ރަސްމާލޭގައި ވޯޓާފްރަންޓް އަދި މެރީނާއެއް ތަރައްގީކުރަން 20 ބިލިއަން ޑޮލަރުގެ މަޝްރޫއެއް ހިންގަން ހަވާލުކުރި ޔޫއޭއީގެ އީގަލް ހިލްސް ކުންފުނިން ހުޅުމާލޭގައި 5،000 ހައުސިން ޔުނިޓް އަޅާނެ ކަމަށް ސަރުކާރުން ހާމަކޮށްފި އެވެ.
މިއަދު ދުބާއީގައި ބޭއްވި ރަސްމިއްޔާތުގައި އީގަލް ހިލްސް އާއި ދިވެހި ސަރުކާރާ ދެމެދު ވަނީ އެއްބަސްވުމެއްގައި ސޮއިކޮށްފަ އެވެ. އޭގައި ސޮއިކުރީ އީގަލް ހިލްސް އާއި އެމާރު ޕްރޮޕަޓީސްގެ ބާނީ މުހައްއްމަދު އަލައްބާރާއީ ހައުސިން މިނިސްޓަރު އަބްދުالله މުއްތަލިބެވެ.
އެ އެއްބަސްވުމާ ގުޅޭގޮތުން "މިހާރު" ނޫހަށް މުއްތަލިބު ވިދާޅުވި ގޮތުގައި ކުރިން އިއުލާންކޮށްފައިވާ އެއްވެސް މަޝްރޫއުއަކަށް މި އެއްބަސްވުމުގެ ދަށުން ބަދަލެއް ނާންނާނެ އެވެ. އަދި ހުޅުމާލޭގައި އެ ކުންފުނިން 5،000 ހައުސިން ޔުނިޓު އަޅަނީ ކޮންޓްރެކްޓާ ފައިނޭންސިން އުސޫލުން ކަމަށް މުއްތަލިބު ވިދާޅުވި އެވެ.
އެ ކުންފުންޏަށް ސަރުކާރުން ފައިސާ ދައްކާނީ ހައުސިން ޔުނިޓުތައް ނިމުމުން އެ ޔުނިޓުތަކާ ހަވާލުވެ ވިއްކުމުގެ މަރުހަލާގައި ކަމަށް މުއްތަލިބު ވިދާޅުވި އެވެ.
ދުބާއީގެ އެންމެ ބޮޑު އެއް ޑެވެލޮޕަރާ ރަސްމާލެ ހަވާލުކުރި އެއްބަސްވުމުގެ މާ ގިނަ ތަފްސީލުތަކެއް ނޭނގެ އެވެ.
އީގަލްސް ހިލްސާ ހަވާލާދީ ލިޔެފައިވާ ހަބަރުގައި ވަނީ އިންޓަގްރޭޓެޑް ޑިވެލޮޕްމަންޓްގައި ބައިނަލްއަގުވާމީ ފެންވަރުގެ ހޮޓާތަކާއި ރިސޯޓުތަކާއި، ފެންވަރު ރަނގަޅު އަދި ބްރޭންޑެޑް ރެޒިޑެންސްތަކާއި، ދުނިޔޭގެ ފެންވަރުގެ މެރީނާއަކާއި، ވޯޓަާފްރަންޓް މަގުތަކާއި، ރެސްޓޯރެންޓުތަކާއި، ފިހާރަތަކުގެ އިތުރުން މުނިފޫހިފިލުވުމާއި ސިއްހީ މަރުކަޒުތައް ހިމެނޭނެ އެވެ.
