މި ރާއްޖޭގެ ވެރިކަމަށް ޕީޕަލްސް ނޭޝަނަލް ކޮންގްރެސްގެ ޓިކެޓުގައި 2023 ވަނަ އަހަރު ވާދަކުރެއްވިއިރު، މުހައްމަދު މުއިއްޒުގެ ކުރިފުޅުމަތީގައި ތަރައްގީ އާއި ތަމައްދުނަށްވުރެ އަގުހުރި އެއްޗަކީ ގައުމުގެ ހުއްރިއްޔަތެވެ. ހުއްބުލްވަތަނެވެ.
ރިޔާސީ އިންތިހާބުގެ ކެމްޕޭނުގައި ރާއްޖޭގެ 158 ރަށަކަށް ވަޑައިގެން 205 ފަހަރު ވާހަކަފުޅުދެއްކެވިއިރު، ޖުމުލަ 772 ފަހަރު މުއިއްޒު އެ ވާހަކަ ތަކުރާރުކުރެއްވި އެވެ.
"އެއާޕޯޓު އެޅުން، ރިސޯޓު ހެދުން، ބަނދަރު ހެދުން، މަގު ހެދުން، މި ކަންކަމަކީ ސެކަންޑަރީ ކަންތައްތައް. ދެވަނަ ދަރަޖައިގެ ކަންތައްތައް މިނިވަންކަމުގެ މައްސަލައަށް ބަލާއިރު،" ސެޕްޓެމްބަރު 5، 2023, ގައި އއ. މަތިވެރީގައި ހުންނަވައި މުއިއްޒު ވިދާޅުވި އެވެ.
ހާހެއްހައި ފަހަރު މިނިވަންކަމުގެ ވާހަކަ މުއިއްޒު ތަކުރާރުކުރެއްވީ ބިރުވެރި ތަސްވީރެއް ކުރައްސަވައިދެއްވުމަށްފަހު އެވެ. އޭރު މި ރާއްޖޭގެ ވެރިކަން ކުރަމުންދިޔަ އެމްޑީޕީއަކީ ވަތަނީ ލޯބީގެ ކަންފުޅެއް ވެސް ނެތް ބައެއް ކަމަށް އެތައް މަހަލްއެއްގައި މުއިއްޒު އިންޒާރުކުރެއްވި އެވެ.
"ރާއްޖޭގެ އެކި ކަންކޮޅުތަކުން އެތައް ހެކްޓަރެއްގެ ބިންތައް ބޮޑެތި ބިންތައް އަޅުގަނޑުމެން އަތުން 99 އަހަރަށް ދޭން އެއްބަސްވާ ސަރުކާރެއް މިއަދު މި އޮތީ،" ސެޕްޓެމްބަރު 7، 2023 ގައި މާލެ ސިޓީ މާފަންނު ދެކުނު ޖަގަހަ ހުޅުވުމަށް ބޭއްވި ޖަލްސާގައި މުއިއްޒު ވިދާޅުވި އެވެ.
"އަޅުގަނޑުމެންގެ ގައުމު މިއީ އެހެން ބައެއްގެ އަތްމަތީގައި އޮތް ގައުމެއްކަމުގައި ނިންމާފައި އޮތް ސަރުކާރެއް މިއަދު ގައުމުގައި މި އޮތީ. ދެން ވެސް ހަމަ އާނއެކޭ ބުނެ ހަމަ އެ ގޮތުގައި ކުރިއަށް ދާންވީތޯ؟ ނުވަތަ ނޫންތޯ؟"
އޭރު މުއިއްޒުގެ ވިސްނުންފުޅުގައި، ރާއްޖޭގެ ބިން 99 އަހަރަށް ދިނުމަކީ ގައުމަށް ހިޔާނާތްތެރިވުމެވެ. ރާއްޖޭގެ މިނިވަންކަން ވިއްކައިލުމެވެ. އަންނާން އޮތް ޖީލުތަކަށް ވެސް ބޭވަފާތެރިވުމެވެ.
