އޯޕަންއޭއައިގެ އާޓިފިޝަލް އިންޓެލިޖެންސް (އޭއައި) ބޮޓްތަކެއް ދުނިޔޭގެ އެކި މުއައްސަސާތަކުގެ ވެބްސައިޓްތަކަށް ނުފޫޒު ފޯރުވާފައިވާ ކަމަށް ބެލެވޭތީ، އެކަން އެ މުއައްސަސާތަކަށް އަންގާފައިވާ ކަމަށް އެ ކުންފުނިން އެއްބަސްވެއްޖެ އެވެ.
އެ ކުންފުނިން ބުނި ގޮތުގައި، އޭއައި އެޖެންޓްތަކުން ވަނީ އެމެރިކާގެ ސެކިއުރިޓީޒް އެންޑް އެކްސްޗޭންޖް ކޮމިޝަން (އެސްއީސީ) އާއި، ސެންސަސް ބިއުރޯ އަދި އެޑިއުކޭޝަން ޑިޕާޓްމަންޓް ހިމެނޭހެން ސަރުކާރުތަކާއި، ޔުނިވާސިޓީތަކާއި، ދައުލަތުގެ އިދާރާތަކުގެ އިތުރުން އެހެނިހެން މުއައްސަސާތަކުން މައުލޫމާތު ހޯދުމަށް މަސައްކަތް ކޮށްފަ އެވެ.
މިކަން ހާމަކޮށްފައި މިވަނީ، އޮސްޓްރޭލިއާ ސަރުކާރުން ހިންގާ ސިއްހީ އިންޝުއަރެންސް ނިޒާމު، މެޑިކެއާގެ ވެބްސައިޓުގައި ހުރި އާންމުންނަށް ފެންނަން ނުހުންނަ ފައިލްތަކަކަށް އޯޕަންއޭއައިގެ އެޖެންޓުން ވަދެފައިވާ ކަމަށް އެ ގައުމުގެ ބޮޑުވަޒީރު އެންތަނީ އެލްބަނީޒް އިއުލާން ކުރެއްވި ފަހުންނެވެ.
އިންސާނުންގެ ކޮންޓްރޯލުން ނެއްޓިގެންދާ އޭއައި ވަސީލަތްތަކުގެ ސަބަބުން ކުރިމަތިވެދާނެ ނުރައްކާތެރި، އަދި ފުރާނައަށް ގެއްލުންވެދާނެ ފަދަ ނަތީޖާތަކާ މެދު މިދިޔަ އޮގަސްޓް މަހުން ފެށިގެން އާންމުންގެ މެދުގައި އޮތް ބިރުވެރިކަން ވަނީ އިތުރުވެފަ އެވެ.
އޯޕަންއޭއައި އިން ބުނި ގޮތުގައި، ބައެއް މައުލޫމާތުތަކަށް ވަދެފައިވަނީ ވަކި މިންވަރަކަށް އަމިއްލައަށް މަސައްކަތް ކުރެވޭ ގޮތަށް ފަރުމާކޮށް ތަމްރީނުކޮށްފައިވާ "އޭއައި އެޖެންޓް" ނުވަތަ ބޮޓްތަކެކެވެ. މި ބޮޓްތަކަކީ އާންމު މައުލޫމާތު ހޯދުމަށް އިތުބާރު ހުރި މަސްދަރުތައް ހޯދުމަށް މަސައްކަތް ކުރާ އެއްޗެހި ކަމަށް އެ ކުންފުނިން ބުންޏެވެ.
ނަމަވެސް، ބައެއް ބޮޓްތަކުން އެ މިންވަރަށް ވުރެ ބޭރަށް ގޮސް، ވެބްސައިޓްތަކުގެ ސަލާމަތީ ފިޔަވަޅުތައް މުގުރާލުމަށް މަސައްކަތް ކޮށްފައިވާ ކަމަށް އެ ކުންފުނިން ފާހަގަކުރި އެވެ.
މިސާލަކަށް، ސެންސަސް ބިއުރޯ އިން މައުލޫމާތު ހޯދުމަށް މަސައްކަތް ކުރިއިރު، އޭއައި އެޖެންޓުން ވަނީ ހަމައެކަނި ސޮފްޓްވެއާ ޑިވެލޮޕަރުންނަށް ބޭނުންކުރެވޭ ގޮތަށް ހުންނަ ވަސީލަތްތައް ބޭނުންކޮށްގެން އެ އިދާރާގެ މައުލޫމާތުތަކަށް ވަދެފައި ކަމަށް ކުންފުނިން ބުންޏެވެ.
އޯޕަންއޭއައި އިން ބުނާ ގޮތުގައި، ބޮޓްތަކުން ވަދެފައިވާ ސަރުކާރުގެ ހުރިހާ މައުލޫމާތަކީ ވެސް އާންމުކޮށް ފެންނަން ހުންނަ މައުލޫމާތުތަކެވެ.
އެހެންނަމަވެސް، އެމެރިކާގެ ހިއްސާގެ ބާޒާރު ރެގިއުލޭޓްކޮށް އިންވެސްޓަރުންގެ ހައްގުތައް ހިމާޔަތްކުރާ އެސްއީސީ އިން ބޮޓްތައް ހޯދި މައުލޫމާތުތަކެއް، ފަހުން އޭއައި އެޖެންޓުން އެހެން ވެބްސައިޓެއްގައި ޝާއިއުކޮށްފައިވާ ކަމަށް އެ ކުންފުނިން ފާހަގަކުރި އެވެ. އޯޕަންއޭއައި އިން ބުނީ މިއީ ގަސްދުގައި ކުރި ކަމެއް ނޫން ކަމަށެވެ.
"އަޅުގަނޑުމެންގެ އަމާޒަކީ ކޮންމެ މުއައްސަސާއަކަށް ވެސް ހަގީގަތް ހާމަކޮށްދިނުން. އަދި އެ ހާދިސާ އާންމުކުރާނީ ކޮން އިރަކުތޯ ނުވަތަ ނޫންތޯ ނިންމުން އެ މުއައްސަސާއަކަށް ދޫކޮށްލުން،" އެ ކުންފުނިން ބުންޏެވެ.
މި ހާދިސާގައި ހިމެނޭ ހުރިހާ ކަމަކީ ސަލާމަތީ ގޮތުން ނުރައްކާތެރި ބޮޑު ބްރީޗެއް ނުވަތަ ފޫއެޅުމެއްގެ ގޮތުގައި ނުބަލާ ކަމަށް ވެސް ކުންފުނިން ފާހަގަކުރި އެވެ.
