ބިދޭސީ މަހުޖަނުން ދިރިއުޅެން 99 އަހަރަށް ރަސްމާލެ ދިނުމާ ދެކޮޅު ވަނީ ގައުމީ ވިސްނުން ނުހުންނަ މީހުން ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ދައުލަތުގެ މީޑިއާ ޕީއެސްއެމް އިން ގެނެސްދޭ "ނޭޝަން ޗެޓް" ޕްރޮގްރާމުގައި ވާހަކަ ދައްކަވަމުން މުއިއްޒު ވިދާޅުވި، ރަސްމާލެއަކީ ގައުމަށް ކުރިއެރުން ލިބޭނެ ޕްރޮޖެކްޓެއް ކަމަށާއި އެކަމާ ދެކޮޅު ހަދަނީ ގައުމީ ވިސްނުން ނުހުން މީހުން ކަމަށެވެ.
"ރައްޔިތުންނަށް ފައިދާވާ ކަންކަން ކުރާއިރުގައި، އިދިކޮޅު ފަރާތްތަކުގައި ނުހުރޭ އެއްވެސް ވަރަކަށް، އަޅުގަނޑުމެން އަބަދުވެސް މި ދައްކަނީ ފުރަތަމަ ގައުމު އިސްކުރުމުގެ ވާހަކަ، ގައުމީ ވިސްނުމެއް ނުހުރޭ އެނގޭތޯ. ހިތާމަހުރިކަމެއް އެހެންނަމަވެސް އެއީ ހަގީގަތް،" ރައީސް ވިދާޅުވި އެވެ.
މުއިއްޒު ވިދާޅުވީ ރަސްމާލެ ޕްރޮޖެކްޓު އަދި އެމަނިކުފާނާ ދެކޮޅުވާ މީހުން ތިބެނީ "ފުރަތަމަ ދިވެއްސެއްކަން" ހަނދާން ނެތޭ މީހުން ކަމަށެވެ.
"އެއީ ސިޔާސީ ވިސްނުން އިސް ކުރެވިގެންދާ ލެވެލްއަކީ ތިމަންނައަކީ ފުރަތަމަ ދިވެއްސެއްކަން ވެސް ހަނދާން ނެތޭ ހިސާބަށްދާތަން އަޅުގަނޑުމެންނަށް މި ފެންނަނީ،" އެމަނިކުފާނު ވިދާޅުވި އެވެ.
އެ ޕްރޮގްރާމުގައި ވާހަކަ ދައްކަވަމުން މުއިއްޒު ވަނީ ބިދޭސީން ދިރިއުޅުމަށް 99 އަހަރަށް ރަސްމާލެ ދިނުމުން އިޖުތިމާއީ ގޮތުން ވެސް ރާއްޖެއަށް ފައިދާވާނެ ކަމަށް ވިދާޅުވެފަ އެވެ.
"ހަގީގަތުގައި މިއީ ރާއްޖެއަށް ވަރަށް ބޮޑު ކުރިއެރުމެއް ގެންނާނެ ކަމެއް. ހަމައެކަނި އިގްތިސާދީ ގޮތަކުން ނޫން، އިޖްތިމާއީ ގޮތުން ވެސް އުމްރާނީ ގޮތުން ވެސް މުޅި ގައުމުގެ ފެންވަރު، ދިރިއުޅުމުގެ ފެންވަރު ވެސް ހުރިހާ ގޮތަކުން ވެސް ވަރަށް މަތިކޮށްދޭނެ މަޝްރޫއުއެއް،" ރައީސް މުއިއްޒު ވިދާޅުވި އެވެ.
އޭގެ އިތުރުން، ރަސްމާލެ 99 އަހަރަށް ބިދޭސީންނަށް ދިނުމުން ދިވެހިންގެ އެތައް ޖީލަކަށް އޭގެ ފައިދާ ލިބޭނެ ކަމަށް ވެސް މުއިއްޒު އިއްޔެ ވިދާޅުވި އެވެ.
"ބިމެއް ކްރިއޭޓްވުމަކީ އެންމެ ބޮޑު އެސެޓް އެ ލިބެނީ. ބިމުގެ އަގު ވަރަށް ބޮޑުވާނެ ކޮންމެ ތަނެއްގައި ވެސް ބިން ހިއްކީމަ. ހާއްސަކޮށް އިކޮނޮމިކް އެކްޓިވިޓީ ބޮޑު ސަރަހައްދެއްގައި ބިން އެއީ ވަރަށް ބޮޑު އަގުހުރި ރައުސުލްމާލެއް. އެއީ އަންނަން އޮތް ޖީލުތަކަށް އޭގެން ވަރަށް ފައިދާ ކުރާނެ ކަމެއް،" އެމަނިކުފާނު ވިދާޅުވި އެވެ.
ކޮންސްޓްރަކްޝަން މިނިސްޓަރު މުއްތަލިބު އޭނާގެ ލިންކްޑިއިންގައި ހިއްސާކުރެއްވި ލިޔުމެއްގައި ވަނީ، ބިން ހޯދާށާއި އެ ބިމުގެ ކުލީގެ ގޮތުގައި އީގަލް ހިލްސްއިން އެއްވެސް ފައިސާއެއް ދައްކާކަށް ނުޖެހޭނެ ކަމަށެވެ.
މުއްތަލިބު ވިދާޅުވި ގޮތުގައި، ރަސްމާލޭން މި ގޮތަށް ލިބެން ހުރި ފައިސާތައް ސަރުކާރުން ދޫކޮށްލީ، އޭގެ މުގާބިލުގައި ސަރުކާރަށް މުޅި ޕްރޮޖެކްޓުގެ މުއްދަތުގެ ތެރޭގައި ފައިސާ ލިބޭނެ ގޮތެއް ހޯދުމުގެ ގޮތުންނެވެ. އެ ގޮތުން މިހާރު ރިސޯޓުތައް ތަރައްގީކުރަން ދޭ ގޮތާ ހިލާފަށް، ރަސްމާލޭގެ ބިމުގެ ބަދަލުގައި ސަރުކާރަށް ލިބެނީ އާމްދަނީ އާއި ޓެކްސްތަކެވެ.
ރަސްމާލެ ތަރައްގީ ކުރަން ނިންމާފައި ވަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އެތަން ތަރައްގީ ކުރަނީ ބިދޭސީންނަށް އެތަނުގައި ދިގު މުއްދަތަކަށް ދިރިއުޅެވޭނެ ގޮތަށެވެ. ރަސްމާލޭގައި ބިނާ ކުރާ އެޕާޓްމަންޓުތަކާއި ވިލާތައް ބިދޭސީންނަށް ވިއްކަން އީގަލް ހިލްސް އިން މިހާރު ވެސް ވަނީ ހުޅުވާލައިފަ އެވެ.
ރަސްމާލޭގައި ދިރިއުޅޭ މީހުންނަށް ހިދުމަތް ދޭން ހޮސްޕިޓަލަކާއި ސްކޫލަކާއި މުނިފޫހިފިލުވައިދޭ ތަންތަން ވެސް ބިނާ ކުރާނެ އެވެ. އެތަނުގައި ހިދުމަތް ދޭނީ ހަލާލު ޓޫރިޒަމުގެ މޮޑަލަށް ކަމެއް އަދި ނޭނގެ އެވެ. ސަރުކާރުން އެކަން އަދި ހާމައެއް ނުކުރެ އެވެ.