ނަމަވެސް، ވެރިކަމުގެ އާރާއި ބާރު ލިބިވަޑައިގަތުމުން މުއިއްޒުގެ ވިސްނުންފުޅު މިއަދު ބަދަލުވެއްޖެ އެވެ. އަރުވައިޖައްސަވައިފައި އެމަނިކުފާނު މިހާރު މަސައްކަތް ކުރައްވަމުން ގެންދަވަނީ ރާއްޖޭގެ ތާރީހުގައި ވެސް ބޭރުގެ ބަޔަކަށް ކުއްޔަށް ވެސް ނުދޭވަރުގެ ބޮޑު ބިމެއް އަބަދުގެ އަބަދަށް ބޭރު ބަޔަކަށް ހިލޭ ދިނުމަށެވެ.
މުއިއްޒު މިހާރު ވިދާޅުވަމުން ގެންދަވަނީ ގައުމަށް ފައިދާހުރި ގޮތަކީ އެއީ ކަމުގަ އެވެ. އެމަނިކުފާނު ސިފަކުރައްވަނީ ރާއްޖޭގެ ބިން ބޭރުގެ ފަރާތްތަކަށް ދިނުމާ ދެކޮޅުވާ މީހުންނަކީ ގައުމީ ވިސްނުން ނުހުންނަ މީހުން ކަމަށެވެ.
"ހަގީގަތުގައި މިއީ ރާއްޖެއަށް ވަރަށް ބޮޑު ކުރިއެރުމެއް ގެންނާނެ ކަމެއް. ހަމައެކަނި އިގްތިސާދީ ގޮތަކުން ނޫން، އިޖްތިމާއީ ގޮތުން ވެސް އުމްރާނީ ގޮތުން ވެސް މުޅި ގައުމުގެ ފެންވަރު، ދިރިއުޅުމުގެ ފެންވަރު ވެސް ހުރިހާ ގޮތަކުން ވެސް ވަރަށް މަތިކޮށްދޭނެ މަޝްރޫއުއެއް،" މިދިޔަ ހުކުރު ދުވަހުގެރޭ ޕީއެސްއެންއިން ގެނެސްދިން "ނޭޝަން ޗެޓް" ޕްރޮގްރާމުގައި ވާހަކަދައްކަވަމުން މުއިއްޒު ވިދާޅުވި އެވެ.
"ރައްޔިތުންނަށް ފައިދާވާ ކަންކަން ކުރާއިރުގައި، އިދިކޮޅު ފަރާތްތަކުގައި ނުހުރޭ އެއްވެސް ވަރަކަށް، އަޅުގަނޑުމެން އަބަދުވެސް މި ދައްކަނީ ފުރަތަމަ ގައުމު އިސްކުރުމުގެ ވާހަކަ، ގައުމީ ވިސްނުމެއް ނުހުރޭ އިނގޭތޯ. ހިތާމަހުރިކަމެއް އެހެންނަމަވެސް އެއީ ހަގީގަތް."
ކެންޑިޑޭޓު މުއިއްޒު ކުރެއްސެވި ޣައްދާރުންގެ ގޮޅި
ނޮވެމްބަރު 17، 2023 ގައި ދިވެހިރާއްޖޭގެ ވެރިކަމުގެ ހުވާ ކުރެއްވުމަށްފަހު ދިވެހިރައްޔިތުންނާ މުހާތަބުކުރައްވައި ތަގުރީރު ކުރައްވަމުން މުއިއްޒު ކުއްލިއަކަށް ފަހަތަށް އެނބުރިވަޑައިގެންނެވި އެވެ. އިސް އުފުއްލަވައި ދެން އެމަނިކުފާނު މުހާތަބު ކުރައްވަން ފެށްޓެވީ 103 ފޫޓު އުހުގައި ހުރި ދިވެހި ގައުމީ ދިދަޔާ އެވެ.
"އޭ ލޮބުވެތި ޝަރަފުވެރި ދިވެހި ދިދަޔާ! މިއަދު މި ވަގުތުން ފެށިގެން އިރާދަކުރެއްވިއްޔާ ތިޔަ އައުދާނަ ދިވެހި ދިދަޔަށް އިރުއޮއްސުން ނިމުނީ! މީގެ ފަހުން ތިޔަ ފަހުރުވެރި ދިވެހި ދިދައަކީ ދިވެހިރާއްޖޭގެ ކޮންމެ ކަންކޮޅެއްގައި، ތިބާހުރި ކޮންމެ ތަނެއްގައި ތިރިކުރުމެއްނެތި ރެޔާއިދުވާލު 24 ގަޑިއިރު އިއްޒަތާއެކު ވިހުރި ވިހުރު ހުންނާނެ އެންމެ އިއްޒަތްތެރި ނިޝާން،" އެތައް ހާސް ދިވެހި ރައްޔިތުންގެ ލޯތަކުގެ ކުރިމަތީގައި މުއިއްޒު ވިދާޅުވި އެވެ.
