އޮސްޓްރޭލިއާގެ އާބާދީގައި އުފަންވާ މީހުންނަށް ވުރެ މަރުވާ މީހުންގެ އަދަދު 2060 ގެ އަހަރުތަކުގައި ފުރަތަމަ ފަހަރަށް އިތުރުވާނެ ކަމަށް އެ ގައުމުން ހޯމަ ދުވަހު ލަފާކޮށްފި އެވެ.
މިއީ އާބާދީ މުސްކުޅިވުމާއި، އުފަންވާ މިންވަރު ދަށްވުމާއި، ހިޖުރަކުރާ މީހުންގެ އަދަދު މަދުކުރުމުގެ ސަބަބުން އެ ގައުމުގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވާނެ ބަދަލެކެވެ.
ވޭތުވެދިޔަ އެތައް އަހަރެއްގެ ތެރޭގައި އޮސްޓްރޭލިއާގެ އާބާދީ އިތުރުވަމުން އައީ، އުފަންވާ މިންވަރު ދަށްވުމުގެ ސަބަބުން އަންނަ ހުސްކަން ފޫބެއްދުމަށް އެހެން ގައުމުތަކުން ހިޖުރަކުރާ މީހުންނަށް ބަރޯސާވެގެންނެވެ.
ނަމަވެސް، މިހާރު ހިޖުރަކުރާ މީހުންގެ އަދަދު މަދުވަމުންދާތީ، ޖަޕާނާއި، ޖަރުމަނާއި، ދެކުނު ކޮރެއާ ފަދަ ކުރިއަރާފައިވާ ގައުމުތަކަށް ކުރިމަތިވެފައިވާ އާބާދީގެ މައްސަލަތަކާ އޮސްޓްރޭލިއާ އިން ވެސް ކުރިމަތިލާން ޖެހޭނެ ކަމަށް ބެލެވެ އެވެ. އެ ގައުމުތަކުގައި މިހާރު ވެސް އުފަންވާ މީހުންނަށް ވުރެ މަރުވާ މީހުންގެ އަދަދު ވަނީ އިތުރުވެފަ އެވެ.
އޮސްޓްރޭލިއާގެ ޓްރެޝަރީ ޑިޕާޓްމަންޓުން ހޯމަ ދުވަހު އާންމުކުރި "އިންޓަޖެނެރޭޝަނަލް ރިޕޯޓް" ގައި ބަޔާންކޮށްފައިވާ ގޮތުގައި، ކުރިއަށް އޮތް 40 އަހަރު ދުވަހުގެ ތެރޭގައި އެ ގައުމުގެ އިގްތިސާދަށް އެންމެ ބޮޑު އަސަރެއް ކުރާނެ ފަސް ކަމަކީ އާޓިފިޝަލް އިންޓެލިޖެންސް (އޭއައި) އާއި، ޖިއޯޕޮލިޓިކަލް ބައިބައިވުންތަކާއި، ހަކަތައިގެ ބަދަލުތަކާއި، އާބާދީ މުސްކުޅިވުމުގެ އިތުރުން ހިދުމަތްތަކުގެ މައްޗަށް ބިނާވެފައިވާ އިގްތިސާދަކަށް ބަދަލުވުމެވެ.
ދަރިމައިވާ މިންވަރު ދަށްވުމާއި، ގައުމަށް އެތެރެވާ މީހުންނާއި ބޭރުވާ މީހުންގެ ތަފާތު ނުވަތަ "ނެޓް އޯވަސީސް މައިގްރޭޝަން" ދަށްވަމުންދާތީ، ކުރިއަށް އޮތް 40 އަހަރު ދުވަހުގެ ތެރޭގައި އާބާދީ އިތުރުވާ މިންވަރު އަހަރަކު 0.9 އިންސައްތައަށް ދަށްވާނެ ކަމަށް މިހާރު ލަފާކުރެވެ އެވެ. މިއީ ވޭތުވެދިޔަ 40 އަހަރުގެ ތެރޭގައި އާބާދީ އިތުރުވަމުން އައި އެވްރެޖް މިންވަރު ކަމަށްވާ 1.4 އިންސައްތައާ އަޅާބަލާއިރު ބޮޑު ދަށްވުމެކެވެ.
އެހެން ގައުމުތަކުން މީހުން ހިޖުރަކުރުން ވަރަށް ބޮޑަށް މަދުކުރުމަށް ވަކާލާތުކުރާ ކަނާތު ފިޔައިގެ "ވަން ނޭޝަން" ޕާޓީއަށް އޮތް ތާއީދު އިތުރުވަމުންދާތީ، ބޮޑުވަޒީރު އެންތަނީ އަލްބަނީޒީގެ ލޭބާ ސަރުކާރުން ވަނީ މިދިޔަ ހަފުތާގައި ހިޖުރަކުރުމާ ބެހޭ ގަވާއިދުތައް ހަރުކަށިކޮށްފަ އެވެ.
ބޮޑުވަޒީރު އަލްބަނީޒީ 2022 ވަނަ އަހަރު މަގާމާ ހަވާލުވެވަޑައިގަތް ފަހުން، މި ހަފުތާގައި އެމަނިކުފާނަށް އޮތް ތާއީދު ވަނީ އެންމެ ދަށް މިންވަރަކަށް ވެއްޓިފަ އެވެ.
