ދައުލަތުގެ ދަރަނި ދެއްކުމަށްޓަކައި ހަރުމުދާ ވިއްކުން ރަނގަޅު ކަމަށާއި ނަމަވެސް، މި ވަގުތަށް މުހިންމީ ވަގުތުން ފައިސާ ލިބޭ ގޮތަށް ދައުލަތުގެ ހަރުމުދަލެއް ވިއްކުން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެކްސްގައި ނަޝީދު ކުރެއްވި ޕޯސްޓެއްގައި ވިދާޅުވީ ރަސްމާލޭގެ ބައެއްގައި ވޯޓާފްރަންޓް އަދި މެރީނާއެއް ތަރައްގީކުރަން 20 ބިލިއަން ޑޮލަރުގެ މަޝްރޫއެއް ހިންގަން ޔޫއޭއީގެ އީގަލް ހިލްސް ކުންފުންޏާ ހަވާލުކުރުމަކީ ރާއްޖެއަށް ދިމާވެފައި އޮތް މާލީ ދަތިކަމުން އަރައިގަތުމާ ކުޑަކޮށް ވެސް ގުޅުންހުރި ކަމެއް ނޫން ކަމަށެވެ.
"ހުރިހާ ކަމެއް އެންމެ ރަނގަޅަށްދިޔަ ނަމަވެސް، އެ ތަނުން ދައުލަތަށް އެއްޗެއް ލިބެން އަދި މަދުވެގެން ދެ އަހަރު ނަގާނެ، މި ވަގުތު މުހިންމީ ވަގުތުން ފައިސާ ލިބޭ ގޮތަށް ދައުލަތުގެ ހަރުމުދަލެއް ވިއްކުން،" ނަޝީދު ވިދާޅުވި އެވެ.
މިއަދު ދުބާއީގައި ބޭއްވި ރަސްމިއްޔާތުގައި އީގަލް ހިލްސް އާއި ދިވެހި ސަރުކާރާ ދެމެދު ވަނީ އެއްބަސްވުމެއްގައި ސޮއިކޮށްފަ އެވެ. އޭގައި ސޮއިކުރީ އީގަލް ހިލްސް އާއި އެމާރު ޕްރޮޕަޓީސްގެ ބާނީ މުހައްއްމަދު އަލައްބާރާއީ ހައުސިން މިނިސްޓަރު އަބްދުالله މުއްތަލިބެވެ.
އެއްބަސްވުމުގެ ދަށުން ފުށިދިއްގަރު ފަޅުން ދޫކޮށްލާ ސަރަހައްދުގެ ބޮޑު މިނާއި އެ ސަރަހައްދު ދޫކޮށްލާ އަގެއް ސަރުކާރުން ހާމައެއް ނުކުރެ އެވެ.
މި މަޝްރޫއުގައި ސޮއިކުރުމާއެކީ ޔޫއޭއީގެ މީޑީއާތަކުގައި ވަނީ މި ހަބަރު ޖަހާފަ އެވެ. ރާއްޖޭގެ މީޑިއާތަކުން ވެސް މި ހަބަރު ޖެހީ އެ ގައުމުގެ މީޑިއާތަކާ ހަވާލާދީ އެވެ. އެ ފަހުން ހައުސިން މިނިސްޓްރީން، އެ މިނިސްޓްރީގެ ރަސްމީ ސޯޝަލް މީޑިއާތަ އަކައުންޓުތަކުން ވަނީ ނޫސް ބަޔާނެއް ނެރެފަ އެވެ.
ހައުސިންގެ ބަޔާނުގައި ވަނީ ރަސްމާލޭގައި ވޯޓާފްރަންޓަކާއި މެރީނާއެއް ހިމެނޭހެން ބޮޑު އިންޓަގްރޭޓަޑް މަޝްރޫއެއް ރަސްމާލޭގެ ބަޔެއްގައި ހިންގާނެ ކަމަށެވެ. އަދި، މިއިންޓަގްރޭޓަޑް ޒޯނުގައި ބައިިނަލްއަގުވާމީ ފެންވަރުގެ ހޮޓާތަކާއި، ރިސޯޓުތަކާއި، ބްރޭންޑެޑް ރެޒިޑެންސްތަކުގެ އިތުރުން ރެސްޓޯރެންޓުތަކާއި، ފިހާރަތަކުގެ އިތުރުން މުނިފޫހިފިލުވުމާއި ސިއްހީ މަރުކަޒުތައް ހުންނާނެ ކަަމަށެވެ.
ރަސްމާލެ މެރީނާ މަޝްރޫއުގެ މައުލޫމާތު އެނގޭ މަސްދަރުތަކުން ބުނަނީ، އީގަލް ހިލްސްއަށް ދެނީ ރަސްމާލޭގެ 500 ހެކްޓަރު ކަމަށެވެ. މިއީ ފުށިދިއްގަރު ފަޅުން ހިއްކާނެ ކަމަށް ބުނެފައިވާ 1058 ހެކްޓަރުގެ ގާތްގަނޑަކަށް ދެބައިކުޅަ އެއް ބަޔެވެ. ސަރުކާރުން މި މުއާމަލާތުގެ ބޭނުމަށް ރަސްމާލެ އަގުކޮށްފައި ވަނީ، އެ މީހުން ބުނާ ގޮތުގައި، އަކަ ފޫޓެއް 6،000ރ. އަށެވެ.
މި އަދަދު ބޭނުންކޮށްގެން މި މުއާމަލާތުގެ ދަށުން ދޫކޮށްލާ ސަރަހައްދުގެ ބިމުގެ އަގު ހިސާބުކުރުމުން، ޖުމްލަ އަގު 318 ބިލިއަން ރުފިޔާއަށް އަރަ އެވެ. މިއީ ސަރުކާރާއި ޑުބާއީ ކުންފުނިން އެ ބުނާ 20 ބިލިއަން ޑޮލަރާ އެއްވަރުގެ އަދަދެކެވެ.
މި މައުލޫމާތުތައް ކަށަވަރުކުރަން އަދަދު ނޫހުން ސަރުކާރުގެ އިސް ތަރުޖަމާނު މުހައްމަދު ހުސެއިން ޝަރީފު (މުންދު) އަށް ގުޅި ނަމަވެސް އޭނާ ފޯނަށް ޖަވާބު ނުދެއްވާތީ، ސަރުކާރުގެ ބަހެއް ނުލިބެ އެވެ.