ދިރުމުގެ ވިންދެއް ނުޖަހާ ދިވެހި ދިދަޔާ މުހާތަބުކުރައްވައި މުއިއްޒު އެ ދުވަހު ވެވަޑައިގެންނެވި ވައުދު، ހަމައެކަނި އޭގެ ލަފުޒީ މާނައަށްވުރެ ފުނެވެ. އަސަރުން ފުރިގެންވާ ރާގަކަށް އަމުނައިލެއްވި އެ ލަފުޒުތަކުގެ ފަހަތުގައި ފޮރުވިފައި ވަނީ ދިވެހި ގައުމަށް ޣައްދާރު ނުވާނޭކަމުގެ ވައުދެވެ.
"މިއަދު އަޅުގަނޑުގެ އެދުމަކީ، މި ލޮބިވެތި ދިވެހި ފަސްގަނޑުގެ ކޮންމެ ވެލިފުކެއްގެ އަގު ދަސްކުރާށޭ! ފަރުވާކުޑަކޮށް ނުލާށޭ!" އެ ތަގުރީރު ނިންމަވައިލައްވަމުން މުއިއްޒު ވިދާޅުވި އެވެ.
މުއިއްޒުގެ އެ ޖުމުލަތައް ގުޅިފައި އޮތީ، ރިޔާސީ ކެމްޕޭނުގައި އެމަނިކުފާނު ދެއްކެވި ވާހަކަތަކާ އެވެ. ގައުމަށް ޣައްދާރު ނުވާނޭކަމަށް ވިދާޅުވެ ރައްޔިތުންނަށް ދެއްވި ޔަގީންކަމާ އެވެ.
"ގައުމު އިސްކުރައްވައި ކުރިއަށް ވަޑައިގަންނަވަން ނިންމުމަކީ އަޅުގަނޑަށް މިއަދު މިގަޑީގައި ވެސް މާދަން ވެސް އަބަދުވެސް ދައްކަން އޮތް ވާހަކައަކީ. އަޅުގަނޑު ދޭ ޔަގީންކަން އަޅުގަނޑު މި ދެނީ، އިރާދަކުރެއްވިއްޔާ އަޅުގަނޑު ދައްކާ ވާހަކަ ބަހާއި އަމަލާ ދިމާވާނެ." ސެޕްޓެމްބަރު 7، 2023 ގައި މާފަންނު ދެކުނު ޖަގަހަ ހުޅުވައިދެއްވުމަށް ބޭއްވި ޖަލްސާގައި ވާހަކަދައްކަވަމުން މުއިއްޒު ވިދާޅުވި އެވެ.
"އަޅުގަނޑަށް އެ އިތުބާރު ތިޔަ ބޭފުޅުން ކޮށްދެއްވުމަކީ އަޅުގަނޑުގެ އަމިއްލަ ނަފުސަށްޓަކައި ވެސް ގައުމަށްޓަކައި ވެސް އަޅުގަނޑު ދަންނަވަން އޮތް ހަމައެކަނި ވާހަކަ، އަޅުގަނޑުމެންގެ މިނިވަންކަމާއި އަޅުގަނޑުމެންގެ ސިޔާދަތާއި އިސްތިގުލާލުގެ ވާހަކައަށްފަހު، ދެން ކޮންމެ ވާހަކައެއް ވެސް އަންނަން އޮންނާނީ."
އިލްމީ ނަޒަރިއްޔާއަކުން: ރައީސް މުއިއްޒު ދޮގު ހައްދަވަނީ ކީއްވެ؟
ތަޖުރިބާކާރުން ބުނާ ގޮތުގައި ސިޔާސީން ދޮގު ހެދުމާއި ދޮގު ނުހެދުން ބިނާވަނީ، ރަނގަޅު ގޮތް ހިޔާރު ކުރުމާއި ނުކުރުމުގެ މައްޗަކަށް ނޫނެވެ. ސިޔާސީން ދޮގު ހެދުމާއި ނުހެދުން ބިނާވަނީ އޭނާއަށް ވާނެ ފައިދާ އާއި ގެއްލުމުގެ މައްޗަށެވެ.
