ރަސްމާލޭ އިންޓަގްރޭޓަޑް ޒޯން ތަރައްގީކުރަން ހަވާލުކޮށްފައިވާ ޔޫއޭއީގެ އީގަލްސް ހިލްސް ޑިވެލޮޕަރުންނަށް އެ މަޝްރޫއު ދިނީ އެއްވެސް ޓެކްސް ލުޔެއް ނުދޭ ގޮތަށް ކަމަށް ހައުސިން މިނިސްޓަރު އަބްދުالله މުއްތަލިބު މިއަދު ވިދާޅުވެއްޖެ އެވެ.
ސަރުކާރުން މިއަދު އިއުލާންކުރި މި މަޝްރޫއުގެ ދަށުން ރަަސްމާލޭގައި 20 ބިލިއަން ޑޮލަރުގެ އިންވެސްޓްމަންޓެއް ހިންގާނެ ކަމަށް އީގަލް ހިލްސް އާއި ސަރުކާރުން ވެސް ވަނީ ބުނެފަ އެވެ. ކުރިން މި ނޫހަށް މައުލޫމާތު ލިބުނީ މިއީ ހާއްސަ ޓެކްސް ޒޯނެއްގެ ގޮތުގައި ކަނޑައެޅިގެން ހިންގާ ތަރައްގީގެ މަޝްރޫއެއް ކަމަށެވެ.
ނަމަވެސް މުއްތޮލިބު މިހާރު ނޫހަށް ވިދާޅުވެފައި ވަނީ، އެ މަޝްރޫއު ކުރިއަށް ގެންދަނީ އެއްވެސް "ޓެކްސް ހޮލިޑޭއެއް ނުވަތަ ޓެކްސް އިސްތިސްނާއެއް ނުހިމެނޭ ގޮތަށް ކަަމަށެވެ. އަދި މި ތަނުގައި ހިންގާ ހުރިހާ ވިޔަފާރި ހަރަކާތަކަށް އާންމު ޓެކްސް އުސޫލުތައް ހިނގާނެ ކަމަށް ވެސް އޭނާ ވިދާޅުވި އެވެ.
އޭގެ އިތުރުން، ކޮންޓްރެކްޓަރުންނާއި ސަޕްލަޔަރުންނަށް ދައްކަން ޖެހޭ ފައިސާ ރާއްޖޭގެ ބޭންކެއްގައި ހުޅުވާފައި ހުންނަ އެކައުންޓަކުން ކުރާ ގޮތަށް އެއްބެސްވެފައިވާ ކަމަށް މުއްތަލިބު ވިދާޅުވެފައިވެ އެވެ. އަދި، މި ތަނުގައި ތަރައްގީކޮށްގެން ވިއްކާ ރެޒިޑެންސީ ޔުނިޓުތައް ވިއްކައިގެން ލިބޭ ފައިސާ ވެސް ޖަމާކުރަން ޖެހޭނީ، ރާއްޖޭގައި ހުންނަ އެސްކްރޯ އެކައުންޓެއްގައި ކަމަށް ވެސް އޭނާ ވިދާޅުވެފައިވެ އެވެ.
މުއްތަލިބު ވަނީ ރަސްމާލޭ އިންޓަގްރޭޓަޑް ޒޯނުގައި ތަރައްގީކުރާ ތަންތަން ވިއްކައިގެން ލިބޭ އާމްދަނީ ސަރުކާރާ ހިއްސާކުރާ ގޮތް ވެސް ވިދާޅުވެފަ އެވެ. އެއީ ވިޔަފާރި އުސޫލުން ތަރައްގީކުރާ ތަންތަން ވިއްކައިގެން ލިބޭ އާމްދަނީގެ 10 ޕަސެންޓު، ފުރަތަމަ އަދި ދެވަނަ މަރުހަލާގެ ކޮންމެ ރިއަލް އެސްޓޭޓް މުއާމަލާތަކުން ހަތަރު ޕަސެންޓުގެ ރަޖިސްޓްރޭޝަން ފީއެކެވެ. މި އާމްދަނީތަކުން ދައުލަތުގެ ބަޖެޓަށް 11 ބިލިއަން ޑޮލަރަށް ވުރެ ބޮޑު އާމްދަނީއެއް ލިބޭނެ ކަމަށް ބުނެފައިވެ އެވެ.
ސަރުކާރުން ބުނަނީ މި ތަން ދޫކޮށްފައި ވަނީ ލީސްހޯލްޑް އުސޫލުން ބިމުގެ މިލްކުވެރިކަން ބަދަލު ނުވާ ގޮތަށް ކުއްޔަށް ކަމަށެވެ. ނަމަވެސް، ކުއްޔަށް ދިން ބިމުގެ ސަރަހައްދެއް، ދިން އަގެއް، ދިނީ ކިހާ މުއްދަތަކަށް ކަމެއް އެނގޭނެ މައުލޫމާތު ސަރުކާރުން އަދި ހަމާއެއް ނުކުރެ އެވެ.
ރަސްމާލޭ އިންޓަގްރޭޓަޑް ޒޯނުގައި ބައިިނަލްއަގުވާމީ ފެންވަރުގެ ހޮޓާތަކާއި، ރިސޯޓުތަކާއި، ބްރޭންޑެޑް ރެޒިޑެންސްތަކުގެ އިތުރުން ރެސްޓޯރެންޓުތަކާއި، ފިހާރަތަކުގެ އިތުރުން މުނިފޫހިފިލުވުމާއި ސިއްހީ މަރުކަޒުތައް ހުންނާނެ ކަަމަށް ސަރުކާރުން ވަނީ ބުނެފަ އެވެ. އަދި މި މަޝްރޫއުގެ ދަށުން، ކޮންޓްރެކްޓަރުގެ އަމިއްލަ ހަރަދުގައި 5،000 ސޯޝަލް ހައުސިން ޔުނިޓު އަޅައިދޭނެ ކަަމަށް ވެސް ވަނީ ބުނެފަ އެވެ.
