ރަސްމާލެ ވޯޓާފްރަންޓް މަޝްރޫއުގެ ދަށުން ޔޫއޭއީގެ އީގަލް ހިިލްސް ޑިވެލޮޕާސްއިން ހުޅުމާލޭގައި ތަރައްގީކުރާ ހައުސިން ޔުނިޓުތައް ތަރައްގީކުރާށާއި ތަރައްގީކޮށް ނިމުމުން ވެސް ދިވެހި ދައުލަތުގެ ބަޖެޓުން އެއްވެސް ފައިސާއެއް ދައްކަން ނުޖެހޭނެ ކަމަށް ފިނޭންސް މިނިސްޓްރީން މިއަދު ބުނެފި އެވެ.
މި ހައުސިން ޔުނިޓުތައް ތަރައްގީކުރުމަކީ ރަސްމާލޭގައި ހިންގާ މެގަ މަޝްރޫއު ފެށުމުގެ ކުރިން "އިނީޝަލް ކޮމިޓްމަންޓް" އެއްގެ ގޮތުގައި އަބޫދާބީ ކުންފުނިން ކުރަން ޖެހޭ މަސައްކަތެކެވެ. ސަރުކާރުން ބުނަނީ މިއީ ސަރުކާރުން އެއްވެސް ފައިނޭންޝަލް ކޮމިޓްމަންޓެއް ނުދީ އީގަލް ހިލްސްގެ އަމިއްލަ ހަރަދުގައި "ކޮންޓްރެކްޓާ ފައިނޭންސިން" އުސޫލުގެ ދަށުން ތަރައްގީކުރާ ތަންތަން ކަަމަށެވެ.
މީގެ އިތުރު ތަފުސީލުތައް ދެއްވަމުން، ފިނޭންސް މިނިސްޓަރު ހަސަން ޒަރީރު ޕީއެސްއެމްއަށް ވިދާޅުވީ، އެއްބަސްވެފައި ވަނީ 500 މިލިއަން ޑޮލަރު (7.7 ބިލިއަން ރުފިޔާ) ހަރަދުކޮށްގެން ހުޅުމާލޭގައި 5000 ހައުސިން ޔުނިޓު ތަރައްގީކުރަން ކަމަށެވެ. އަދި މި ހައުސިން ޔުނިޓުތައް އިމާރާތްކުރަން ހިންގާ މަޝްރޫއު ފައިނޭންސް ކުރަން ސަރުކާރުން އެއްވެސް ގެރެންޓީއެއް ވެސް ނުދޭ ކަމަށް އޭނާ ވިދާޅުވި އެވެ.
"މި ޕްރޮޖެކްޓަކީ ހަމަ އެ ޕްރޮޖެކްޓު ޑިވެލޮޕްކުރައްވާ ފަރާތުން ފައިނޭންސް ހޯއްދަވައިގެން އެ ޕްރޮޖެކްޓުގެ ހުރިހާ މަސައްކަތެއް ވެސް ކުރައްވާނީ. އެ ޕްރޮޖެކްޓުގެ ތެރެއަށް އަޅުގަނޑުމެން އެއްވެސް ވަރަކަށް ލޯނެއް، އެއްވެސް ފައިނޭންސިންއެއް، އެއްވެސް ކަހަލަ ކޮމިޓްމަންޓެއް ދޭކަށް ނުޖެހޭނެ،" ޒަރީރު ވިދާޅުވި އެވެ.
ޒަރީރު މިހެން ވިދާޅުވުމުން އަދަދު ނޫހުން ވާނީ މި ތަންތަން އިމާރާތްކޮށް ނިމުމުން، އެއްވެސް ފައިސާއެއް ދައްކަން ޖެހޭނެތޯ ފިނޭންސް މިނިސްޓްރީގައި އަހާފަ އެވެ.