މުއިއްޒު އެ ވިދާޅުވި މިނިވަންކަމާއި އިސްތިގުލާލާއި ސިޔާދަތުގެ ތައުރީފު ވެސް ހަމަ އެ ކެމްޕޭން ޖަލްސާތަކުގައި ރައްޔިތުންނަށް އޮޅުމެއް ނާރާ މިންވަރަށް އެމަނިކުފާނު ފިލުވައިދެއްވި އެވެ.
ދިވެހި ފަސްގަނޑުން އެންމެ ވެލިފުކެއްގެ މިންވަރު ވެސް ބޭރުގެ ބަޔަކަށް ދިނުމަކީ މުއިއްޒު އޭރު ގަބޫލުކުރެއްވިކަމެއް ނޫނެވެ. އެމަނިކުފާނު އޭރު އެކަން ސިފަކުރައްވަމުން ގެންދެވީ އެއީ ދިވެހީންގެ މިނިވަންކަން ވިއްކައިލުން ކަމުގަ އެވެ.
"ހަނިމާދޫގެ އެއާޕޯޓާއި އެކީގައި 15 ހެކްޓަރުގެ ބިން [އެމްޑީޕީ ސަރުކާރުން] މި ދެނީ ކުއްޔަކަށް ނޫން. ދެ ތިން އަހަރަކަށް ވެސް ނޫން 99 އަހަރަށް... އޭގެ ބަދަލުގައި [ބޭރުގެ ފަރާތްތަކުން] މި ދެނީ ކޮންމެވެސް ވަރެއްގެ ލާރިކޮޅެއް ނޫނީ ކޮންމެވެސް ކަހަލަ މުދަލެއް، އެހީއެއްގެ ނަމުގައި. އަޅުގަނޑުމެންނަކީ މިއީ އަޅުގަނޑުމެންގެ މިނިވަންކަން މިހާ ޗީޕުކޮށް މިހާ އާދައިގެ ގޮތަކަށް ދޫކޮށްލަން ތިބި ބައެއްތޯ؟ ނޫންތޯ؟" ސެޕްޓެމްބަރު 7، 2023 ގައި ގަލޮޅު ދެކުނު ޖަގަހަ ހުޅުވުމަށް ބޭއްވި ޖަލްސާގައި ވާހަކަދައްކަވަމުން މުއިއްޒު ވިދާޅުވި އެވެ.
"މިއެއް ނޫން އަޅުގަނޑުމެންގެ ޤައުމުގެ ކަންކަން ދާންވީ މިސްރާބަކީ. އެއެއް ނޫން ދާންވީ މިސްރާބަކީ،" އެ ވާހަކަ ތަކުރާރުކުރައްވަމުން ޖެހިގެން އައި ދުވަހު ރިޔާސީ އިންތިހާބުގެ ފުރަތަމަ ބުރުގެ ކެމްޕޭން ނިންމާލުމަށް ބޭއްވި ޖަލްސާގައި މުއިއްޒު ވިދާޅުވި އެވެ.
ދިވެހި ރައްޔިތުންނަށް މުއިއްޒު އޭރު ވިސްނަވައިދެއްވީ ހަނިމާދޫ އާއި އައްޑޫގެ ބިންތަކެއް ބޭރުގެ ބަޔަކަށް 99 އަހަރަށް ދޭން އެމްޑީޕީ ސަރުކާރުން ނިންމާފައި އޮތް ކަމަށެވެ. ނަމަވެސް، އެއީ އެއްވެސް ހަގީގަތެއްގެ މައްޗަށް ބިނާކުރައްވައި އެމަނިކުފާނު ދެއްކެވި ވާހަކައެއް ނޫނެވެ. އެފަދަ އެއްވެސް މުއާމަލާތައްގެ ވާހަކަ އިންތިހާބުވުމަށް ފަހު މުއިއްޒު ނުދައްކަވަ އެވެ.
