މި ސަރުކާރުން ފުށިދިއްގަރު ފަޅުގެ ހިއްކި ބިން ޔޫއޭއީގެ ކުންފުންޏަކަށް ދިނީ 99 އަހަރަށް ނޫންކަމާއި އެ ރަށް ދިނީ ދުވަހަކު ވެސް ދިވެހިންނަށް އެތަން ނުލިބޭ ގޮތަށްކަން ހާމަވެއްޖެ އެވެ.
ރަސްމާލެއިން ހިއްކާ 1100 ހެކްޓަރުގެ ތެރެއިން 500 ހެކްޓަރު ދިނީ އީގަލް ހިލްސްއަށެވެ. ބިދޭސީ މަހުޖަނުންނަށް ދާއިމަށް ދިރިއުޅެވޭ ގޮތަށް ހަދާ އެ ރަށުގެ އެޕާޓްމަންޓްތައް ވިއްކުމުގެ މަސައްކަތް މިހާރު އެ ކުންފުނިން ވަނީ ފަށައިފަ އެވެ.
އީގަލް ހިލްސްއަށް ރަސްމާލެ ދޭން ސިއްރު އެގްރިމެންޓެއްގައި ސޮއި ކުރީ މިދިޔަ ހޯމަ ދުވަހެވެ. އެ އެގްރިމެންޓު ހާމަނުކޮށް ސަރުކާރުން ބުނަމުން އައީ ރަސްމާލެ ދިނީ 99 އަހަރަށް ކަމަށެވެ. އެތަން ދިނީ، ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެ އެވެ.
ނަމަވެސް ރަސްމާލެ އީގަލް ހިލްސްއަށް ދިނީ މުޅި އުމުރަށް ވެސް ދިވެހިންނަށް އެތަން ނުލިބޭ ގޮތަށް ކަމަށް އެ ކުންފުނިން ވަނީ ހާމަކޮށްފަ އެވެ. އެތަނުން ވިއްކާ އެޕާޓްމަންޓެއް ނުވަތަ ބިމުގެ ފުރަތަމަ 99 އަހަރު ހަމަނުވަނީސް ވިއްކާލައިފި ނަމަ ނުވަތަ ވާރުތައިން ދީފި ނަމަ, އަލަށް ގަންނަ މީހާއަށް ވެސް އަލުން އިތުރު 99 އަހަރަށް އެތަން ލިބޭނެ ކަމަށް އީގަލް ހިލްސް އިން ޔަގީންކަންނދެ އެވެ.
"މިތަނުގެ ޕްރޮޕަޓީސްތައް ކުއްޔަށް ދޭނީ ދިވެހިރާއްޖޭގެ ގާނޫނުތަކުގެ ދަށުން 99 އަހަރަށް. އެތަންތަނުގެ ހައްގުތައް ވިއްކައިގެން ނުވަތަ ވާރުތައިން ވެސް އެހެން ފަރާތަކަށް ބަދަލުކޮށްފި ނަމަ 99 އަހަރުގެ އާ ކުލީގެ މުއްދަތެއް ފެށޭނެ. މީގެ ސަބަބުން އެތަން ގަންނަ ފަރާތްތަކުގެ އަތުގައި އެތައް ޖީލަކަށް އެތަންތަން ދެމިގެންދާނެ،" އީގަލް ހިލްސް އިން ބުނެފައިވެ އެވެ.
ރަސްމާލެއާ ގުޅޭ ގޮތުން ވާހަކަ ދައްކަވަމުން ފިނޭންސް މިނިސްޓަރު ހަސަން ޒަރީރު ވިދާޅުވެފައި ވަނީ އެތަން ދެނީ 99 އަހަރަށް ކަމަށެވެ. އެއްބަސްވުމުގެ ދަށުން އެތައް ޖީލަކަށް ރަސްމާލެ ގެއްލިގެންދާކަން އޭނާ ހާމައެއް ނުކުރެ އެވެ.
"ރާއްޖޭގެ ވަރަށް ގިނަ އިންވެސްޓާސް، ވަރަށް ގިނަ ޕްރޮޖެކްޓްސްތައް މިހާރު ވެސް ހިންގާ ރިސޯޓްތައް ވެސް އެބަ ހިންގާ ބޮޑެތި ދުވިސައްތަ، ތިންސަތޭކަ މިލިއަން ޑޮލަރުގެ ރިޒޯޓް ޕްރޮޕަޓީސްތައް އެބަ ޑިވެލޮޕް ކުރޭ. އެ ޕްރޮޕަޓީސްތައް ވެސް މި ޑިވެލޮޕް ކުރެވެނީ ގާތްގަނޑަކަށް 99 އަހަރާ ހަމައަށް ރާއްޖޭގެ މިހާރުގެ ލީގަލް ފްރޭމްވޯކް ތެރެއިން 99 އަހަރާ ހަމައަށް ލީސްކޮށްގެން،" ހޯމަ ދުވަހު ވިދާޅުވި އެވެ.
ރަސްމާލޭގެ ވާހަކަ ދައްކަވަމުން ރައީސް މުހައްމަދު މުއިއްޒު ވިދާޅުވީ ދުބާއީ ކުންފުންޏަށް އެ ރަށް ދިނުމުން ދިވެހިންގެ އެތައް ޖީލަކަށް ފައިދާވާނެ ކަމަށެވެ.
"ބިމެއް ކްރިއޭޓްވުމަކީ އެންމެ ބޮޑު އެސެޓް އެ ލިބެނީ. ބިމުގެ އަގު ވަރަށް ބޮޑުވާނެ ކޮންމެ ތަނެއްގައި ވެސް ބިން ހިއްކީމަ. ހާއްސަކޮށް އިކޮނޮމިކް އެކްޓިވިޓީ ބޮޑު ސަރަހައްދެއްގައި ބިން އެއީ ވަރަށް ބޮޑު އަގުހުރި ރައުސުލްމާލެއް. އެއީ އަންނަން އޮތް ޖީލުތަކަށް އޭގެން ވަރަށް ފައިދާ ކުރާނެ ކަމެއް،" އެމަނިކުފާނު ވިދާޅުވި އެވެ.
