ރަސްމާލޭގައި ވޯޓާފްރަންޓް އަދި މެރީނާއެއް ތަރައްގީކުރަން ޔޫއޭއީގެ ޑިވެލޮޕަރެއް ކަމުގައިވާ އީގަލް ހިލްސްއާ އެކީ ދިވެހި ސަރުކާރުން އިއްޔެ އެއްބަސްވުމެއްގައި ސޮއިކުރި އެވެ. ދިވެހި ސަރުކާރުން ބުނަނީ އެ މަޝްރޫއަކީ 20 ބިލިއަން ޑޮލަރުގެ މަޝްރޫއެއް ކަމަށެވެ.
ހައުސިން އެންޑް އިންފްރާސްޓްރަކްޗާ މިނިސްޓްރީ އާއި އީގަލް ހިލްސް ގުޅިގެން ނެރުނު ނޫސް ބަޔާނުގައި ބުނެފައި ވަނީ އީގަލް ހިލްސްއިން މި މަޝްރޫއަށް 20 ބިލިއަން ޑޮލަރު އިންވެސްޓު ކުރަން ރާވާފައިވާ ކަމަށާއި އެކަން ކުރުމަށް ހަމަޖެހިފައި ވަނީ އެކި މަރުހަލާތަކަށް ބަހާލައިގެން ކަމަށެވެ.
ނަމަވެސް އީގަލް ހިލްސްގެ ރަސްމީ ވެބްސައިޓުގައި ނެރެފައިވާ ނޫސް ބަޔާނުގައި ބުނެފައިވާ ގޮތުން އީގަލް ހިލްސްއިން މި މަޝްރޫއަށް އެކި މަރުހަލާތަކަށް ބަހާލައިގެން އިންވެސްޓް ކުރަން ހަމަޖެހިފައިވަނީ 12 ބިލިއަން ޑޮލަރެވެ.
މި މަޝްރޫއުގެ އަގު ކަމަށް ދިވެހި ސަރުކާރުން ހާމަކޮށްފައިވާ އަދަދާއި އީގަލް ހިލްސްއިން ހާމަކޮށްފައިވާ އަދަދު ދިމާނުވަނީ ކީއްވެގެން ކަމެއް ނޭނގެ އެވެ. މި އަދަދުތައް ދިމާނުވުމާ ގުޅިގެން އާންމުން ސުވާލު އުފައްދަމުންދާއިރު، ހައުސިން މިނިސްޓްރީން މިކަމާ ގުޅިގެން މިހާތަނަށް އެއްޗެއް ބުނެފައެއް ނުވެ އެވެ.
އެ ޕްރޮޖެކްޓު އިއުލާނު ކުރަން ދުބާއީގައި އިއްޔެ ބޭއްވި ނޫސްވެރިންގެ ބައްދަލުވުމުގައި ބައިވެރިވި ޔޫއޭއީގެ ދަ ނޭޝަަނަލް ނިއުސްއިން ފުރަތަމަ ރިޕޯޓުކުރީ މި މަޝްރޫއުގެ އަގަކީ 20 ބިލިއަން ޑޮލަރުގެ ކަމަށެވެ. ނަމަވެސް އެ ނޫހުން ފަހުން ވަނީ އެ މަޝްރޫއުގެ އަގަކީ 12 ބިލިއަން ޑޮލަރު ކަމަށް ބުނެ، ލިޔުން އިސްލާހުކޮށްފަ އެވެ.
ދުނިޔޭގެ އެންމެ ނަން ހިނގާ ނޫސްތަކުގައި މި ޕްރޮޖެކްޓްގެ އަގު ކަމަށް ލިޔެފައިވަނީ 12 ބިލިއަން ޑޮލަރެވެ. އޭގެ ތެރޭގައި ރޮއިޓާސް އާއި ބްލޫމްބާގް އަދި ގަލްފް ނިއުސް ވެސް ހިމެނެ އެވެ. އެ ހުރިހާ ނޫހަކުން ހަވާލާދީފައިވަނީ އީގަލް ހިލްސްގެ ރަސްމީ ވެބްސައިޓުގައި އާންމުކޮށްފައިވާ ނޫސް ބަޔާނަށެވެ.
މި ޕްރޮޖެކްޓުގެ ބައެއް އަންދާޒާތައް ދިން ނަމަވެސް މި މަޝްރޫއުގެ މާލީ ކަންކަމާއި، އިމާރާތްކުރުމުގެ ތާވަލާއި، އަދި ހަރަދުކުރާ ފައިސާގެ ތަފުސީލުތަކެއް ހާމަނުކުރެ އެވެ.
މި ނޫހަށް މައުލޫމާތު ދިން މަސްދަރުތަކުން ބުނީ މިއީ އެސްއީޒެޑު ގާނޫނުގެ ދަށުން ޓައުންޝިޕްއެއްގެ ގޮތުގައި ހާއްސަ ޓެކްސް އަދި ޑިއުޓީ ޒޯނެއްގެ ގޮތުގައި ކަނޑައެޅޭ ސަރަހައްދެކެވެ.
އެ ގޮތުން އީގަލް ހިލްސްގެ ޕްރޮޖެކްޓުގެ ބޭނުމަށް ރަސްމާލޭގެ 500 ހެކްޓަރު ދޫކޮށްލާ ގޮތަށް ވަނީ ހަމަޖެހިފަ އެވެ. މިއީ ފުށިދިއްގަރު ފަޅުން ހިއްކާނެ ކަމަށް ބުނެފައިވާ 1,058 ހެކްޓަރުގެ ގާތްގަނޑަކަށް ދެބައިކުޅަ އެއް ބަޔެވެ.
ރަސްމާލޭ އިންޓަގްރޭޓަޑް ޒޯނުގައި ބައިިނަލްއަގުވާމީ ފެންވަރުގެ ހޮޓާތަކާއި، ރިސޯޓުތަކާއި، ބްރޭންޑެޑް ރެޒިޑެންސްތަކުގެ އިތުރުން ރެސްޓޯރެންޓުތަކާއި، ފިހާރަތަކުގެ އިތުރުން މުނިފޫހިފިލުވުމާއި ސިއްހީ މަރުކަޒުތައް ހުންނާނެ ކަަމަށް ސަރުކާރުން ވަނީ ބުނެފަ އެވެ.
މީގެއިތުރުން މި މަޝްރޫއުގެ ދަށުން، ކޮންޓްރެކްޓަރުގެ އަމިއްލަ ހަރަދުގައި 5،000 ސޯޝަލް ހައުސިން ޔުނިޓު އަޅައިދޭނެ ކަަމަށް ވެސް ވަނީ ބުނެފަ އެވެ.