ރަސްމާލެއަށް އިންވެސްޓުކުރާ ކުންފުނިން ހުޅުމާލޭގައި 5،000 ހައުސިން ޔުނިޓް އަޅާނެ ކަމަށް ސަރުކާރުން ބުނެފި
ރަސްމާލޭގައި 20 ބިލިއަން ޑޮލަރުގެ މަޝްރޫއެއް ހިންގުމަށް ޔޫއޭއީގެ އީގަލް ހިލްސް ކުންފުންޏާއެކު ސަރުކާރުން އެއްބަސްވުމެއްގައި ސޮއިކޮށްފިއެވެ. މި އެއްބަސްވުމުގެ ދަށުން އެ ކުންފުނިން ކޮންޓްރެކްޓާ ފައިނޭންސިން އުސޫލުން ހުޅުމާލޭގައި 5،000 ހައުސިން ޔުނިޓް އަޅާނެއެވެ. މީގެ އިތުރުން ރަސްމާލޭގައި ބައިނަލްއަގުވާމީ ފެންވަރުގެ ހޮޓާތަކާއި، މެރީނާއެއްގެ އިތުރުން އެކި ވަސީލަތްތައް ތަރައްގީކުރުމަށް ވަނީ ހަމަޖެހިފައެވެ.
މި ސުވާލު ކުރީ، މި ތަންތަން ވިއްކާ މަރުހަލާގައި ފައިސާ ދައްކަން ޖެހޭނެ ކަމަށް ހައުސިން މިނިސްޓަރު އަބްދުالله މުއްތަލިބްއާ ހަވާލާދީ ދައުރުކުރަމުންދާ މައުލޫމާތާ ގުޅިގެންނެވެ.
"ފައިސާ ދައްކާނީ ހައުސިން ޔުނިޓްތައް ނިންމައި ހަވާލުކުރުމުން އެ ވިއްކުމުގެ މަރުހަލާގައި،" މުއްތަލިބު ވިދާޅުވި ކަމަށް މިހާރު ނޫހުގެ ހަބަރެއްގައި ވެ އެވެ.
މިކަން ފާހަގަކޮށް ސުވާލުކުރުމުން، ފިނޭންސުގެ އޮފިޝަލަކު ވަނީ އީގަލްސް ހިލްސްއިން ތަރައްގީކުރާ ހައުސިން ޔުނިޓުތަަކަށް ފައިސާ ދައްކަން ދިވެހި ދައުލަތުގެ ބަޖެޓުން އެއްވެސް ފައިސާއެއް ހަރަދުކުރަން ނުޖެހޭނެ ކަމަށް ބުނެފަ އެވެ.
ސަރުކާރުން ފައިސާއެއް ދައްކަން ނުޖެހުނުކަން ކަށަވަރުކޮށްދިން ނަމަވެސް، މި ތަންތަން ލިބޭ އާންމުން ފައިސާ ދައްކަން ޖެހޭ ކަމެއް އަދި ފައިސާ ދައްކަން ޖެހެނީ އެ ކުންފުންޏަށްތޯ ނޫނީ ސަރުކާރަށްތޯ އެ އޮފިޝަލަށް ކަށަވަރުކޮށް ނުދެވުނެވެ. އޭނާ ބުނީ، އެ މައުލޫމާތު އެނގޭނީ ހައުސިން މިނިސްޓްރީއަށް ކަަމަށެވެ.
ސަރުކާރުން ވަނީ މި އަހަރުގެ ނިމުމުގެ ކުރިން މި ހައުސިން މަޝްރޫއު އިފްތިތާހުކޮށް، އަންނަ އަހަރުގެ ތެރޭގައި އަމަލީ މަސައްކަތް ފަށާނެ ކަމަށް ބުނެފަ އެވެ. އެކަމަކު ޕްރޮޖެކްޓުގެ އެހެން ތަފުސީލުތައް ހާމަނުކުރާތީ ތަރައްގީކުރަނީ ކިތައް ކޮޓަރީގެ ޔުނިޓުތަކެއް ކަމެއް އަދި ތަރައްގީކުރަނީ ސޯޝަލް ހައުސިން އެކަނި ކަމެއް ނޫނީ ބޭންކުން ފައިނޭންސިން ހޯދޭ ވަރުގެ އާމްދަނީއެއް ލިބޭ މީހުންނަށް ތަރައްގީކުރާ "އެފޯޑަބަލް ހައުސިން" ކަމެއް އަދި ސާފެއް ނުވެ އެވެ.
