ޒިއުރިކް، ސްވިޒަލެންޑް (ސެޕްޓެމްބަރު 18) - ދުނިޔޭގެ މައި ފުޓްބޯޅަ އިދާރާ ފީފާގައި މިހާރު އޮތް ލީޑަޝިޕާ ގުޅޭގޮތުން މައްސަލަ ބޮޑުވި ހުރިހާ ލިޔެކިއުމެއް އާންމުކުރުުމަށް، އެ ފެޑެރޭޝަންގެ ރައީސް ޖިއާނީ އިންފަންޓީނޯ އަށް އިނގިރޭސި އެފްއޭގެ ޗެއާމަން، ޑެބީ ހެވިޓް ގޮވާލައްވައިފި އެވެ.
ހެވިޓް އިޝާރާތް ކުރައްވާފައިވަނީ، ފީފާގެ މުބާރާތްތަކުގެ ރައިޓްސް، ވޯލްޑް ކަޕް ހިމެނޭހެން، އެމެރިކާގެ ރައީސް ޑޮނާލްޑް ޓްރަމްޕްގެ އާއިލީ ގުޅުން އޮންނަ ކުންފުންޏަކަށް ވިއްކާލަން އުޅުނު ފީފާ ފޯވާޑް އެންޓަޕްރައިސް (އެފްއެފްއީ) ޑީލުގެ ލިޔެކިޔުންތަކާއި މި ފަހަރު އެމެރިކާ، މެކްސިކޯ އަދި ކެނަޑާގައި އޮތް ފީފާ ވޯލްޑް ކަޕްގެ ތެރެއިން، އެމެރިކާގެ ފޯވާޑް، ފަލޮރިން ބަލޮގަން އަށް ދެއްކި ރަތް ކާޑަށް މާފު ދޭން ނިންމި ގޮތުގެ ލިޔެކިޔުންތަކަށެވެ.
ހަތަރު ވަނަ ދައުރަކަށް ފީފާގެ ރައީސަކަށް ހުންނެވުމަށް އިންތިހާބުގައި ވާދަކުރައްވާނެ ކަމަށް އިއުލާނުކުރައްވާފައިވާ އިންފަންޓީނޯ އިސްވެ ހުންނަވައި ފަށަން އުޅުނު އެފްއެފްއީ ޑީލަކީ، 20 ބިލިއަން ޑޮލަރުގެ އިންވެސްޓްމަންޓެއް ކަމަށް ވިދާޅުވެ، އިސްތިހާރުތަކެއް ކުރެއްވި ނަމަވެސް ފަހުން، ގައުމުުތަކުގެ ޕްރެޝަރާ ހެދި އެ ޑީލް އަނބުރާ ގެންގޮސް ފީފާ ލީޑަޝިޕުން މާފަށް އެދުނެވެ.
ފީފާ އަށް ހެވިޓް ފޮނުއްވި ސިޓީގައި ވަނީ، އަންނަ މަހު 15 ގައި އޮންނަ ފީފާ ކައުންސިލް ބައްދަލުވުމުގެ ކުރިން، މި ލިޔެކިއުންތައް އާންމުކުރަން ޖެހޭނެ ކަމަށް ވިދާޅުވެފަ އެެވެ. އެ ސިޓީގައި ހެވިޓް ވަނީ، ފީފާގައި މިހާރު އޮތް ކަންކަން ސިއްރު ކުރުމުގެ ސަގާފަތް ނައްތާލައި، މެމްބަރުންނަށް ދެފުށްފެންނަ ގޮތަށް އެ ފެޑެރޭޝަން ހިންގަން ޖެހޭ ކަމަށް ވެސް ވިދާޅުވެފަ އެވެ.
ޔޫރަޕްގެ މައި ފުޓްބޯޅަ އިދާރާ، ޔުއެފާ އިން ވެސް އަންނަނީ އެފްއެފްއީ ޑީލުގެ މައްސަލައިގައި އިންފަންޓީނޯއާ ދެކޮޅަށް އެމެރިކާގެ ތިން ކޯޓެއްގައި މައްސަލަ ކުރިއަށްގެންދަމުންނެވެ. އެ އަށް ރައްދުދީ ފީފާ އިން ބުނެފައިވަނީ، ޔުއެފާ އިން އިސްވެ މަސައްކަތް ފަށާފައިވަނީ، އިންފަންޓީނޯ އާއި ފީފާގެ ލީޑަޝިޕްގެ އަގުވައްޓާލުމަށް ކަމަށެވެ.
އަންނަ އަހަރުގެ މާޗް މަހު ފީފާގެ އާ އިންތިހާބު އޮތްއިރު، ރަސްމީކޮށް ކެންޑިޑެސީ އިއުލާނުކުރެއްވީ، 2016 ވަނަ އަހަރުން ފެށިގެން ފީފާގެ ރައީސްގެ މަގާމު ފުރުއްވަމުން އަންނަ އިންފަންޓީނޯ އެކަންޏެވެ. ނޮވެމްބަަރު މަހު، 18 ވަނަ ދުވަހު އިންްތިހާބަށް ކުރިމަަތިލުމުގެ މުއްދަތް ހަމަވާނެ އެވެ.
ފީފާގެ ރައީސްގެ މަގާމު ލިބޭނީ، ފީފާ މެމްބަރު، 211 ގައުމުގެ ތެރެއިން، މަދުވެގެން 106 ގައުމުގެ ތާއީދު ހޯދައިގެންނެވެ.
އިންފަންޓީނޯއާ ދެކޮޅަށް ނުކުންނާނެ ކެންޑިޑޭޓެއް އަދި ރަސްމީކޮށް ފާހަގަކުރެވިފައިނުވެ އެވެ. އެކަމަކު، ނޯތު/ސެންޓްރަލް އެމެރިކާ އަދި ކެރީބިއަން ފުޓްބޯލް އެސޯސިއޭޝަން ތަމްސީލްކުރާ ފެޑެރޭޝަން ކޮންކަކަފްގެ ރައީސް، ވިކްޓަ މޮންޓަގްލިއާނީ އިންތިހާބުގައި ވާދަކުރުމުގެ ފުރުސަތު އެބައޮތެވެ.