"ދިވެހީންގެ ރާއްޖެ ނުހޯއްދަވައިފިއްޔާ އަޅުގަނޑުމެންނަށް އަޅުގަނޑުމެންގެ ގައުމު ތާއަބަދަށޭ މި ގެއްލިގެން ދަނީ. އަޅުގަނޑުމެންގެ ގައުމުގައި ހިނގާ އަޅުގަނޑުމެންގެ ގައުމުގެ މިނިވަންކަމަށް ބުރޫއަރާ ހުރިހާ ކަމަކަށް އަޅުގަނޑުމެން ނޫނެކޭ ބުނަންޖެހޭ. އަޅުގަނޑުމެންގެ އިސްލާމްދީން އަޅުގަނޑުމެން އަތުން ބީވެގެންދާ ކޮންމެ ކަމަކަށް ނޫނެކޭ ބުނަންޖެހޭ. އެ ކަންކަން ކުރެވޭނީ އަޅުގަނޑުމެން އަތުކުރި އޮޅާލައިގެންނޭ،" އޯގަސްޓު 30، 2023 ގައި ބ. އޭދަފުށީގައި ހުންނަވައި މުއިއްޒު ވިދާޅުވި އެވެ.
ހަނިމާދޫ އެއާޕޯޓުގެ މިލްކުވެރިކަން ނުގެއްލޭނެ, ބޭރުގެ ސިފައިން ވެސް ނުތިބޭނެ: ރައީސް
އެއާޕޯޓުގެ ތަރައްގީއަށް ލޯނު ނަގަނީ ދިވެހި ސަރުކާރުން ކަން ފާހަގަކުރައްވައި އެތަނުގެ މިލްކުވެރިކަން އޮންނާނީ ދިވެހި ސަރުކާރަށް ކަމުގެ ޔަގީންކަން ހަނިމާދޫގެ ރައްޔިތުންނަށް ރައީސް ދެއްވި.
ބޭރުގެ ފަރާތަކުން ވަގުތީ ގޮތުން ދޭ އެހީތެރިކަމަކަށް ނުހެއްލުމަށް ރިޔާސީ ކެމްޕޭނުގައި މުއިއްޒު އިލްތިމާސްކުރެއްވި އެވެ. އެމަނިކުފާނު އޭރު ދިވެހިރައްޔިތުންގެ ކިބައިން އެދިވަޑައިގެންނެވީ ތަރައްގީއަށްވުރެ ގައުމުގެ މިނިވަންކަން އިސްކުރެއްވުމަށެވެ. "ދިވެއްސަކަށް ވީތީ އަދާކުރަންޖެހޭ ގައުމީ ޒިންމާ" އަދާ ކުރުމުގައި ފަހަތު ފަޔަށް ބުރަ ނުވުމަށް އެމަނިކުފާނު ގޮވައިލެއްވި އެވެ.
"ތަރައްގީ ދޫވެސް ކޮށްލެވިދާނެ. ފަހަތަށް އެތައް އަހަރެއް 20 އަހަރަށް ސޮއްސައިވެސް ލެވިދާނެ ތަރައްގީ. އަނބުރާ ގެނެވިދާނެ ތަރައްގީ އަނެއްކާ ވެސް. އެކަމަކު ގައުމުގެ މިނިވަންކަން ގެއްލުނީމާ އެ ގެންނާކަށް ފަސޭހައެއް ނުވާނެ. ގައުމުގެ ސިޔާދަތީ ބާރު އަތުން ދޫވީމާ އިސްތިގުލާލު ގެއްލުނީމާ ދެނެއް އެ ހޯދާކަށް ދާނެ ތަނެއް ނޯންނާނެ،" އޯގަސްޓު 21، 2023 ގައި އައްޑޫ ސިޓީ ހިތަދޫގައި ހުންނަވައި މުއިއްޒު ވިދާޅުވި އެވެ.
އެ ހުރިހާ ވާހަކައެއް ދެއްކެވީ ދިވެހި ގައުމު ދެކެ އިންތިހާއަށް ލޯބިވާތީ ކަމަށް މުއިއްޒު ތަކުރާރުކޮށް ވިދާޅުވި އެވެ.
"އެއީ އަޅުގަނޑު ހަމަ ދިވެއްސަކަށް ވީތީ، ދިވެހި ގައުމު ދެކެ ލޯބިވާ މީހަކަށް ވާތީ ހަމަ އިހުލާސްތެރިކަމާ އެކީގައި އެދި ދަންވަނާ އިލްތިމާސްއެއް،" މުއިއްޒު ވިދާޅުވި އެވެ.
