ޕާތު އަދި މެލްބަންގައި އިތުރު 14 ޝޯއެއް ބޭއްވުމަށް ވަނީ ނިންމާފަ އެވެ. މި ހުރިހާ ޝޯތަކެއް ވެސް ބޭއްވުމަށް ހަމަޖެހިފައިވަނީ ސްޓޭޑިއަމްތަކުގެ ފެންވަރަށް ތައްޔާރުކޮށްފައިވާ ބޮޑެތި ޓެންޓުތަކެއްގަ އެވެ.
ހޯމަ ދުވަހު ނެރުނު ބަޔާނެއްގައި އެ ބޭންޑުން ބުނީ، އަލުން އެކުގައި މިއުޒިކް ކުޅެން ފެށޭތީ އެކަމާ އިންތިހާއަށް އުފާކުރާ ކަމަށެވެ.
އެ ބޭންޑުން ބުނީ، ގިނަ ދުވަސްވީ ސަޕޯޓަރުންގެ ފަރާތުން ލިބޭ އެއްބާރުލުމަށް އަބަދުވެސް ޝުކުރުވެރިވާ ކަމަށާއި، އަދި މިހާތަނަށް އެ ބޭންޑުގެ ލައިވް ޝޯއެއް ބަލާލުމުގެ ފުރުސަތު ނުލިބޭ އާ ސަޕޯޓަރުންތަކެއް ވެސް މިހާރު އެބަތިބި ކަމަށެވެ.
ހަމައެކަނި ހުކުރު އަދި ހޮނިހިރު ދުވަހުގެ ރޭގަނޑު ޝޯތައް ބާއްވާ ގޮތަށް ތާވަލުކޮށްފައިވާ މި ޓުއާގެ ފޯމެޓަކީ، މިދިޔަ އަހަރު "އޯއޭސިސް" ބޭންޑުން އެމީހުންގެ ވޯލްޑް ޓުއާގައި ބޭނުންކުރި ފޯމެޓާ އެއްގޮތް ފޯމެޓެކެވެ. އޮސްޓްރޭލިއާއިން ބޭރުގައި އެއްވެސް ޝޯއެއް ބޭއްވުމަށް އަދި މިހާތަނަށް ނިންމާފައެއް ނުވެ އެވެ.
ޕައުޑާފިންގާ އިން ވަނީ އެމީހުންގެ މިއުޒިކީ ކެރިއަރުގައި ޖުމްލަ ހަތް ސްޓޫޑިއޯ އަލްބަމް ނެރެފަ އެވެ. މީގެ ތެރެއިން 2000 ވަނަ އަހަރު ނެރުނު "އޮޑިސީ ނަމްބަރު ފައިވް" އަކީ 2011 ވަނަ އަހަރު އޮސްޓްރޭލިއަން ބްރޯޑްކާސްޓިން ކޯޕަރޭޝަން (އޭބީސީ) ގެ މިއުޒިކް ސްޓޭޝަން "ޓްރިޕަލް ޖޭ" ގެ އަޑުއެހުންތެރިންގެ ނަޒަރުގައި އޮސްޓްރޭލިއާގެ ތާރީޚުގައި ނެރުނު އެންމެ މޮޅު އަލްބަމެވެ.
އެ އަލްބަމްގައި ހިމެނޭ "މައި ހެޕިނަސް" ލަވަޔަކީ 2025 ވަނަ އަހަރު އެ ސްޓޭޝަނުން ހޮވި އޮސްޓްރޭލިއާގެ ތާރީޚުގައި ހަވަނައަށް އެންމެ މޮޅު ލަވަ އެވެ. މީގެ އިތުރުން "އޮން މައި މައިންޑް"، "ދީޒް ޑޭއިސް" އަދި "ސަންސެޓްސް" އަކީވެސް އެ ބޭންޑުގެ ފާހަގަކޮށްލެވޭ މަގުބޫލު ލަވަތަކެވެ.
ބޭންޑް ރޫޅާލި ފަހުން، ލީޑް ލަވަކިޔުންތެރިޔާ ބާނާޑް ފެނިންގް ވަނީ އަމިއްލަ ގޮތުން މިއުޒިކީ މަސައްކަތްތައް ކުރިއަށް ގެންގޮސްފަ އެވެ. އަދި ބޭސް ގިޓަރިސްޓް ޖޯން ކޮލިންސް ވަނީ ބްރިސްބޭންގައި ލައިވް މިއުޒިކް ކުޅޭ އެންމެ ބޮޑު ދެ މަރުކަޒު ހުޅުވާފަ އެވެ.