ރައީސް މުއިއްޒު ދިފާއުކުރައްވާ ރަސްމާލެ ޑީލް!
ދުނިޔޭގެ އެންމެ ބިޔަ ބޮޑެތި ޖައްރާފުތަކުން މުޅި މާލެ އަތޮޅު ކިލަނބުކޮށްލައިގެން ފުށިދިއްގަރުފަޅުން ހިއްކަމުން އެ ގެންދަނީ މުއިއްޒު ވިދާޅުވި ގޮތުން ނަމަ، ސައްތަ އިންސައްތަ ދިވެހީންގެ މިލްކެކެވެ. އެ ބިމުގެ އެންމެ ވެލިފުކެއް ވެސް އެންމެ ދުވަހަކަށް، އެއްވެސް ބަޔަކަށް ކުއްޔަށް ނުދެއްވާނެ ކަމަށް މުއިއްޒު ވިދާޅުވީ ފަހުރުވެރިކަމާއެކު އެވެ.
"އެ ތަނުން ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެ ތަނުން ހިކިގެން ދާނީކީއެއް،" ޖުލައި 26، 2024 ގައި ބޭއްވި ރަސްމިއްޔާތުގައި ވާހަކަދައްކަވަމުން މުއިއްޒު ވިދާޅުވި އެވެ.
ނިކަމެތިންނަށް ހިއްކި ރަސްމާލެ ބިދޭސީ މުއްސަނދިންގެ ސަހަރަކަށް
ރަސްމާލެ މަޝްރޫއަކީ މާލެ ސަރަހައްދުގެ ބޯހިޔާވަހިކަމުގެ މައްސަލަ ފަސް އަހަރު ތެރޭގައި ހައްލުކުރުމަށް ސަރުކާރުން ފެށި ބިޔަ މަޝްރޫއެކެވެ. ރަސްމާލޭގެ އަސްލު ޕްލޭންތަކަށް ބަދަލު ގެނެސް އެ ބިމުގެ އެއްބައި ބޭރުގެ ކުންފުންޏަކަށް ދީފި ނަމަ، މުއިއްޒުގެ ވައުދު ފުއްދޭނެ ޖާގަ މުޅީން ގެއްލުނީ އެވެ.
މީގެ ދެ އަހަރު ކުރީން ވެސް މުއިއްޒުގެ ވިސްނުންފުޅު ގެންގުޅުއްވީ ރިޔާސީ އިންތިހާބުގައި އެމަނިކުފާނު ދެއްކެވި ވާހަކަތަކާ އެއްގޮތަށް ކަމަށް ބުނެވިދާނެ އެވެ. ރަސްމާލޭގެ ކޮންމެ ވެލިފުކެއްގެ ހައްގުވެރީންނަކީ މި ފަސްގަނޑަށް އުފަން ދިވެހީންކަމުގައި މުއިއްޒު ވިދާޅުވީ އެއްވެސް މަޖުބޫރުކަމެއް ނެތި އެވެ.
ނަމަވެސް، ވެރިކަން ދެބައިވެ ރިޔާސީ ދެވަނަ ދައުރުގެ ހުވަފެން އައުވުމާއެކު މުއިއްޒުގެ ވާހަކަ ބަދަލުވެއްޖެ އެވެ. ގައުމީ ވަތަނީ ރާގުގައި ވިދާޅުވަމުން ގެންދެވި ވާހަކަތަކުގެ އަސާސް ބަދަލުވެއްޖެ އެވެ.
މިއަދު މުއިއްޒު ދިފާއު ކުރައްވަމުން ގެންދަވަނީ ވެރިކަން ކުރާ މާލޭގެ ތިންގުނައާ ގާތްކުރާވަރުގެ ބޮޑު ބިމެއް ތާއަބަދަށް ޔޫއޭއީގެ ކުންފުންޏަކަށް ހިލޭ ދިނުމުގެ ޑީލް އެވެ. އެމަނިކުފާނު މިހާރު ވިދާޅުވާ ގޮތުން ނަމަ، ގައުމު އިސްކުރުމުގެ ވިސްނުމަކީ އެއީ އެވެ.
ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދޭން ސަރުކާރުން ނިންމާފައި ވަނީ ރަސްމާލެއިން ހިއްކަން ނިންމާފައިވާ 1010 ހެކްޓަރުގެ ތެރެއިން 500 ހެކްޓަރުގެ ބިމެވެ. އެ މުއްދަތުގެ ތެރޭގައި އެ ބިމުން އެއްވެސް ކުއްޔެއް ނުނަގާނެ ކަމަށް މި ސަރުކާރުގެ ހައުސިން މިނިސްޓަރު، އަބްދުﷲ މުއްތަލިބު ވަނީ ވިދާޅުވެފަ އެވެ.
"ބިން ހޯދުމުގެ ފީއާއި މުއްދަތު އިތުރުކުރުމުގެ ފީތައް ލިބެނީ އެކަން ހިނގާ އަހަރެއްގައި އެކަނި. ނަމަވެސް، ދައުލަތަށް ދެމިގެންދާ، އިތުރުވަމުންދާ އާމްދަނީއެއް ލިބެނީ ޓޫރިސްޓުން އައިސް، ކުރާ ހަރަދުތަކާއި، ތަކުރާރުކޮށް އަންނާތީ ހިނގާ ވިޔަފާރީގެ ހަރަކާތްތަކުން ނަގާ ޓެކުހުން. ރަސްމާލެ މަޝްރޫއުގައި އަމަލުކުރީ މި ވިސްނުމުގެ މައްޗަށް،" ލިންކްޑްއިންގައި މުއްތަލިބު ލިޔުއްވާފައިވެ އެވެ.
އޭގެ ބަދަލުގައި އެ 99 އަހަރުގެ ތެރޭގައި ދިވެހި ސަރުކާރަށް ލިބެނީ ރަސްމާލޭގައި ތަރައްގީކުރާ ރިސޯޓުތަކުންނާއި ހޮޓާތަކުން އަދި، އެ ތަންތަނުން ފޯރުކޮށްދޭ ހިދުމަތާއި ވިއްކާ މުދަލުން ނަގާ ޓެހުހާއި އީގަލް ހިލްސްގެ އާމްދަނީގެ 10 ޕަސެންޓާއި އެ ތަނުގައި ތަރައްގީ ކުރާ ޕްރޮޕަޓީތައް ވިއްކައިގެން ލިބޭ އާމްދަނީގެ ހަތަރު ޕަސެންޓެވެ.
ސަރުކާރު ޕްރޮމޯޓުކުރާ މިހާރު ނޫހަށް މިދިޔަ ހޮނިހިރު ދުވަހު ދިން އިންޓަވިއުއެއްގައި މުއްތަލިބު ވިދާޅުވެފައި ވަނީ ރަސްމާލެއިން އީގަލް ހިލްސްއަށް ދޭ ބިން ތަރައްގީކޮށް ނިމޭއިރު، ދިވެހި ދައުލަތަށް ލިބޭނެކަމަށް އަންދާޒާކުރާ ހިސާބަކީ ތިން ބިލިއަން ޑޮލަރު ކަމަށެވެ.
"އަޅުގަނޑުމެން މި އެކްސްޕެކްޓް ކުރަނީ، އެސެސްމެންޓް ދައްކާ ގޮތުން ތިން ބިލިއަނަށް ވުރެ ގިނަ ޑޮލަރު، ގާތްގަނޑަކަށް 46 ބިލިއަނަށް ވުރެ ގިނަ ރުފިޔާ، އެތަނުގެ 10 އަހަރުގެ ޑިވެލޮޕްމެންޓް ނިމޭ އިރު ސަރުކާރަށް ލިބޭނޭ،" މުއްތަލިބު ވިދާޅުވި އެވެ.
މުއްތަލިބު އެ ވިދާޅުވާގޮތުން، 10 އަހަރުދުވަހުގެ ތެރޭގައި ރަސްމާލެއިން ދައުލަތަށް ލިބޭނީ މި އަހަރުގެ ބަޖެޓަށްވުރެ ވެސް ކުޑަ އަދަދެކެވެ.
ދެން އޮތީ އެ ޑީލްގައި އޮތް އެންމެ ނުރައްކާ ވާހަކަ އެވެ. ރިޔާސީ ކެމްޕޭނުގައި މުއިއްޒު ވެސް އެންމެ ދެކޮޅު ހެއްދެވި ވާހަކައަށްވުރެ ވެސް ގެއްލުންބޮޑު ކަމެއްގެ ވާހަކަ އެވެ. އެވެ.
ރަސްމާލެ ދިނީ 99 އަހަރަކަށް ނޫން, ތާއަބަދަށް!
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ."
ރަސްމާލޭގެ ބިމުގެ 500 ހެކްޓަރުގެ ބިން އީގަލް ހިލްސްއަށް ދޭން ނިންމާފައި ވަނީ 99 އަހަރަށެވެ. ނަމަވެސް، އެ ތަނުގައި އެ ކުންފުނިން ތަރައްގީކުރާ ޕްރޮޕަޓީތައް ތިންވަނަ ފަރާތަކަށް ވިއްކުމުން ނުވަތަ ވާރުތަވުމުން 99 އަހަރުގެ މުއްދަތެއް އަލުން ގުނަން ފެށޭނެކަމަށް އީގަލް ހިލްސްއިން ބުނެ އެވެ.
އެހެންކަމުން، ރަސްމާލޭގައި އީގަލް ހިލްސްއިން ތަރައްގީކުރާ ޕްރޮޕަޓީއެއް ގަންނަ މީހަކު، އެ ތަނުގެ މުއްދަތު ހަމަވާން އެންމެ އަހަރެއް އޮއްވައި ވެސް އެހެން މީހަކަށް ވިއްކާލައިފި ނަމަ، 99 އަހަރުގެ މުއްދަތެއް އަލުން ގުނަން ފަށަންޖެހޭނެ އެވެ.
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" އީގަލް ހިލްސް އިން ބުނެފައިވެ އެވެ.
``
އީގަލް ހިލްސް ކުންފުންޏަށް ދޭން މުއިއްޒު ނިންމަވާފައި ވަނީ ރާއްޖޭގެ އެންމެ ބޮޑު ބިމުގެ އެއްބަ އެވެ. މިހާރު އެ އޮތް ގޮތަށް، ޑީލު ކުރިއަށް ގެންގޮސްފި ނަމަ، ދިވެހީންނަށް ދުވަހަކު ވެސް އެ ތަނެއް ނުލިބޭނެ އެވެ.
ބަހުސްގެ ބޭނުމަށް، ސަރުކާރުން އެ ބުނާގޮތަށް އެ ބިން އަނބުރާ ދިވެހި ދައުލަތަށް ލިބޭނެކަމަށް ބެލިޔަސް، ވެރިކަމުގައި ހުންނެވި މުއިއްޒު އާއި ހައުސިން މިނިސްޓަރު، މުއްތަލިބު އާއި މި ރިޕޯޓުކިޔާ މީހުންނާއި އަހުރެން ވެސް އެ ދުވަސް ދެކޭކަށް މި ދުނިޔޭގައި ނުތިބޭނެ އެވެ. މިއަދުން ފެށިގެން އެ ތާރީހު ގުނިޔަސް، 99 އަހަރު ހަމަވާނީ ސެޕްޓެމްބަރު 29، 2125 ގަ އެވެ.
މުއިއްޒުގެ ތަރާދުން އެމަނިކުފާނުގެ އަމަލުތައް މިނެކިރާލުމުން ރާއްޖޭގެ ވެރިކަމުގައި މި ވަގުތު ހުންނެވީ ޣައްދާރެކޭ ނުބުނެވޭނެ ހެއްޔެވެ؟ މި ގައުމުގެ މިނިވަންކަމާއި ސިޔާދަތު ވިއްކަވައިލެއްވި ހާއިނެކޭ ނުބުނެވޭނެ ހެއްޔެވެ؟ އެމަނިކުފާނަކީ މި ރާއްޖޭގެ އިސްތިގުލާލު ހިރަފުހާ މޮޑެލެއްވި ހިޔާނާތްތެރިއެކޭ ނުބުނެވޭނެ ހެއްޔެވެ؟
މިއަދު އިދިކޮޅު ލީޑަރެއްގެ ގޮތުގައި ހުންނެވީ މުއިއްޒުކަމަށްވީ ނަމަ، ރަސްމާލެ ޑީލާ އެމަނިކުފާނު ދެކޮޅު ނުހައްދަވާނެ ހެއްޔެވެ؟
